1 Echiriꞌ xukꞌis ubꞌiꞌxik waꞌ ri Jesús, xel bꞌi Galilea y xeꞌek pa taq ri luwar re Judea y xopon pa taq ri luwar kꞌo chꞌaqa yaꞌ che ri nimayaꞌ Jordán. 2 Lik kꞌut e kꞌi ri winaq xeterej bꞌi chirij y xebꞌukunaj ri yewaꞌibꞌ chiriꞌ.

3 E kꞌo kꞌu jujun chike ri fariseos xeqibꞌ rukꞌ ri Jesús xa re kakikꞌam upa y xkitzꞌonoj che:

—¿Ubꞌe nawi che juna achi, xa tobꞌ saꞌ ri kujal wi uchiꞌ ri rixoqil, kuya bꞌi ruwujil re jachbꞌal ibꞌ che? —xechaꞌ.

4 Ri Jesús xukꞌul uwach:

—¿Na ajilam ta nebꞌa alaq saꞌ ri tzꞌibꞌital kan pa Ruchꞌaꞌtem ri Dios? Ma jewaꞌ kubꞌiꞌij:

7 Ekꞌuchiriꞌ, xkitzꞌonoj che:

—¿Suꞌchak kꞌu riꞌ ri Moisés xubꞌiꞌij we juna achi karaj kujach bꞌi ri rixoqil, xew chuyaꞌa bꞌi ruwujil re jachbꞌal ibꞌ che y jekꞌulaꞌ na rixoqil ta chik?*Dt. 24:1 —xechaꞌ.

8 Ri Jesús xubꞌiꞌij chike:

—Waꞌ e ruma lik ko ri animaꞌ alaq. Ruma laꞌ ri Moisés xuya luwar kayaꞌiꞌ ruwujil re jachbꞌal ibꞌ; noꞌj che lo ri jeqebꞌal ruwachulew na je ta laꞌ ri xraj ri Dios. 9 Kambꞌiꞌij kꞌu riꞌin che alaq: China junoq kuya ruwujil re jachbꞌal ibꞌ che ri rixoqil tobꞌ ri rixoqil na makuninaq ta chirij ri kꞌulanikil, yey kakꞌuliꞌ tanchi rukꞌ juna chik ixoq, riꞌ kamakun chirij ri kꞌulanikil. Y china ri kakꞌuliꞌ rukꞌ rixoq jachom kanoq, riꞌ jenelaꞌ kamakun chirij ri kꞌulanikil —xchaꞌ.

10 Ekꞌu rutijoꞌn xkibꞌiꞌij che:

—We jelaꞌ kukꞌulumaj rachi rukꞌ ri kꞌulanikil, más ne utz riꞌ we junoq na kakꞌuliꞌ taj —xechaꞌ.

11 Ri Jesús xubꞌiꞌij chike:

—Na konoje ta kꞌu ri tikawex kakichꞌij waꞌ; ma xew ri yaꞌtal lo chike ruma ri Dios, kakichꞌij uꞌanik. 12 E kꞌo achijabꞌ na kekꞌuliꞌ taj ma kalaxibꞌem pachaꞌ e eunucos. E kꞌo jujun chik na kekꞌuliꞌ taj ma ꞌanom eunucos chike. Yey e kꞌo ri na kekꞌuliꞌ taj ma kiyaꞌom kibꞌ che ri chak re rutaqanik ri Dios petinaq chilaꞌ chikaj. China ri kachꞌijow uꞌanik waꞌ, chuchꞌija kꞌu riꞌ —xchaꞌ.

13 E kꞌo jujun raltaq ko akꞌalabꞌ xekꞌam lo chwach ri Jesús chaꞌ kuya ruqꞌabꞌ pakiwiꞌ y jelaꞌ kutzꞌonoj che ri Dios kebꞌuchajij. Yey rutijoꞌn xekiyaj ri ekꞌamayom lo ke.

14 Noꞌj ri Jesús xubꞌiꞌij chike: «Chiyaꞌa luwar chike ri raltaq ko akꞌalabꞌ chepeta na wukꞌ. Mebꞌiqꞌatej; ma ri kakiꞌan e jelaꞌ pachaꞌ rike, riꞌ kuꞌan ke rutaqanik ri Dios petinaq chilaꞌ chikaj» xchaꞌ. 15 Xuya kꞌu ruqꞌabꞌ pakiwi ri raltaq ko akꞌalabꞌ. Tekꞌuchiriꞌ, xel bꞌi pa ri luwar.

16 Kꞌo kꞌu jun kꞌakꞌal achi xkꞌun rukꞌ ri Jesús y xutzꞌonoj che:

—Lal utzilaj tijonel, ¿saꞌ ri utz kanꞌano chaꞌ kꞌo nukꞌaslemal na jinta utaqexik? —xchaꞌ.

17 Ri Jesús xukꞌul uwach:

—¿Suꞌbꞌe kabꞌiꞌij la “utz” chwe? Ma xa jun ri lik utz kꞌolik, waꞌ e ri Dios. Yey we kaꞌaj la kok la pa ri kꞌaslemal na jinta utaqexik rukꞌ Rire, e taqej la Rutzij Upixabꞌ —xchaꞌ.

18 Rachi xubꞌiꞌij che ri Jesús:

—¿Pachike kꞌu riꞌ ri tzijpixabꞌ? —xchaꞌ.

Ri Jesús xubꞌiꞌij che:

—“Matkamisanik. Matmakun chirij ri kꞌulanikil. Mateleqꞌik. Maꞌan raqꞌubꞌal chirij junoq. 19 Chaloqꞌoj kiqꞌij rachu-aqaw”*Éx. 20:12-16 y “Kꞌax chanaꞌa rawatz-achaqꞌ jelaꞌ pachaꞌ kꞌax kanaꞌ awibꞌ riꞌat”*Lv. 19:18 —xchaꞌ.

20 Rachi xubꞌiꞌij che ri Jesús:

—Ronoje waꞌ nuꞌanom lo chwi nuchꞌutiꞌnal. ¿Saꞌ kꞌu riꞌ ri kꞌa chirajawaxik chwe kanꞌano? —xchaꞌ.

21 Ri Jesús xubꞌiꞌij che:

—We kaꞌaj la e kaꞌan la janipa ri karaj ri Dios che ri bꞌinik silabꞌik la, kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ, peta la, terej lo la chwij y kuyu la ri kꞌax kape pawiꞌ la ruma lal nutijoꞌn —xcha che.

22 Rachi echiriꞌ xuta waꞌ, lik kabꞌisonik xeꞌek ma rire lik rajawal bꞌeyom.

23 Ekꞌuchiriꞌ, xubꞌiꞌij ri Jesús chike rutijoꞌn:

—Paqatzij wi kambꞌiꞌij chiwe: Juna bꞌeyom lik kꞌayew che kok chupa rutaqanik ri Dios petinaq chilaꞌ chikaj. 24 Kambꞌiꞌij tanchi kꞌu chiwe: E ne más kꞌayew ri kok juna bꞌeyom chupa rutaqanik ri Dios chwa ri kikꞌow juna camello chupa rutel juna akuxaꞌ —xchaꞌ.

25 Echiriꞌ xkita waꞌ rutijoꞌn, lik xkam kanimaꞌ che y xkitzꞌonoj chikiwach:

—We e riꞌ, ¿china kꞌu riꞌ ri kakolobꞌetajik?*Chikiwach raj judiꞌabꞌ, we junoq kꞌo ubꞌeyomal e ruma utz uꞌanom chwach ri Dios. Kakichꞌobꞌ kꞌu riꞌ, we kꞌayew chike ri bꞌeyomabꞌ kebꞌok chupa rutaqanik ri Dios, más ne kꞌayew riꞌ chike ri nibꞌaꞌibꞌ. —xechaꞌ.

26 Ri Jesús xutzuꞌ kiwach y xubꞌiꞌij chike:

—Ri tikawex na kakikolobꞌej ta kibꞌ kitukel ma waꞌ lik kꞌayew chikiwach; noꞌj ri Dios ronoje kuꞌano ma na jinta kꞌayew chwach Rire —xchaꞌ.

27 Ekꞌuchiriꞌ, xubꞌiꞌij ri Pedro che:

—Qajawal, riꞌoj qayaꞌom kan ronoje y oj teran chiꞌij la. ¿Saꞌ kꞌu riꞌ ri kaqakꞌul riꞌoj? —xchaꞌ.

28 Ri Jesús xukꞌul uwach:

—Paqatzij wi kambꞌiꞌij chiwe: Kopon kꞌu riꞌ ri qꞌij echiriꞌ ronoje kuꞌan kꞌakꞌ, waꞌ echiriꞌ Ralaxel Chikixoꞌl Tikawex keꞌtzꞌula chupa ri chomilaj tzꞌulibꞌal re rutaqanik. Jekꞌulaꞌ riꞌix kixeꞌtzꞌula chupa kabꞌlajuj tzꞌulibꞌal re kixtaqan pakiwi ri kabꞌlajuj tinamit re Israel.†“Ri kabꞌlajuj tinamit re Israel”: Waꞌ e kalkꞌoꞌal kan ri kabꞌlajuj ukꞌajol ri Jacob, ri kabꞌiꞌx Israel che. Gn. 35:22-26 29 Yey china kꞌu ri uyaꞌom kan rocho, ebꞌuyaꞌom kan ri ratz-uchaqꞌ, ruchu-uqaw, ri rixoqil, ri ralkꞌoꞌal o ri rulew ruma ukojom ri nubꞌiꞌ, riꞌ kukꞌul na jun ciento chik chwa ronoje laꞌ yey kukꞌul kꞌu ri kꞌaslemal na jinta utaqexik.

30 »Lik kꞌu e kꞌi chike ri lik kꞌo kiwach woꞌora, chwach apanoq na jinta chi kiwach; yey lik e kꞌi chike ri na jinta kiwach woꞌora, e lik kakꞌojiꞌ kiwach chwach apanoq.