1 E qꞌalajisanik waꞌ xuya ri Dios che ri Qanimajawal Jesucristo chaꞌ Rire kukꞌut chike ri raj chakibꞌ saꞌ taq ri katajin loq. Ruqꞌalajisaxik xuꞌan ri Jesús e xutaq lo ru ángel chaꞌ koluꞌbꞌiꞌij waꞌ che ri raj chak Juan. 2 Ekꞌu ri Juan xuqꞌalajisaj kan ri tzij re ri Dios, ri qꞌalajisanik re ri Qanimajawal Jesucristo rukꞌ taq ri xkꞌut chwach rire. 3 Nim uqꞌij ralaxik ri kajilan wa chꞌaꞌtem re wa qꞌalajisanik yey nim kiqꞌij kalaxik konoje ri ketaw re waꞌ yey kakitaqej ronoje taq ri tzꞌibꞌital chupa, ma xa naqaj chi kꞌo wi lo ruqꞌijol echiriꞌ kuꞌana taq waꞌ.

4 Riꞌin in Juan kintzꞌibꞌan pan chike ri wuqubꞌ iglesias e kꞌo chupa taq ri tinamit re Asia.

Kꞌulu alaq ri unimal rutzil kꞌuꞌxaj y ri utzil chomal, ri kape rukꞌ ri Jun kꞌo waqꞌij ora, ri xex chi kꞌo lo wi y ri kꞌo chiqawach apanoq, ri kape rukꞌ ri wuqubꞌ uwach Uxlabꞌixel kꞌo chwach rutzꞌulibꞌal pa kataqan wi, 5 yey ri kape rukꞌ ri Qanimajawal Jesucristo, ri kuqꞌalajisaj chi utz ri Qꞌijsaq. Rire e ri nabꞌe xkꞌastaj lo chikixoꞌl ri ekaminaq y e ri kꞌo pakiwi konoje ri e taqanelabꞌ che ruwachulew. Rire lik kꞌax xojunaꞌo y xojuchꞌaj che taq ri qamak rukꞌ rukikꞌel xturuw chwa ri cruz. 6 Xuꞌan kꞌu xa jun tinamit chiqe y xuꞌan chiqe oj taqanel y oj chakunel chwach ri Dios, Ruqaw Rire. Ekꞌu Rire lik taqal che kayak uqꞌij waqꞌij ora y chiqawach apanoq ma lik saꞌchi ruchomal y ruchuqꞌabꞌ. 7 Tape alaq, ri Qanimajawal Jesucristo pa sutzꞌ kakꞌun wi. Konoje kꞌu riꞌ kakilo, kakil ne ri xekamisan re. Y konoje rukꞌiyal kiwach taq ri tikawex che ruwachulew lik kebꞌoqꞌik ruma rukꞌunibꞌal.*Mt. 24:30 Paqatzij wi jelaꞌ kuꞌano.

8 «Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z»*“A y Z”: Kil “Alfa y Omega” pa vocabulario. kacha ri Qanimajawal, ri Jun kꞌo waqꞌij ora, ri xex chi kꞌo lo wi y ri kꞌo chiqawach apanoq yey ri kꞌo ronoje unimal chuqꞌabꞌ puqꞌabꞌ.

9 Riꞌin in Juan in bꞌare jun ukꞌ alaq hermanos, junam oj kꞌo chupa rutaqanik ri Qanimajawal Jesucristo y junam kaqachꞌij uchuqꞌabꞌ taq ri kꞌaxkꞌobꞌik rukꞌ unimal qakꞌuꞌx. E riꞌin xineꞌyoꞌq pa ri isla Patmos ruma xintzijoj ri Tzij re ri Dios y ri Qꞌijsaq re ri Qanimajawal Jesucristo. 10 Pa kꞌu jun qꞌij domingo†Pa ri chꞌaꞌtem griego kubꞌiꞌij “ri qꞌij re ri Qanimajawal Jesucristo”. in kꞌo puqꞌabꞌ ri Ruxlabꞌixel ri Dios echiriꞌ xinto xchꞌaw lo Jun chwij, waꞌ lik ko kachꞌawik pachaꞌ uchꞌawibꞌal trompeta. 11 Jewaꞌ xubꞌiꞌij:

«Riꞌin in ri jeqebꞌal re yey in ri kꞌisbꞌal re, jelaꞌ pachaꞌ ri kaꞌibꞌ letra A y Z. Chatzꞌibꞌaj kꞌu chupa juna libro ronoje taq ri kawilo y chataqa bꞌi chike ri wuqubꞌ iglesias e kꞌo chupa taq ri tinamit re Asia: ri kꞌo Éfeso, ri kꞌo Esmirna, ri kꞌo Pérgamo, ri kꞌo Tiatira, ri kꞌo Sardis, ri kꞌo Filadelfia y ri kꞌo Laodicea» xchaꞌ.

12 Xintzuꞌn kꞌu pan chwij chaꞌ kanwilo china ri kachꞌaꞌt lo wukꞌ; y echiriꞌ xintzuꞌn apanoq, xinwil pan wuqubꞌ utzukꞌulibꞌal aqꞌ re oro. 13 Chikinikꞌajal kꞌu ri wuqubꞌ utzukꞌulibꞌal aqꞌ re oro, xinwil pan Jun lik e katzuꞌn Ralaxel Chikixoꞌl Tikawex. Ukojom jun uqꞌuꞌ kopon kꞌa chuqul raqan y kojotal jun pas re oro chwa ukꞌuꞌx. 14 Rujolom y ruwiꞌ lik saq jelaꞌ pachaꞌ ri mit saq y pachaꞌ ri nieve;‡Ri nieve jelaꞌ rusaqil pachaꞌ katzuꞌn ri saqbꞌach. y ukabꞌichal ruwach pachaꞌ aqꞌ kareprotik. 15 Ri raqan kawolqꞌinik pachaꞌ ri chꞌichꞌ bronce echiriꞌ kesax lo pa ri orna; ruqul katatajik jelaꞌ pachaꞌ utzaꞌm yaꞌ e riꞌ xkꞌunik. 16 Puwikiqꞌabꞌ e kꞌo wuqubꞌ chꞌumil; puchiꞌ kel lo jun espada lik tꞌisiꞌs utzaꞌm y kaꞌibꞌ ruwi reꞌ.§Wa espada e keꞌelawi Ruchꞌaꞌtem ri Cristo yey waꞌ lik kꞌo uchuqꞌabꞌ ma ronoje ri kubꞌiꞌij e kuꞌanaꞌ. Heb. 4:12 Rupalaj jelaꞌ pachaꞌ ri qꞌij echiriꞌ lik kareprotik. 17 Ekꞌuchiriꞌ xintzuꞌ uwach, xintzaq xeꞌraqan uqꞌabꞌ y xinkanaj kanoq pachaꞌ in kaminaq chik. Ekꞌu Rire xuya ruwikiqꞌabꞌ panuwiꞌ y jewaꞌ xubꞌiꞌij chwe:

«Maxiꞌij awibꞌ, ma Riꞌin in ri nabꞌe yey in ri kꞌisbꞌal re. 18 In ri xex in kꞌo wi, In ri xinkamik, pero woꞌora na jinta chi utaqexik ri nukꞌaslemal. Panuqꞌabꞌ Riꞌin kꞌo wi ri kamik y panuqꞌabꞌ kꞌo wi kebꞌenukꞌastajisaj lo ri ekaminaq.**Pa ri chꞌaꞌtem griego kubꞌiꞌij “Panuqꞌabꞌ kꞌo wi ri lawe re ri kamik y re ri luwar pa kekꞌojiꞌ wi ri ekaminaq.”

19 »Chatzꞌibꞌaj janipa ri xkꞌut chawach, rukꞌ taq ri kat-tajin che rilik y ri katajin lo chiqawach apanoq. 20 Ri keꞌelawi ri wuqubꞌ chꞌumil awilom pa nuwikiqꞌabꞌ y taq ri wuqubꞌ utzukꞌulibꞌal aqꞌ re oro e waꞌ: Ri wuqubꞌ chꞌumil e ri wuqubꞌ ángeles e chajinel ke ri wuqubꞌ iglesias; yey ri wuqubꞌ utzukꞌulibꞌal aqꞌ re oro e ri wuqubꞌ iglesias.