1 Ruroꞌ ángel xuchꞌawisaj rutrompeta, y xinwil kꞌu jun chꞌumil xtzaq lo chikaj y xeꞌtzaq che ruwachulew. Xyaꞌ kꞌu che ri chꞌumil ri lawe re ri siwan na jinta utaqexik ruchoyil upa. 2 Y ri chꞌumil xujaq uchiꞌ wa siwan, y kabꞌuqbꞌut ri sibꞌ xel lo chupa waꞌ pachaꞌ usibꞌol juna nimalaj orna. Ruma kꞌu riꞌ lik xuꞌan qꞌequꞌm che ruwa ri qꞌij y che ruwa kaj. 3 Chupa ri sibꞌ xebꞌel lo ukꞌiyal sakꞌ y xkikich bꞌi kibꞌ che ruwachulew. Xyaꞌ kꞌu pakiqꞌabꞌ ri sakꞌ ketiꞌoꞌnik pachaꞌ sinaꞌj. 4 Xetaq kꞌu che na kakiꞌan ta kꞌax che taq raqꞌes, che taq ri cheꞌ, che taq ronoje ri tikoꞌn che ruwachulew; ma xew kakiꞌan kꞌax chike ri winaq na jinta ri retalil ri Dios che rukurusil ri kipalaj. 5 Na xyaꞌ ta kꞌu chike kekikamisaj ri winaq; xew lik kekiya pa kꞌaxkꞌobꞌik woꞌobꞌ ikꞌ, ma lik kekitiꞌo yey ri kitiꞌbꞌal e jelaꞌ pachaꞌ rukꞌaxkꞌol rutiꞌbꞌal sinaꞌj. 6 Y chupa taq kꞌu riꞌ waꞌ wa qꞌij taq ri winaq kakitzukuj kikamik, pero na kakiriq taj; ma tobꞌ lik kakaj kekamik, ri kamik e pachaꞌ kanimaj chikiwach.

7 Taq ri sakꞌ jelaꞌ ketzuꞌnik pachaꞌ ri kawayuꞌ ewiqtalik echiriꞌ kebꞌek pa chꞌaꞌoj. Che ri kijolom kikojom pachaꞌ coronas re oro; taq ri kipalaj jelaꞌ katzuꞌnik pachaꞌ kipalaj winaq. 8 Yey ri kiwiꞌ e pachaꞌ kiwiꞌ ixoqibꞌ, y ri keꞌ e pachaꞌ ri keꞌ taq ri koj. 9 Ruwa kikꞌuꞌx chꞌuqutal rukꞌ chꞌichꞌ. Echiriꞌ kexikꞌikꞌik, ruchꞌawibꞌal ri kixikꞌ e pachaꞌ uchꞌawibꞌal ukꞌiyal kareta jekꞌom kuma kawayuꞌ echiriꞌ kebꞌek pa chꞌaꞌoj. 10 E jelaꞌ pachaꞌ ri sinaꞌj, kꞌo kixul che ri kijeꞌ. Yaꞌom kꞌu kichuqꞌabꞌ che ri kijeꞌ chaꞌ kakiꞌan kꞌax chike ri winaq woꞌobꞌ ikꞌ. 11 Yey ri kajawal kataqan pakiwiꞌ e ri jun ángel rajaw ri siwan na jinta utaqexik ruchoyil upa. Rubꞌiꞌ pa ri chꞌaꞌtem hebreo e “Abadón”, yey pa ri chꞌaꞌtem griego “Apolión”.* Wa kebꞌ bꞌiꞌaj e keꞌelawi “ri kꞌisol uwach ronoje”. 12 Jewaꞌ xkꞌis wi ri nabꞌe kꞌaxkꞌobꞌik. Chita na peꞌ, ma kape chi kaꞌibꞌ kꞌaxkꞌobꞌik.

13 Ruwaq ángel xuchꞌawisaj rutrompeta. Tekꞌuchiriꞌ xinta jun qulaj xel lo chuxoꞌlibꞌal ri kajibꞌ utzaꞌm raltar† “Utzaꞌm raltar”: Waꞌ jelaꞌ katzuꞌn pachaꞌ rukꞌaꞌ chikop. re oro, ri kꞌo chwach ri Dios. 14 Wa qulaj jewaꞌ xubꞌiꞌij che ruwaqaq ángel, ri rukꞌaꞌam rutrompeta: «Chebꞌakira ri kajibꞌ ángeles e yututal chuchiꞌ ri nimayaꞌ Eufrates» xchaꞌ. 15 Xekir kꞌu ri kajibꞌ ángeles, ri e yijbꞌital chik re kekikamisaj rurox parte chike ri winaq e kꞌo che ruwachulew echiriꞌ kopon ri ora, ri qꞌij, ri ikꞌ y ri junabꞌ chaꞌom chi ruma ri Dios. 16 Riꞌin xinta kꞌu ri kajlibꞌal ri soldados e kꞌo chwi kawayuꞌ re kebꞌek pa chꞌaꞌoj, e kaꞌibꞌ ciento millones chi konoje.‡ Ri kajibꞌ ángeles e ketaqaw wa soldados chaꞌ kakiꞌan wa kamik.

17 Y xkꞌut chinuwach ruma ri Dios, taq ri kawayuꞌ kukꞌ ri e kꞌo puwiꞌ, jewaꞌ ketzuꞌnik: Kikojom chꞌuqubꞌal uwa kikꞌuꞌx, waꞌ katzuꞌn kaq pachaꞌ aqꞌ, azul pachaꞌ rabꞌaj zafiro rubꞌiꞌ y qꞌan pachaꞌ rabꞌaj azufre rubꞌiꞌ. Y ri kijolom ri kawayuꞌ e pachaꞌ ri kijolom ri koj yey pa kichiꞌ kel lo aqꞌ, sibꞌ y azufre.§ “Azufre”: Waꞌ echiriꞌ kaporoxik, lik chu ri ruxlabꞌ y kebꞌuya pa yabꞌil o pa kamik ri tikawex kesiqow re. 18 Xekam kꞌu rurox parte chike ri winaq e kꞌo che ruwachulew ruma ri oxibꞌ kꞌaxkꞌobꞌik xel lo pa kichiꞌ ri kawayuꞌ; waꞌ e ri aqꞌ, ri sibꞌ y ri azufre. 19 Ri kichuqꞌabꞌ ri kawayuꞌ pa kichiꞌ y che ri kijeꞌ kꞌo wi. Ri kijeꞌ jelaꞌ pachaꞌ ri kumatz, ma kꞌo kijolom yey rukꞌ waꞌ kakiꞌan kꞌax chike ri winaq.

20 Yey e taq ri winaq na xekam ta che wa oxibꞌ kꞌaxkꞌobꞌik, na xkitzelej tane kitzij che ri na utz taj kiꞌanom. Na xkoqꞌotaj tane uloqꞌnimaxik kiqꞌij ritzel taq uxlabꞌixel y na xkoqꞌotaj tane uloqꞌnimaxik kiqꞌij taq ri tiox ꞌanatal kuma rike rukꞌ oro, rukꞌ plata, rukꞌ bronce, rukꞌ abꞌaj y rukꞌ cheꞌ; yey waꞌ na ketzuꞌn taj, na ketan taj y na kebꞌin taj. 21 Na xkitzelej tane kitzij che taq ri kamik kiꞌanom, che taq ri itz kiꞌanom, che taq ri kaketzꞌabꞌej uwa kiqꞌij kukꞌ jujun chik na kikꞌulel taj y che taq releqꞌ kiꞌanom.