3
Ri Jesús más cꞌo uwach chwa ri Moisés
1 E uwariꞌche hermanos, cambiꞌij che alak, ri yaꞌom chi ib alak pukꞌab ri Dios yey chaꞌtal lo alak ruma Rire chaꞌ queꞌcꞌola alak rucꞌ Rire chilaꞌ chicaj: Lic chꞌobo cꞌu alak puwi ri Cristo Jesús, ri Takoꞌn re ri Dios y ri Kajawal cachꞌaw pakawiꞌ chwach ri Dios. 2 Ma ri Jesús lic jusucꞌ ri xuꞌan chwach ri Dios, ri xtakaw lo re che wa chac, jelaꞌ pachaꞌ ri Moisés lic jusucꞌ xucꞌam quiwach rutinamit ri Dios.*“Xucꞌam quiwach rutinamit ri Dios”: Pa ri chꞌaꞌtem griego cubiꞌij “puwi ri Rocho Dios”. Pa ri chꞌaꞌtem griego ri chꞌaꞌtem “rocho” na xew ta e queꞌelawi “ri ja”, ma también queꞌelawi ri ejekel chupa. 3 Noꞌj ri Jesús e más cꞌo yacbal ukꞌij chwa ri Moisés, jelaꞌ pachaꞌ ri cayacaw juna ja e más cꞌo yacbal ukꞌij chwa ri ja cuyaco. 4 Ma ronoje ja ꞌanatal ruma juna achi, pero ri ꞌanayom re ronoje ri cꞌolic e ri Dios. 5 Ri Moisés e jun aj chac lic jusucꞌ ma xucꞌam quiwach chi utz rutinamit ri Dios yey xutzijoj puwi ri cukꞌalajisaj na ri Dios chikawach apanok. 6 Noꞌj ri Cristo na xa ta e jun raj chac ri Dios, ma e Ucꞌajol y ruma waꞌ catakan puwi ri Rocho Dios. Yey ri Rocho Dios e riꞌoj oj utinamit, we e laꞌ lic tiquil chi utz ri cubulibal kacꞌuꞌx rucꞌ y rucꞌ quiꞌcotemal koyeꞌem ri cuya ri Dios chike chikawach apanok.
Ri uxlanem cayaꞌtaj che rutinamit ri Dios
7 E uwariꞌche, ri Santowilaj Ruxlabixel ri Dios cubiꞌij che alak:
We quita riꞌix wakꞌij ora
janipa ri cubiꞌij ri Dios chiwe,
8 miꞌan co che ri iwanimaꞌ
jelaꞌ pachaꞌ ri xquiꞌan ri tinamit ojertan
echiriꞌ xquiꞌan quititzꞌitiquil
y xquicꞌam upa ri Dios chupa ri luwar catzꞌintzꞌotic.
9 Ruma waꞌ ri Dios xubiꞌij chique:
Chilaꞌ cꞌu riꞌ, riwatiꞌ-imam xquitij wi nukꞌij
y xquicꞌam nupa,
tob ne pa cuarenta junab xquil ronoje
ri cꞌutubal re ri nuchukꞌab xinꞌan Riꞌin chiquiwach.
10 Ruma cꞌu ri xquiꞌano, lic xpe woyowal chiquij
y jewaꞌ ximbiꞌij:
“Rique xaki na tiquil ta chi utz ri canimaꞌ
y na xcaj taj caquetaꞌmaj ri nube.”
11 E uwariꞌche, ruma woyowal lic xinjiquibaꞌ uwach:
“Rique na queboc ta cꞌana pa ri uxlanem canya Riꞌin.”†“Ri uxlanem canya Riꞌin”: Waꞌ e queꞌelawi, ri e aj Israel ri xebeꞌjekela pa ri luwar ubiꞌtisim ri Dios chique, e xebuxlan che tak ri cꞌaxcꞌobic xquicꞌowibej Egipto y che tak ri luwar catzꞌintzꞌotic pa xebin wi cuarenta junab y che ri chꞌaꞌoj xquiꞌano pa tak xebicꞌow wi. Sal. 95:7-11
12 Tape cꞌu alak hermanos, lic chajij ib alak chaꞌ na jinta junok che alak cuꞌan itzel ucꞌuꞌx y na cucoj ta chi utzij ri Dios y jecꞌulaꞌ caresaj rib chirij ri Dios cꞌaslic. 13 E ri ꞌana alak e lic pixabaj ib alak chiwach alak ronoje kꞌij, xalokꞌ cꞌa cꞌo pakꞌab alak caꞌan alak waꞌ, chaꞌ na jinta junok che alak cuꞌan co che ri ranimaꞌ ruma ri socosoꞌnic re ri mac. 14 Ma riꞌoj ꞌanom xa jun chike rucꞌ ri Cristo we e laꞌ e tiquil chi utz ri cubulibal kacꞌuꞌx rucꞌ Rire; ecꞌu pachaꞌ xkajekebej lok echiriꞌ xkacoj rubiꞌ, jecꞌulaꞌ chirajawaxic cakaqꞌuisbej wi. 15 Ruma cꞌu waꞌ, ri Dios cuya wa pixabanic:
We quita riꞌix wakꞌij ora
janipa ri cubiꞌij ri Dios chiwe,
miꞌan co che ri iwanimaꞌ
jelaꞌ pachaꞌ ri xquiꞌan ri tinamit ojertan
echiriꞌ xquiꞌan quititzꞌitiquil Sal. 95:7-8
cachaꞌ.
16 ¿China cꞌu ri xetaw re rukul ri Dios yey tecꞌuchiriꞌ xquipetisaj royowal rucꞌ ri quititzꞌitiquil? ¿Na e ta neba conoje ri xeberesaj lo ri Moisés chilaꞌ Egipto? 17 ¿Yey china cucꞌ xpe wi royowal ri Dios laꞌ la cuarenta junab? ¿Na e ta neba cucꞌ ri xemacun chirij? Yey ruma waꞌ xecamic y ri quicuerpos xemuk can chupa ri luwar catzꞌintzꞌotic. 18 ¿China cꞌu chique xujiquibaꞌ wi uwach ri Dios na queboc ta pa ri uxlanem cuya Rire? ¿Na e ta neba chique ri xquipalajij Rutzij Rire? 19 Lic kꞌalaj cꞌu riꞌ, na xyaꞌ ta chique rique queboc pa ri uxlanem cuya ri Dios ruma na jinta cubulibal quicꞌuꞌx rucꞌ Rire.
*3:2 “Xucꞌam quiwach rutinamit ri Dios”: Pa ri chꞌaꞌtem griego cubiꞌij “puwi ri Rocho Dios”. Pa ri chꞌaꞌtem griego ri chꞌaꞌtem “rocho” na xew ta e queꞌelawi “ri ja”, ma también queꞌelawi ri ejekel chupa.
†3:11 “Ri uxlanem canya Riꞌin”: Waꞌ e queꞌelawi, ri e aj Israel ri xebeꞌjekela pa ri luwar ubiꞌtisim ri Dios chique, e xebuxlan che tak ri cꞌaxcꞌobic xquicꞌowibej Egipto y che tak ri luwar catzꞌintzꞌotic pa xebin wi cuarenta junab y che ri chꞌaꞌoj xquiꞌano pa tak xebicꞌow wi.