1 Tekꞌuchiriꞌ, ri ángel xukꞌut chinuwach jun nimayaꞌ rukꞌ yaꞌ re kꞌaslemal, waꞌ lik kajuljut upa jelaꞌ pachaꞌ chi vidrio, yey kel lo pa kꞌo wi ri tzꞌulibꞌal re taqanik re ri Dios y re ri Qꞌapoj Bꞌexex. 2 Punikꞌajal ri nimabꞌe re ri tinamit y che ukabꞌichal uchiꞌ ri nimayaꞌ, kꞌo ri cheꞌ kuya kꞌaslemal.*Kꞌo ri kakichꞌobꞌ raqan ri nimayaꞌ kikꞌow chunikꞌajal ri nimabꞌe y ri cheꞌ kꞌo chunikꞌajal ri nimayaꞌ, yey ri ratzꞌayaq y ruqꞌabꞌ kumaj ukabꞌichal uchiꞌ ri nimayaꞌ. Gn. 2:9; Ez. 47:7-12; Ap. 2:7 Wa cheꞌ kuya kabꞌlajuj uwach chupa ri junabꞌ, yey chujujunal ikꞌ kawachinik. Ekꞌu ruxaq e re kunabꞌal ke taq ri tinamit che ruwachulew. 3 Chiriꞌ na jinta chi ri na utz ta uwach xukꞌam lo ri mak.*Gn. 3:17-19 Ekꞌu ri tzꞌulibꞌal re ri Dios y re ri Qꞌapoj Bꞌexex kakꞌojiꞌ chiriꞌ yey konoje ri e nimanel re ri Dios kakiloqꞌnimaj uqꞌij Rire. 4 Kakil kꞌu uwach ri Dios pa saqil wi y rubꞌiꞌ Rire kakꞌojiꞌ che rukurusil ri kipalaj. 5 Chiriꞌ kꞌu riꞌ na jinta chi aqꞌabꞌ; ri kejeqiꞌ chiriꞌ na kajawax ta chi ne uwonibꞌal aqꞌ re lámpara chike y na kajawax tane utzuꞌnibꞌal ri qꞌij, ma ri Dios Qajawxel e qꞌijsaq chike. Yey ri kitaqanik rike na jinta chi utaqexik.

6 Jewaꞌ xubꞌiꞌij kꞌu ri ángel chwe:

«E taq waꞌ wa chꞌaꞌtem lik areꞌ y lik qatzij. Y ri Dios Qajawxel, ri kayaꞌw kichꞌaꞌtem ri ketzijon re Rutzij, utaqom lo ru ángel chaꞌ kuqꞌalajisaj chike ri e aj chak re Rire janipa taq ri katajin loq» xchaꞌ.

7 Ekꞌu ri Qanimajawal jewaꞌ kubꞌiꞌij:

«¡Chitapeꞌ! ¡Na naj ta chi ri woponik iwukꞌ! Lik nim uqꞌij ralaxik ri kutaqej taq wa qꞌalajisanik tzꞌibꞌital chupa wa libro» kachaꞌ.

8 Riꞌin in Juan, in ri xintaw re yey in ri xinilow re ronoje taq waꞌ. Echiriꞌ nutom y wilom chi taq ronoje waꞌ, xuaj kanloqꞌnimaj uqꞌij ri ángel, ri xbꞌiꞌn re y xkꞌutuw re chwe ronoje taq waꞌ; xinxukubꞌaꞌ kꞌu wibꞌ xeꞌraqan uqꞌabꞌ, 9 pero rire jewaꞌ xubꞌiꞌij chwe:

«Lik maꞌan laꞌ, maxukubꞌaꞌ awibꞌ chinuwach. Ma riꞌin xa in jun aj chak re ri Dios jelaꞌ pachaꞌ riꞌat y taq rawach e qꞌalajisanelabꞌ, junam kukꞌ ri kakikoj utzij taq wa tzꞌibꞌital kan chupa wa libro. E chaloqꞌnimaj uqꞌij ri Dios» xchaꞌ.

10 Je tanchi waꞌ xubꞌiꞌij ri ángel chwe:

«Mawewaj taq ri qꞌalajisanik tzꞌibꞌital chupa wa libro, ma xa naqaj chi kꞌo wi lo ruqꞌijol chaꞌ kuꞌana taq waꞌ. 11 China kꞌu ri kuꞌan ri na jusukꞌ taj, we na karaj taj karoqꞌotaj uꞌanik, rukꞌ kꞌu rire kꞌo wi. China ri uchꞌulam rubꞌinik, we na karaj taj karoqꞌotaj waꞌ, rukꞌ kꞌu rire kꞌo wi. Yey ekꞌu ri kuꞌan ri lik jusukꞌ, e chutaqej uꞌanik ri lik jusukꞌ y china ri uyaꞌom ribꞌ che jun santowilaj bꞌinik, e chuchuqꞌubꞌej ribꞌ che waꞌ» xcha ri ángel.

12 Ekꞌu ri Qanimajawal jewaꞌ kubꞌiꞌij:

«¡Chitapeꞌ! Na naj ta chi ri woponibꞌal iwukꞌ y kankꞌam kꞌu bꞌi ri rajil ukꞌaxel, ri kanya chike ri tikawex chikijujunal e chirij taq ri kiꞌanom. 13 Riꞌin in ri jeqebꞌal re yey in ri kꞌisbꞌal re jelaꞌ pachaꞌ ri kaꞌibꞌ letra A y Z.†“A y Z”: Kil “Alfa y Omega” pa vocabulario. 14 Lik nim kiqꞌij kalaxik ri kakiꞌan jusukꞌ che ri kibꞌinik kisilabꞌik,‡Pa ri chꞌaꞌtem griego kubꞌiꞌij “ri kakichꞌaj ri kiqꞌuꞌ”. ma jelaꞌ lik taqal chike kakitij ke ruwach ri cheꞌ re kꞌaslemal y kebꞌok bꞌi che taq ri okibꞌal re wa tinamit. 15 Noꞌj e taq ri winaq qiꞌtzel kibꞌinik kisilabꞌik: ri e aj itz, ri kaketzꞌabꞌej uwa kiqꞌij kukꞌ jujun chik na kikꞌulel taj, ri e kamisanel, ri e aj tioxabꞌ kukꞌ konoje ri lik keꞌek kikꞌuꞌx che uꞌanik raqꞌubꞌal, riꞌ na kanya ta chike kebꞌok bꞌi chupa wa tinamit. 16 Riꞌin in Jesús nutaqom bꞌi ri nu ángel chaꞌ kutzijoj ronoje taq waꞌ pa taq riglesias. Ri David kukꞌ taq kan ri ralkꞌoꞌal e pachaꞌ jun cheꞌ; ekꞌu Riꞌin in ri in ratzꞌayaq y in ri utux waꞌ wa cheꞌ,§Ri Jesús e ri “ratzꞌayaq” ri David ma xex chi kꞌo lo wi chwach ri David yey e Rire ri xyaꞌw ri naꞌoj y ri taqanik che. Ri Jesús e “rutux ri cheꞌ kel lo che ri David” ma e ralkꞌoꞌal kan ri rey David. Is. 11:1,10; Ro. 1:3 yey in pachaꞌ ri jun chꞌumil kawon pa saqribꞌal»*Nm. 24:17; Ap. 2:28 kacha ri Jesús.

17 Ri Ruxlabꞌixel ri Dios y ri rixoqil ri Qꞌapoj Bꞌexex, jewaꞌ kakibꞌiꞌij:

«Peta la» kechaꞌ.

Y china ri kataw re, chubꞌiꞌij:

«Peta la.»

China kꞌu ri katzajin uchiꞌ y karaj kapetik, petoq y chutija re ri yaꞌ re kꞌaslemal, yey waꞌ xa kasipax che.

18 Riꞌin in Juan kanqꞌalajisaj kꞌu waꞌ chikiwach konoje ri ketaw re ri qꞌalajisanik re wa libro: We kꞌo junoq kukoj uwiꞌ ronoje taq waꞌ, ri Dios kutaq lo puwiꞌ janipa ri kꞌaxkꞌobꞌik tzꞌibꞌital chupa wa libro. 19 We kꞌo kꞌu junoq kꞌo karesaj che ri qꞌalajisanik re wa libro, ri Dios na kuya ta chi che kutij ruwach ri cheꞌ ri kuya kꞌaslemal, na kuya tane che kok bꞌi chupa ri santowilaj tinamit re ri Dios, yey na jinta chi kꞌana re che janipa ri utz tzꞌibꞌital kan chupa wa libro.

20 Ekꞌu ri kajikibꞌan uwach taq waꞌ, jewaꞌ kubꞌiꞌij:

«Paqatzij wi na naj ta chi ri woponibꞌal iwukꞌ» kacha ri Jesús.

¡Amén! E chuꞌana riꞌ, peta la, Qanimajawal Jesucristo.

21 Kꞌulu kꞌu onoje alaq riꞌ ri unimal rutzil ukꞌuꞌx ri Dios. Amén.