11
Ri Rocho Dios kapajik
1 Ekꞌuchiriꞌ, xyaꞌ jun tani panuqꞌabꞌ jelaꞌ pachaꞌ juna vara re pajbꞌal y jekꞌuwaꞌ xbꞌiꞌx chwe: «Chatyaktajoq, chapaja ri Rocho Dios, chapaja raltar y chebꞌawajilaj janipa ri kakiloqꞌnimaj uqꞌij ri Dios chiriꞌ. 2 Noꞌj ruwa ja kꞌo chwach ri Rocho Dios chayaꞌa kanoq; mapajo, ma laꞌ yaꞌtal chi chike ri winaq na e ta aj Israel; yey rike kakiꞌan ke che ri tinamit Jerusalem re kakikꞌaq bꞌi uqꞌij, ma ketaqan na puwiꞌ oxibꞌ junabꞌ rukꞌ nikꞌaj» xchaꞌ.
Ri kaꞌibꞌ qꞌalajisanelabꞌ kakiqꞌalajisaj Rutzij ri Dios
3 Riꞌin kebꞌenutaq bꞌi kaꞌibꞌ nuqꞌalajisanelabꞌ kikojom kiqꞌuꞌ lik tzakꞌan upa* Ri kiqꞌuꞌ kikojom ri kaꞌibꞌ qꞌalajisanelabꞌ e pachaꞌ ri kakikoj ri tikawex ojertan echiriꞌ kakam juna katz-kichaqꞌ. chaꞌ kakitzijoj ri Nutzij oxibꞌ junabꞌ rukꞌ nikꞌaj.† Pa ri chꞌaꞌtem griego kubꞌiꞌij “mil doscientos sesenta qꞌij”. 4 Waꞌ wa kaꞌibꞌ qꞌalajisanelabꞌ e ri kaꞌibꞌ cheꞌ re olivo y e ri kaꞌibꞌ utzukꞌulibꞌal aqꞌ e kꞌo chwach ri Dios Qajawxel, ri kataqan chwi ruwachulew. 5 We kꞌo junoq karaj kuꞌan kꞌax chike, kel lo aqꞌ pa kichiꞌ rike y rukꞌ waꞌ kekikamisaj taq ri tzel kebꞌilow ke. Jekꞌulaꞌ kekam ri kakaj kakiꞌan kꞌax chike. 6 Wa kaꞌibꞌ qꞌalajisanelabꞌ yaꞌtal chike kakiqꞌatej ri jabꞌ chaꞌ na kuꞌan ta lo pa ruqꞌijol echiriꞌ ketajin che uꞌanik qꞌalajisanik; y yaꞌtal chike kakiꞌan kikꞌ che taq ri yaꞌ y kakiꞌan kꞌax che ruwachulew rukꞌ ukꞌiyal kꞌaxkꞌobꞌik janipa laj kakaj rike.
7 Echiriꞌ kikꞌisom chi utzijoxik Rutzij ri Dios, ri jun nimalaj itzel chikop, ri kel lo chupa ri siwan na jinta utaqexik ruchoyil upa, kachꞌoꞌjin kꞌu kukꞌ, kuchꞌij kichuqꞌabꞌ y kebꞌukamisaj. 8 Ekꞌu ri kicuerpos kateliꞌ kan pa kakimol wi kibꞌ ri winaq che ri nimalaj tinamit pa xkamisax wi ri Qanimajawal Jesucristo chwa cruz. Yey che wa tinamit kabꞌiꞌx “Sodoma” y “Egipto” ruma taq ri mak kaꞌan chilaꞌ.
9 Y ri tikawex e petinaq chupa taq ri tinamit, chike rukꞌiyal kiwach taq ri tikawex che rukꞌiyal uwach chꞌaꞌtemal, oxibꞌ qꞌij rukꞌ nikꞌaj kakil ri kicuerpo telanik y na kakiya tane luwar chaꞌ kemuqik. 10 Y konoje ri winaq e kꞌo che ruwachulew lik kekiꞌkot kꞌu riꞌ ruma ri kikamik wa kaꞌibꞌ qꞌalajisanelabꞌ. Kakiꞌan kꞌu nimaqꞌij y kakitaq taq sipanik chikiwach, ma xekam wa kaꞌibꞌ qꞌalajisanelabꞌ re ri Dios, ri xekiya pa kꞌaxkꞌobꞌik ri winaq che ruwachulew.
11 Ekꞌuchiriꞌ ikꞌowinaq chi oxibꞌ qꞌij rukꞌ nikꞌaj, ri Dios xuya chike wa kaꞌibꞌ qꞌalajisanelabꞌ kebꞌuxlabꞌik y kakꞌojiꞌ tanchi kikꞌaslem. Xeyaktaj kꞌu riꞌ y xetakꞌiꞌik. Y konoje ri xebꞌilow ke, xok unimal xiꞌin ibꞌ kukꞌ.
12 Ekꞌu ri kaꞌibꞌ qꞌalajisanelabꞌ xkita Jun lik ko xchꞌaw lo chilaꞌ chikaj, jewaꞌ xubꞌiꞌij chike: «Chixaqꞌana lo wara» xchaꞌ. Ekꞌu rike xebꞌel bꞌi chikaj chupa jun sutzꞌ y xebꞌilitaj kuma ri tzel xebꞌilow ke.
13 Chupa kꞌu laꞌ la joqꞌotaj xpe jun nimalaj kabꞌraqan y lajuj parte che ri tinamit xwuluwubꞌik; y ruma waꞌ e wuqubꞌ mil ri winaq xekamik. Ekꞌu ri na xekam taj, xok jun xiꞌin ibꞌ kukꞌ y xkiyak uqꞌij ri Dios kꞌo chilaꞌ chikaj. 14 Jewaꞌ xkꞌis wi rukaꞌm kꞌaxkꞌobꞌik, pero rurox kꞌaxkꞌobꞌik katajin loq.
Kachꞌawisax ruwuq trompeta
15 Ruwuq ángel xuchꞌawisaj rutrompeta, y xetataj kowilaj taq qulaj kechꞌaw lo chilaꞌ chikaj, jewaꞌ kakibꞌiꞌij:
«Konoje taq ri tinamit che ruwachulew
kꞌo chi puqꞌabꞌ ri Dios Qajawxel
y puqꞌabꞌ Ruchaꞌoꞌn lo Rire;
yey wa taqanik na jinta chi utaqexik» kechaꞌ.
16 Ekꞌu ri veinticuatro nimaq winaq etzꞌul pa ri kitzꞌulibꞌal chwach ri Dios, xkixukubꞌaꞌ kibꞌ, xkiqasaj kimejelem kꞌa chuꞌlew y xkiloqꞌnimaj uqꞌij ri Dios. 17 Jewaꞌ kakibꞌiꞌij:
«Kaqatioxij cheꞌla, ma Lal Dios Qajawxel
kꞌo ronoje unimal chuqꞌabꞌ paqꞌabꞌ la,
Lal ri Dios kꞌo waqꞌij ora, ri xex chi kꞌo lo wi, y ri kꞌo chiqawach apanoq;
ma kꞌutum la ri chuqꞌabꞌ la
y jeqom chi ri taqanik la paqawi riꞌoj.
18 E taq kꞌu ri tinamit che ruwachulew
lik xpe koyowal chiꞌij la.
Noꞌj woꞌora xopon ruqꞌijol ri oyowal la,
ri qꞌij re kaqꞌat la tzij pakiwi taq ri ekaminaq.
Kaya kꞌu la ri rajil ukꞌaxel chike ri qꞌalajisanelabꞌ e aj chak la
kukꞌ ri jujun chik e kꞌo paqꞌabꞌ la,
ri lik kakiloqꞌnimaj uqꞌij ri bꞌiꞌ la,
tobꞌ lik kꞌo kiwach o na jinta kiwach;
yey kasach kꞌu la kiwach riꞌ ri kesachaw kiwach
taq ri winaq wara che ruwachulew» kechaꞌ.
19 Ekꞌu ri Rocho Dios chilaꞌ chikaj, xteqꞌebꞌaxik; y xilitaj pan chupa, ri kaxa re ri tzij uꞌanom ri Dios kukꞌ rutinamit. Ekꞌuchiriꞌ, xyokꞌ kaꞌn ruxeꞌ kaj, xetataj uchꞌawibꞌal jabꞌ karaqlajik y kajininik; yey xpe jun kabꞌraqan, y xuꞌan nimaq taq saqbꞌach.