8
Ri cꞌacꞌ tzij
1 Ecꞌu rucꞌuꞌxibal wa cojtajin che ubiꞌxiquil e waꞌ: Cꞌo ri Jun cachꞌaw pakawiꞌ chwach ri Dios, waꞌ e ri Kajawal, ri xtzꞌuyiꞌ pa ri luwar lic cꞌo uwach puwiquikꞌab ri Dios, ri Nimalaj Takanel chilaꞌ chicaj. 2 Cachꞌaw cꞌu pakawiꞌ chupa ri sakil Rocho Dios chilaꞌ chicaj; yey waꞌ e ri Dios Kajawxel xꞌanaw re, na juna achi taj.
3 Conoje cꞌu ri cajawal raj chacunel pa Rocho Dios xecojic chaꞌ caquiya chwach raltar ri kasaꞌn y rawaj quecamisaxic. Jecꞌulaꞌ chirajawaxic cꞌo cuya ri Kajawal chwach ri Dios. 4 We ta cꞌa cꞌo ri Jesús che ruwachulew, riꞌ na aj ta chacunel pa Rocho Dios, ma wara cꞌa e cꞌo aj chacunel caquikꞌatisaj ri kasaꞌn chwach ri Dios pachaꞌ ri cubiꞌij ri takanic tzꞌibital can ruma ri Moisés. 5 Yey ri chac caquiꞌan rique, xa e ucꞌaxwach y cꞌutubal re ri caꞌan chilaꞌ chicaj. Ma echiriꞌ xtak che ri Moisés cuyac ri Rocho Dios xa caquiric, jewaꞌ xubiꞌij ri Dios che:
Chawilapeꞌ, ri wocho cayaco, e chaꞌana ronoje che
jelaꞌ pachaꞌ ri xincꞌut chawach chwa wa juyub Éx. 25:40
xchaꞌ.
6 Noꞌj woꞌora ruchac ri Kajawal más utz chwa ri quichac raj chacunel pa Rocho Dios, ma ruma Rire ri Dios xuꞌan jun cꞌacꞌ tzij kucꞌ riꞌoj. Yey chupa wa tzij cꞌo biꞌtisinic más chom chwa ri re ojertan. 7 We ta ecꞌu laꞌ lic tzꞌakat xel ri nabe tzij,*Wa nabe tzij e ri xuꞌan ri Dios cucꞌ rutinamit Israel chwa ri juyub Sinaí. riꞌ pakatzij wi na cajawax tane juna cꞌacꞌ tzij. 8 Ma ri Dios xuya wa pixabanic chique rutinamit, jewaꞌ xubiꞌij:
¡Chitapeꞌ! cacha ri Dios Kajawxel.
Copon na ri kꞌij echiriꞌ Riꞌin canꞌan jun cꞌacꞌ tzij
cucꞌ ri tinamit e aj Israel y cucꞌ ri tinamit e aj Judá.†Chwi lo ri takanic re ri Salomón, xquijach quib rutinamit ri Dios. Xebuꞌan queb; jun cabiꞌx “Israel” che y ri jun chic, “Judá”.
9 Yey waꞌ na je ta laꞌ pachaꞌ ri tzij xinꞌan cucꞌ ri quichu-quikaw ojertan
echiriꞌ nuchapom che ri quikꞌab, xebenuwesaj lo Egipto.
Pero rique na xquitakej ta ri tzij xinꞌan cucꞌ;
ruma cꞌu riꞌ, xebenuya canok, cacha ri Dios Kajawxel.
10 Qꞌuisbal cꞌu re tak laꞌ la kꞌij,
e tzij waꞌ canꞌan cucꞌ ri tinamit Israel, cubiꞌij ri Dios Kajawxel:
Cancoj ri nutzijpixab pa quijolom
y cantzꞌibaj pa canimaꞌ.
Ecꞌu Riꞌin quinuꞌan in qui Dios y rique quebuꞌan e nutinamit.
11 Yey na cajawax ta nenareꞌ cꞌo junok quebupixabaj
ri rachbiꞌil y ri ratz-uchakꞌ,
jewaꞌ cubiꞌij chique: “Chawetaꞌmaj uwach ri Dios Kajawxel.”
Ma chupa laꞌ la kꞌij conoje quetaꞌam nuwach Riꞌin,
chinimaꞌk chichꞌutiꞌk.
12 Cancuy cꞌu quimac
y na cacꞌun ta chi ne cꞌana chinucꞌuꞌx ri na utz taj xquiꞌano Jer. 31:31-34
xchaꞌ. 13 Echiriꞌ cabiꞌx “cꞌacꞌ tzij”, e queꞌelawi cꞌo jun kꞌij ri nabe xa quicꞌowic, ma janipa tak ri cuꞌan kꞌeꞌl y na jinta chi uchac, riꞌ catajin usachic uwach.