17
Ri Jesús kuꞌan orar pakiwi rutijoꞌn
Echiriꞌ ubꞌiꞌim chi waꞌ, ri Jesús xtzuꞌn chikaj y xubꞌiꞌij:
«Nuqaw, xopon ru orayil; yaka kꞌu la uqꞌij ri Kꞌajol la chaꞌ jelaꞌ ri Kꞌajol la kuyak qꞌij Rilal. Ma Rilal yaꞌom la che ri Kꞌajol la kataqan pakiwi konoje ri tikawex, chaꞌ puqꞌabꞌ Rire kꞌo wi kuya kꞌaslemal na jinta utaqexik chike konoje ri eyaꞌom la che. Ekꞌu wa kꞌaslemal na jinta utaqexik e ruma ri ketaꞌmax wach la, xew Rilal Lal Dios y na jinta jun chik, yey ketaꞌmax kꞌu uwach ri Jesucristo, ri xtaq lo la.
»Riꞌin nuyakom qꞌij la wara che ruwachulew y xinkꞌis uꞌanik ri xintaq lo la che uꞌanik. Ekꞌu woꞌora Nuqaw, yaka la nuqꞌij chilaꞌ ukꞌ la, jelaꞌ pachaꞌ ri ꞌanom la chwe echiriꞌ kꞌamajaꞌ ne kajeqer ruwachulew.
»Chike taq ri tikawex xeya la chwe che ruwachulew, nuqꞌalajisam china Rilal. Rike e e la, y xeya la panuqꞌabꞌ yey kitaqem ri tzij la. Y woꞌora ketaꞌam waꞌ: Ronoje ri yaꞌom la chwe, ukꞌ la petinaq wi. Ma janipa ri xbꞌiꞌij la chwe, nutzijom chike ri xeya la chwe, y rike xkikojo. Yey xketaꞌmaj kꞌut paqatzij wi riꞌin ukꞌ la in petinaq wi y Lal taqayom lo la weꞌin.
»Riꞌin kinelaj ko chiwach la pakiwi rike; na e ta pakiwi konoje ri tikawex, xew pakiwi ri eyaꞌom la panuqꞌabꞌ, ma rike e e la. 10 Konoje ri e kꞌo panuqꞌabꞌ, e e la. Jekꞌulaꞌ riꞌ, konoje ri e kꞌo paqꞌabꞌ Rilal, e weꞌin. Y ri yakbꞌal nuqꞌij kaqꞌalajin kuma rike.
11 »Yey riꞌin kintzelej ukꞌ la, na kinkanaj ta kan che ruwachulew; noꞌj rike kekanajik. Lal Santowilaj Nuqaw, chechajij ko la chupa ri bꞌiꞌ la, ri eyaꞌom la chwe, chaꞌ chuꞌana xa jun kikꞌuꞌx jelaꞌ pachaꞌ nuꞌanom riꞌin ukꞌ la. 12 Echiriꞌ riꞌin in kꞌo kukꞌ wara che wuꞌwachulew, xebꞌenuchajij chupa ri bꞌiꞌ la ri eyaꞌom la chwe. Na jinta junoq chike xsachik, xew kꞌu ri jun xex wi sachinaq chik chaꞌ e kuꞌana janipa ri tzꞌibꞌital kan chupa ri Chꞌaꞌtem la.
13 »Ekꞌu woꞌora kintzelej tanchi ukꞌ la. Pero xaloqꞌ kꞌa in kꞌo che ruwachulew, kambꞌiꞌij taq waꞌ chike chaꞌ lik kanoj ri kanimaꞌ che kiꞌkotemal, jelaꞌ pachaꞌ ri kiꞌkotemal kꞌo wukꞌ riꞌin.
14 »Riꞌin nuyaꞌom ri Chꞌaꞌtem la chike. Yey taq ri winaq re ruwachulew tzel kekilo ma na junam ta kikꞌuꞌx kukꞌ, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew. 15 Na e ta kꞌu kinelaj chiwach la chaꞌ kebꞌesaj la che ruwachulew, xew lik chechajij la chwach ritzel winaq. 16 Rike na junam ta kikꞌuꞌx kukꞌ ri e re ruwachulew, jelaꞌ pachaꞌ riꞌin na junam ta nukꞌuꞌx kukꞌ ri e re ruwachulew.
17 »Yaꞌa kꞌu la chike kebꞌin jusukꞌ chupa ri Qꞌijsaq e la, waꞌ e ri Chꞌaꞌtem la. 18 Jelaꞌ pachaꞌ Rilal xintaq lo la chikixoꞌl ri tikawex che ruwachulew, jekꞌuriꞌlaꞌ riꞌin kebꞌenutaq bꞌi rike chikixoꞌl ri tikawex che ruwachulew. 19 Y kuma kꞌu rike, lik nuyaꞌom wibꞌ riꞌin che uꞌanik ri rajawal kꞌuꞌx la, chaꞌ jelaꞌ rike kebꞌin jusukꞌ chupa ri Qꞌijsaq.
20 »Yey na xew tane kinelaj chiwach la pakiwi rike, ma e kantzꞌonoj cheꞌla pakiwi ri kꞌamajaꞌ kakikoj ri nubꞌiꞌ ruma kakita ri tzijonik kakiꞌan rike. 21 Lal Nuqaw, kantzꞌonoj ko cheꞌla chuꞌana xa jun kikꞌuꞌx chikiwach junam qukꞌ riꞌoj, jelaꞌ pachaꞌ riꞌin ukꞌ la y Rilal wukꞌ riꞌin, chaꞌ ri e kꞌo che ruwachulew kakikojo e rilal taqayom lo la we riꞌin.
22 »Ri yakbꞌal nuqꞌij yaꞌom la chwe riꞌin, xinya chike rike chaꞌ chuꞌana xa jun kikꞌuꞌx jelaꞌ pachaꞌ Rilal y riꞌin xa jun qakꞌuꞌx. 23 Riꞌin in kꞌo kukꞌ rike y Rilal kꞌo la wukꞌ riꞌin chaꞌ rike kuꞌan xa jun kikꞌuꞌx pa saqil wi. Jekꞌulaꞌ riꞌ konoje ri tikawex che ruwachulew kaketaꞌmaj e Rilal taqayom lo la we riꞌin y lik kꞌax kenaꞌ la ri nutijoꞌn, jelaꞌ pachaꞌ lik kꞌax kinnaꞌ la riꞌin.
24 »Lal Nuqaw, e janipa ri eyaꞌom la panuqꞌabꞌ, e kuaj riꞌin kebꞌeꞌkꞌola wukꞌ pa kineꞌkꞌola wi, chaꞌ kakil ri yakbꞌal nuqꞌij yaꞌom la. Ma xex wi kꞌax innaꞌom lo la, chwi echiriꞌ kꞌamajaꞌ ne kajeqer ruwachulew. 25 Nuqaw, Rilal lik Lal jusukꞌ, yey ri tikawex che ruwachulew na ketaꞌam ta wach la. Noꞌj riꞌin wetaꞌam wach la yey ri nutijoꞌn ketaꞌam e Rilal taqayom lo la we riꞌin. 26 Lik kꞌut nuqꞌalajisam chikiwach china Rilal y kꞌa kintajin ne che uqꞌalajisaxik waꞌ, chaꞌ ri rutzil kꞌuꞌx la chwe riꞌin, kakꞌojiꞌ kukꞌ rike y jelaꞌ kinkꞌojiꞌ riꞌin pa kanimaꞌ» xchaꞌ.