4
Ri yakbꞌal uqꞌij ri Dios chilaꞌ chikaj
1 Kꞌisbꞌal kꞌu re taq waꞌ, xintzuꞌn chikaj y xinwil jun puerta jaqatal che ruwa kaj. Y ri Jun, ri kachꞌaw pachaꞌ uchꞌawibꞌal trompeta, xchꞌaꞌt tanchi wukꞌ, jewaꞌ xubꞌiꞌij: «Chataqꞌana lo wara y Riꞌin kankꞌut chawe saꞌ taq ri katajin loq we xikꞌow taq waꞌ wa xbꞌiꞌx chawe» xchaꞌ. 2 Xaqikꞌateꞌt, riꞌin xinkꞌojiꞌ puqꞌabꞌ ri Ruxlabꞌixel ri Dios. Xinwil kꞌu jun tzꞌulibꞌal re taqanik chilaꞌ chikaj y kꞌo Jun tzꞌul chupa. 3 Ri Jun tzꞌul chupa jelaꞌ katzuꞌnik pachaꞌ ri chomilaj abꞌaj jaspe rubꞌiꞌ y pachaꞌ ri chomilaj kaq abꞌaj cornalina rubꞌiꞌ. Ri tzꞌulibꞌal sututal rij rukꞌ jun arco iris lik kawonik jelaꞌ pachaꞌ ri chomilaj abꞌaj esmeralda rubꞌiꞌ. 4 Yey wa tzꞌulibꞌal sutum rij rukꞌ veinticuatro tzꞌulibꞌal chik. Y xinwil veinticuatro nimaq winaq etzꞌul pa ri veinticuatro tzꞌulibꞌal, kikojom kiqꞌuꞌ lik saq y kꞌo corona re oro che ri kijolom. 5 Chupa kꞌu ri tzꞌulibꞌal kebꞌel lo uyokꞌbꞌal uxeꞌ kaj y katataj uchꞌawibꞌal jabꞌ karaqlajik y kajininik. Chwach kꞌu ri tzꞌulibꞌal, lik kawolol wuqubꞌ candil, waꞌ e ri wuqubꞌ uwach Uxlabꞌixel re ri Dios. 6 Chwach ri tzꞌulibꞌal kayenen jun yaꞌ jelaꞌ pachaꞌ ri mar y kajuljut upa pachaꞌ chi vidrio. Y ri tzꞌulibꞌal sutum rij kuma kajibꞌ kꞌo kikꞌaslemal pachaꞌ e ángeles yey jelaꞌ ketzuꞌn pachaꞌ awaj y kꞌo ukꞌiyal kiwach chikij y chikiwach. 7 Ri nabꞌe jelaꞌ katzuꞌnik pachaꞌ juna koj, rukaꞌm jelaꞌ katzuꞌnik pachaꞌ juna meqꞌ, rupalaj rurox jelaꞌ katzuꞌnik pachaꞌ upalaj winaq y rukaj jelaꞌ katzuꞌnik pachaꞌ juna águila kaxikꞌikꞌik. 8 Chikijujunal wa kajibꞌ kꞌo waqitaq kixikꞌ. Y lik kꞌo ukꞌiyal kiwach che ronoje ri kij y ruxeꞌ ri kixikꞌ. Yey na kekos ta kꞌu che ubꞌiꞌxikil chipaqꞌij chichaqꞌabꞌ:
«¡Lik Santo, Santo, Santo ri Dios Qajawxel,
ri kꞌo ronoje unimal chuqꞌabꞌ puqꞌabꞌ,
ri xex chi kꞌo lo wi, ri kꞌo waqꞌij ora y ri kꞌo chiqawach apanoq!» kechaꞌ.
9 Ekꞌu ri kajibꞌ kakiyak uqꞌij ri Dios, kakibꞌixoj rubꞌiꞌ y kakiya kiqasaꞌn re tioxibꞌal che ri Jun tzꞌul pa ri tzꞌulibꞌal re taqanik, ri na jinta utaqexik rukꞌaslemal. 10 Ekꞌuchiriꞌ rike kakiꞌan waꞌ, ri veinticuatro nimaq winaq kakixukubꞌaꞌ kibꞌ chwach ri Jun tzꞌul pa ri tzꞌulibꞌal y kakiloqꞌnimaj uqꞌij ri na jinta utaqexik rukꞌaslemal yey kakesaj ri kicorona re oro che ri kijolom y kakiya chwach ri tzꞌulibꞌal y jewaꞌ kakibꞌiꞌij:
11 «Dios Qajawxel, xew Rilal taqal cheꞌla
kakꞌul la ri yakbꞌal qꞌij
ruma lik saꞌchi ri chomal la y ri chuqꞌabꞌ la;
ma Lal xꞌanaw la re ronoje ri kꞌolik
y lik e rajawal kꞌuꞌx la ri kekꞌojiꞌ taq waꞌ
yey ruma ne laꞌ xeꞌan taq la» kechaꞌ.