1 Ri fariseos y ri saduceos xebꞌopon rukꞌ ri Jesús re kakikꞌam upa. Xkitzꞌonoj kꞌu che kuꞌan juna kꞌutubꞌal re chilaꞌ chikaj chikiwach chaꞌ jelaꞌ kaqꞌalajinik we Rire taqom lo ruma ri Dios.

2 Ekꞌu ri Jesús xukꞌul uwach:

«Echiriꞌ keꞌek la qꞌij, ralaq kabꞌiꞌij alaq: “Lik utz ri qatiempo ma kaq ruwa kaj.” 3 Echiriꞌ anim tan, kabꞌiꞌij alaq: “Waqꞌij lik na utz ta ri qatiempo. ma kaq ruwa kaj y qꞌeqmuj.” ¡Ralaq xa kebꞌ palaj alaq! Ma kariq alaq uchꞌobꞌik chi utz saꞌ ruꞌanom ruwa kaj, yey na kamaj tane alaq usukꞌ saꞌ taq ri katajin ri Dios che ukꞌutik chiwach alaq waqꞌij ora. 4 Ri kakitzꞌonoj kꞌutubꞌal re ruchuqꞌabꞌ ri Dios e ri winaq re waqꞌij ora, ri itzel kikꞌuꞌx y na jusukꞌ ta ri kanimaꞌ chwach ri Dios. Pero na kayaꞌtaj ta kꞌu waꞌ chike, ma xew kayaꞌiꞌ chikiwach ri kꞌutubꞌal xꞌaniꞌ ojertan rukꞌ ri qꞌalajisanel Jonás»*Mt. 12:39-40 xchaꞌ. Ekꞌuchiriꞌ, xebꞌuya kanoq y xeꞌek.

5 Echiriꞌ xebꞌopon rutijoꞌn chꞌaqa mar, xkꞌun chikikꞌuꞌx na xkikꞌam tubꞌi pam. 6 Xubꞌiꞌij kꞌu ri Jesús chike:

—Chitapeꞌ: Lik chichajij iwibꞌ chwa ri levadura ke ri fariseos y ri saduceos*Jelaꞌ pachaꞌ ri levadura kusipowirisaj upa ri pam, jekꞌulaꞌ ri kikꞌutunik ri fariseos y ri saduceos na jampatana kuyoj ri kinaꞌoj ri winaq. —xchaꞌ.

7 Rutijoꞌn xa chikiwach xkibꞌiꞌij: «Rire kubꞌiꞌij waꞌ, ma na xqakꞌam ta lo pam» xechaꞌ.

8 Ri Jesús xretaꞌmaj saꞌ ri kakichꞌaꞌtibꞌej chikiwach, xubꞌiꞌij kꞌu chike:

—¡E riꞌix na nim ta kꞌana ri kubꞌulibꞌal ikꞌuꞌx wukꞌ! ¿Suꞌchak e kubꞌisoj ikꞌuꞌx ri na jinta pam iwukꞌaꞌam loq? 9 ¿Kꞌamajaꞌ nebꞌa kimaj usukꞌ? ¿Na kakꞌun ta nebꞌa chikꞌuꞌx echiriꞌ xebꞌenutzuq ri woꞌobꞌ mil chi achijabꞌ rukꞌ woꞌobꞌ pam y janipa lo chakach xinojisaj rukꞌ ri kiqax? 10 ¿Yey na kakꞌun ta nebꞌa chikꞌuꞌx echiriꞌ xebꞌenutzuq kajibꞌ mil chi achijabꞌ rukꞌ wuqubꞌ pam y janipa lo chakach xinojisaj rukꞌ ri kiqax? 11 ¿Chaꞌtaj na ximaj ta usukꞌ na e ta chwi ri pam xinchꞌaꞌt wi echiriꞌ ximbꞌiꞌij: “Chichajij iwibꞌ che ri levadura ke ri fariseos y ri saduceos”? —xchaꞌ. 12 Kꞌa ekꞌuchiriꞌ xkimaj usukꞌ na chwi ta ri levadura re ri pam xchꞌaꞌt wi ri Jesús, ma e chwi ri kikꞌutunik ri fariseos y ri saduceos.

13 Kꞌo jun qꞌij xebꞌopon ri Jesús che taq ri luwar re ri tinamit Cesarea re Filipo,†Kꞌo kebꞌ tinamit Cesarea kibꞌiꞌ. Waꞌ wa jun e ri kꞌo chwa ri juyubꞌ Hermón, pa xtaqan wi ri Felipe rukꞌajol ri Herodes. y xutzꞌonoj kꞌu chike rutijoꞌn:

—Chikiwa ri winaq, ¿china nawi Ralaxel Chikixoꞌl Tikawex? —xchaꞌ.

14 Rutijoꞌn xkibꞌiꞌij che:

—Kꞌo kebꞌiꞌn re e Juan Aj Yaꞌl Bautismo; jujun chik kakibꞌiꞌij e Elías; y jujun chik, e Jeremías o junoq chik chike ri qꞌalajisanelabꞌ re ojertan —xechaꞌ.

15 Ekꞌuchiriꞌ, xubꞌiꞌij chike rutijoꞌn:

—Yey chiwach riꞌix, ¿in china riꞌin? —xchaꞌ.

16 Ekꞌu ri Simón Pedro xubꞌiꞌij che:

—Rilal lal ri Cristo, lal Rukꞌajol ri Dios kꞌaslik —xchaꞌ.

17 Ri Jesús xukꞌul uwach:

—Lik nim aqꞌij awalaxik riꞌat Simón at ukꞌajol ri Jonás; ma na e ta juna tikawex xqꞌalajisan waꞌ chawe, e ri Nuqaw kꞌo chilaꞌ chikaj. 18 Riꞌin kambꞌiꞌij kꞌu chawe: Riꞌat at Pedro.‡“Pedro”: Wa bꞌiꞌaj keꞌelawi “abꞌaj”. Y chwi kꞌu waꞌ waꞌbꞌaj kantik wubꞌi ri nu iglesia, yey ruchuqꞌabꞌ ri kamik na kuchꞌij tane kꞌana usachik uwach ri nu iglesia. 19 Y riꞌin kanya paqꞌabꞌ riꞌat ri lawe re rutaqanik ri Dios petinaq chilaꞌ chikaj. Ekꞌu janipa ri kaxim wara che ruwachulew, kaximitaj chilaꞌ chikaj; yey janipa ri kakir wara che ruwachulew, kakiritaj chilaꞌ chikaj*Mt. 18:18; Jn. 20:23 —xchaꞌ.

20 Ekꞌu ri Jesús xebꞌutaq rutijoꞌn che chaꞌ na kakitzijoj ta kꞌana che junoq we Rire e ri Cristo, Ruchaꞌoꞌn lo ri Dios.

21 Chwi kꞌu riꞌ, ri Jesús xujeq uqꞌalajisaxik chike rutijoꞌn janipa ri kukꞌulumaj: E lik chirajawaxik che keꞌek Jerusalem, kayaꞌiꞌ na kꞌu pa kꞌax kuma taq ri nimaq winaq re Israel, ri nimaq e aj chakunel pa Rocho Dios y raj kꞌutunel re ri tzijpixabꞌ, yey kakamisaxik; noꞌj churox qꞌij kakꞌastaj loq.

22 Ekꞌu ri Pedro xresaj bꞌi ri Jesús chikixoꞌl y xuchꞌaꞌbꞌej upa, jewaꞌ xubꞌiꞌij che:

—¡Wajawal, lik ne muya luwar riꞌ ri Dios e kakꞌulumaj la waꞌ! —xchaꞌ.

23 Ekꞌu ri Jesús xutzuꞌ lo uwach ri Pedro y xubꞌiꞌij che:

—¡Chatel chinuwach, Satanás! Riꞌat at latzꞌanel chwe, ma na e ta kachꞌobꞌ puwi ri uchꞌobꞌom lo ri Dios, xew e kachꞌobꞌ jelaꞌ pachaꞌ ri kakichꞌobꞌ ri winaq —xchaꞌ.

24 Ekꞌuchiriꞌ, xubꞌiꞌij ri Jesús chike rutijoꞌn:

—We kꞌo junoq karaj katerej lo chwij, lik chirajawaxik che muꞌan xew ri karaj rire, e chukuyu ri kꞌax kape puwiꞌ ruma ukojom ri nubꞌiꞌ, y tereja lo chwij. 25 Ma china ri na kuya ta ranimaꞌ rukꞌaslem, riꞌ e kujam ri chomilaj kꞌaslemal chwach ri Dios; noꞌj ri kuya ranimaꞌ rukꞌaslem wuma riꞌin, riꞌ e kuriq ri chomilaj ukꞌaslemal chwach ri Dios. 26 Ma ¿saꞌ kꞌu kutiqoj riꞌ che ri tikawex we kuꞌan rajaw ronoje ruwachulew yey kusach kꞌu uwach rukꞌaslemal? ¿O kꞌo nawi rajil kutoj rachi chwa rukꞌaslemal chaꞌ jelaꞌ na kujam taj? ¡Na jintaj!

27 »Ma Ralaxel Chikixoꞌl Tikawex kakꞌun rukꞌ runimal yakbꞌal uqꞌij Ruqaw y kukꞌ taq ru ángeles. Ekꞌuchiriꞌ kuya chike chikijujunal ri tikawex, ri rajil ukꞌaxel e chirij taq ri kiꞌanom. 28 Paqatzij wi kambꞌiꞌij chiwe: E kꞌo jujun chike wa e kꞌo wara na kekam tana we na xkil tubꞌi Ralaxel Chikixoꞌl Tikawex kakꞌun che rutaqanik —xchaꞌ.