15
Raj wach re riglesia caquimol quib Jerusalem
1 Chupa tak riꞌ laꞌ la kꞌij xebopon Antioquía jujun achijab e petinak Judea y xquijek quecꞌutun chiquiwach ri quicojom rubiꞌ ri Cristo, jewaꞌ caquibiꞌij: «We na cacoj ta ri retalil re circuncisión che alak jelaꞌ pachaꞌ rutakanic can ri Moisés, riꞌ na cacolobetaj ta alak» quechaꞌ.
2 Ecꞌu ri Pablo y ri Bernabé lic xebec chunimal puwi wa cꞌutunic cucꞌ waꞌchijab. Qꞌuisbal re, conoje xquichꞌob rakan saꞌ ri caquiꞌano; e quetak bi ri Pablo y ri Bernabé cucꞌ jujun chic chaꞌ quebec Jerusalem re quebeꞌchꞌaꞌt chwi waꞌ cucꞌ ri e takoꞌn re ri Jesús y jujun chic e aj wach re riglesia.
3 E tak cꞌu ri etakom bi cuma riglesia re Antioquía, xebicꞌow pa tak ri tinamit re Fenicia y re Samaria, y chujujunal luwar xquitzijoj suꞌanic ri na e ta aj judiꞌab quiyaꞌom can ri quibinic re ojertan chaꞌ e caquitakej ri Dios. Ruma cꞌu riꞌ waꞌ, conoje ri hermanos xetaw re, lic xequiꞌcot che.
4 Echiriꞌ xebopon Jerusalem, xecꞌul cuma tak ri hermanos, ri e takoꞌn y jujun chic e aj wach re riglesia. Xquitzijoj cꞌu chique ronoje ri uꞌanom ri Dios cucꞌ. 5 Pero e cꞌo jujun chique ri quicojom rubiꞌ ri Cristo e cuqꞌuil ri aj fariseos, rique xeyactajic y jewaꞌ xquibiꞌij:
—Lic chirajawaxic cacoj ri retalil re circuncisión chique tak ri na e ta aj judiꞌab caquicoj rubiꞌ ri Dios yey quetak che caquiꞌan janipa ri cubiꞌij ri Tzij Pixab re ri Moisés —xechaꞌ.
6 Xquimol cꞌu quib ri e takoꞌn y jujun chic e aj wach re riglesia chaꞌ quechꞌaꞌt chwi waꞌ. 7 Lic naj cꞌut xquichapalaꞌ quib chiquiwach puwi waꞌ. Tecꞌuchiriꞌ, ri Pedro xyactajic y xubiꞌij chique:
—Hermanos achijab, ralak etaꞌam alak jampa chi lo kꞌij waꞌ icꞌowinak chwi xinuchaꞌ lo ri Dios chaꞌ chi nuchiꞌ riꞌin, ri na e ta aj judiꞌab caquita ri Utzilaj Tzij y caquicoj cꞌu rubiꞌ ri Cristo. 8 Ri Dios, ri retaꞌam saꞌ ri cꞌo chupa ri canimaꞌ ri ticawex, e xcꞌuluw que ri na e ta aj judiꞌab quicojom rubiꞌ ri Cristo. Yey xucꞌut waꞌ echiriꞌ xuya lo ri Santowilaj Ruxlabixel chique rique jelaꞌ pachaꞌ xuꞌan kucꞌ riꞌoj. 9 Y junam xeril rique kucꞌ riꞌoj, ma xujoskꞌij ri canimaꞌ che ri mac ruma ri cubulibal quicꞌuꞌx.
10 »Ecꞌu woꞌora, ¿suꞌchac capetisaj alak royowal ri Dios ruma ri queya alak chuxeꞌ uqꞌuiyal takanic ri na e ta aj judiꞌab quicojom rubiꞌ ri Cristo? Waꞌ e pachaꞌ ekaꞌn cacoj alak chiquikul. Yey wa ekaꞌn, na xquichꞌij tane rucꞌaxic ri katiꞌ-kamam ojertan y na kachꞌijom tane rucꞌaxic riꞌoj. 11 Noꞌj cꞌu riꞌoj e cakajiquibaꞌ uwach waꞌ: Xa ne ruma ri unimal rutzil ucꞌuꞌx ri Kanimajawal Jesús cojcolobetaj riꞌoj*Na jinta junok curik ri colobetajic xa ruma cutakej takanic. Ef. 2:8-9 jelaꞌ pachaꞌ rique —xchaꞌ.
12 Conoje cꞌu riꞌ ruqꞌuiyal ticawex xetzꞌincaꞌnic y xquiya quixiquin chique ri Bernabé y ri Pablo, ma caquitzijoj ri nimak tak cꞌutubal re chukꞌab uꞌanom ri Dios cuma rique chiquixoꞌl ri na e ta aj judiꞌab.
13 Echiriꞌ xquiqꞌuis quechꞌaꞌt rique, ri Jacobo jewaꞌ xubiꞌij:
—Hermanos, chinta na pe alak: 14 Ri Simón xutzijoj puwi ri nabe laj echiriꞌ ri Dios xukꞌalajisaj rib chiquiwach ri na e ta aj judiꞌab†Ri nabe laj echiriꞌ ri Dios xutak lo ri Ruxlabixel paquiwi ri na e ta aj Israel e pa rocho ri Cornelio. Hch. 10:24-48 chaꞌ chiquixoꞌl rique quebuchaꞌ janipa ri quebuꞌana utinamit. 15 Y waꞌ cuꞌana xaki jun rucꞌ ri quitzꞌibam can ri kꞌalajisanelab puwi ri ubiꞌim lo ri Dios:
16 Icꞌowinak cꞌu waꞌ, quintzelej lok
y canyac tanchi ri rocho ri rey David wuluwubinak bi,‡Waꞌ e jun cꞌambal naꞌoj. Queꞌelawi ri Dios cucoj jun nimalaj takanel pucꞌaxel ri rey David, waꞌ e ri Kanimajawal Jesucristo.
cancꞌojoj cꞌu ri tzakinak bi che y canꞌan cꞌacꞌ che.
17 Canꞌan waꞌ chaꞌ ri nicꞌaj chic ticawex caquitzucuj ri Dios,
waꞌ e tak ri tinamit na e ta aj judiꞌab,
conoje ri e nuꞌanom nutinamit chique ma quicojom ri nubiꞌ.
18 E waꞌ ri xubiꞌij ri Dios Kajawxel, yey e ri ukꞌalajisam chi lo ojertan. Am. 9:11-12
19 Ruma cꞌu laꞌ, chinuwach riꞌin na utz taj we cakasachisaj quinaꞌoj ri na e ta aj judiꞌab quicojom rubiꞌ ri Kanimajawal. 20 Ri kaꞌanaꞌ e chojtzꞌiban pan chique y kayaꞌa pan quinaꞌoj chaꞌ caquesaj quib che tak ri cachꞌulan re junok pachaꞌ tak ri icꞌowisam chwa juna tiox, chaꞌ na caquetzꞌabej ta uwa quikꞌij cucꞌ jujun chic na quicꞌulel taj, chaꞌ na caquitij ta tiꞌij que awaj xa ejitzꞌam y chaꞌ na caquitij ta quicꞌ. 21 Ma xex wi chwi lo ojertan, ronoje kꞌij re uxlanibal pa tak sinagogas e cꞌo ri quebajilan re y quetzijon puwi ri Tzij Pixab tzꞌibital can ruma ri Moisés —xcha ri Jacobo.
Ri carta re pixabanic chique ri na e ta aj judiꞌab
22 E tak ri e takoꞌn y ri jujun chic e aj wach re riglesia cucꞌ conoje ri hermanos, xucꞌul quicꞌuꞌx ri quechaꞌ jujun achijab chiquixoꞌlibal re quetak bi pa ri tinamit Antioquía rucꞌ ri Pablo y ri Bernabé chaꞌ caquicꞌam bi jun carta re pixabanic chique ri na e ta aj judiꞌab quicojom rubiꞌ ri Cristo. Ecꞌu xequichaꞌ ri Judas ri cabiꞌx Barsabás che y ri Silas, ma lic chom ilitajinak ri quibinic quisilabic chiquiwach ri hermanos. 23 Xyaꞌ cꞌu bi ri carta paquikꞌab, jewaꞌ cubiꞌij:
E riꞌoj oj takoꞌn re ri Cristo cucꞌ ri e aj wach re riglesia y conoje ri hermanos wara Jerusalem, cakaya pan rutzil wach alak hermanos, ri cꞌo alak chupa ri tinamit Antioquía y pa tak ri tinamit re Siria y re Cilicia. Cakatzꞌibaj cꞌu che ralak, ri na alak ta aj judiꞌab yey cojom alak rubiꞌ ri Cristo.
24 Riꞌoj katom e cꞌo jujun ebelinak chikaxoꞌl riꞌoj, tob na oj ta xojtakaw bi que; yey rique quetajin che ucojic ri na utz taj pa jolom alak rucꞌ ri quichꞌaꞌtem y jecꞌulaꞌ quisachisam ri naꞌoj alak.§E cꞌo jujun ebelinak bi Jerusalem, xebopon cꞌu pa tak riglesias que tak ri na e ta aj judiꞌab yey xebequitak che ucojic ri retalil re circuncisión y che utakexic ri cojobal que raj judiꞌab.
25 Ruma cꞌu laꞌ, xojchꞌaꞌt riꞌoj chikawach puwi waꞌ, y ri xojcanaj wi e quekachaꞌ achijab y quekatak bi ucꞌ alak junam cucꞌ ri hermanos lic cꞌax quekanaꞌo, waꞌ e ri Bernabé y ri Pablo. 26 Waꞌ waꞌchijab quiyaꞌom canimaꞌ tob ne quecam ruma ri caquitzijoj rubiꞌ ri Kanimajawal Jesucristo. 27 Yey quekatak bi ri Judas y ri Silas. Chiquichiꞌ cꞌu rique cakꞌalajin wi chiwach alak ronoje wa xkatak ubiꞌxiquil che alak.
28 Ma chwach ri Santowilaj Ruxlabixel ri Dios y chikawach riꞌoj, na utz taj cakacoj juna chic ekaꞌn pawiꞌ alak, xew cꞌu chirajawaxic tak waꞌ:**Cꞌo más pixabanic takal chike konoje ri kacojom rubiꞌ ri Cristo, pachaꞌ mojcamisanic, mojelekꞌic, makaꞌan rakꞌubal chirij junok, kalokꞌoj quikꞌij kachu-kakaw, cꞌax chekanaꞌa ri jujun chic. 29 Matij alak ri icꞌowisam chi chiquiwach ri tiox;✡1 Co. 10:7, 14-18, 21 matij alak quicꞌ,✡Gn. 9:4; Lv. 17:10-16 matij alak tiꞌij que awaj xa ejitzꞌam;††We xa jitzꞌam juna awaj, riꞌ cꞌa cꞌo quicꞌ chupa. y metzꞌabej ne uwa kꞌij alak cucꞌ jujun chic na alak ta cꞌulan cucꞌ.‡‡Pa cocho tak ri tiox e cꞌo ticawex caquibiꞌtisij quib chique ri e aj tioxab chaꞌ quemacun cucꞌ, ma chiquiwach rique waꞌ cucꞌul quicꞌuꞌx tak ri tiox. We quesaj cꞌu ib alak che ronoje waꞌ,§§Xyaꞌ tak wa pixabanic chaꞌ ri cꞌacꞌ hermanos na e ta aj judiꞌab caquesaj quib che tak ri quilokꞌnimaxic ri tiox. Jecꞌulaꞌ raj judiꞌab junam cucꞌ ri na e ta aj judiꞌab quecꞌojiꞌ chi utzil chomal pa riglesia. catajin alak riꞌ che uꞌanic ri jusucꞌ.
Chila cꞌu ib alak.
30 Ecꞌu ri echaꞌtalic xquimaj bi quibe pa ri tinamit Antioquía. Ecꞌuchiriꞌ quimolom chi quichiꞌ ri quicojom rubiꞌ ri Cristo, xquiya ri carta chique.
31 Echiriꞌ ri hermanos e cꞌo Antioquía xcajilaj wa carta, lic xequiꞌcotic ma ri tzꞌibital chupa xucubaꞌ quicꞌuꞌx. 32 Ecꞌu ri Judas y ri Silas, ruma e ekꞌalajisay runaꞌoj ri Dios, lic naj xechꞌaꞌt cucꞌ ri hermanos, xequipixabaj chaꞌ lic caquichukꞌubej quib y jelaꞌ xquinimarisaj quicꞌuꞌx. 33 Xquicꞌowibej cꞌu jujun kꞌij chiriꞌ.
Tecꞌuchiriꞌ, xetak bi chi utzil chomal cuma ri hermanos chilaꞌ, chaꞌ jelaꞌ quetzelej tanchi cucꞌ ri etakayom lo que. 34 Noꞌj ri Silas xuchꞌobo utz cacanaj can chiriꞌ. 35 Ecꞌu ri Pablo y ri Bernabé xecꞌojiꞌ pa ri tinamit Antioquía. Y junam cucꞌ uqꞌuiyal cachbiꞌil, xecꞌutun chwi Ruchꞌaꞌtem ri Dios y ri Utzilaj Tzij puwi ri Kanimajawal.
Rucalaj ubenam ri Pablo che utzijoxic ri Utzilaj Tzij
36 Icꞌowinak chi cꞌu jujun kꞌij, ri Pablo xubiꞌij che ri Bernabé: «Chojtzelej tanchi cucꞌ ri quicojom rubiꞌ ri Cristo pa tak ronoje ri tinamit pa katzijom wi ri Utzilaj Tzij re ri Kanimajawal, chaꞌ quebeꞌkilaꞌ saꞌ ri quiꞌanom» xchaꞌ.
37 Yey ri Bernabé xraj cucꞌam bi ri Juan cucꞌ, waꞌ e ri cabiꞌx Marcos che. 38 Noꞌj ri Pablo na xucꞌul ta ucꞌuꞌx queꞌec ri Marcos cucꞌ, ma ri Marcos xerokꞌotaj can pa tak ri luwar re Panfilia y na erachbilam ta chi lo che ri chac.✡Hch. 13:13 39 Xebec cꞌu chunimal puwi waꞌ yey na jinta xeꞌela wi ri quichꞌaꞌtem chiquiwach. Ruma cꞌu riꞌ, ri Pablo y ri Bernabé xquijach bi quib. Ri Bernabé xucꞌam bi ri Marcos rucꞌ. Xebec cꞌu pa barco y xebopon pa ri isla Chipre.
40 Yey ri Pablo xuchaꞌ bi ri Silas chaꞌ carachbilaj bi che rubenam. Ecꞌu ri hermanos e cꞌo Antioquía xquiꞌan orar y xquitzꞌonoj bi ri unimal rutzil ucꞌuꞌx ri Dios paquiwiꞌ; tecꞌuchiriꞌ, xquimaj bi quibe. 41 Xebicꞌow cꞌu pa tak ri luwar re Siria y re Cilicia, caquinimarisaj can quicꞌuꞌx ri caquimol quib pa rubiꞌ ri Cristo pa tak ri tinamit.
*15:11 Na jinta junok curik ri colobetajic xa ruma cutakej takanic. Ef. 2:8-9
†15:14 Ri nabe laj echiriꞌ ri Dios xutak lo ri Ruxlabixel paquiwi ri na e ta aj Israel e pa rocho ri Cornelio. Hch. 10:24-48
‡15:16 Waꞌ e jun cꞌambal naꞌoj. Queꞌelawi ri Dios cucoj jun nimalaj takanel pucꞌaxel ri rey David, waꞌ e ri Kanimajawal Jesucristo.
§15:24 E cꞌo jujun ebelinak bi Jerusalem, xebopon cꞌu pa tak riglesias que tak ri na e ta aj judiꞌab yey xebequitak che ucojic ri retalil re circuncisión y che utakexic ri cojobal que raj judiꞌab.
**15:28 Cꞌo más pixabanic takal chike konoje ri kacojom rubiꞌ ri Cristo, pachaꞌ mojcamisanic, mojelekꞌic, makaꞌan rakꞌubal chirij junok, kalokꞌoj quikꞌij kachu-kakaw, cꞌax chekanaꞌa ri jujun chic.
✡15:29 Gn. 9:4; Lv. 17:10-16
††15:29 We xa jitzꞌam juna awaj, riꞌ cꞌa cꞌo quicꞌ chupa.
‡‡15:29 Pa cocho tak ri tiox e cꞌo ticawex caquibiꞌtisij quib chique ri e aj tioxab chaꞌ quemacun cucꞌ, ma chiquiwach rique waꞌ cucꞌul quicꞌuꞌx tak ri tiox.
§§15:29 Xyaꞌ tak wa pixabanic chaꞌ ri cꞌacꞌ hermanos na e ta aj judiꞌab caquesaj quib che tak ri quilokꞌnimaxic ri tiox. Jecꞌulaꞌ raj judiꞌab junam cucꞌ ri na e ta aj judiꞌab quecꞌojiꞌ chi utzil chomal pa riglesia.