4
Ri cꞌambal upa ri Jesús
(Mr. 1:12-13; Lc. 4:1-13)
1 Tecꞌuchiriꞌ, ri Jesús xcꞌam bi ruma ri Ruxlabixel ri Dios pa jun luwar catzꞌintzꞌotic chaꞌ cacꞌam upa ruma ritzel winak. 2 Ri Jesús xcꞌojiꞌ chilaꞌ yey cuarenta kꞌij y cuarenta akꞌab cꞌu riꞌ na jinta cꞌo xutijo. Qꞌuisbal re waꞌ xpe numic che.
3 Xkib cꞌu ritzel winak rucꞌ ri Jesús re cucꞌam upa chaꞌ catzak pa mac, jewaꞌ xubiꞌij che:
—We katzij at Ucꞌajol ri Dios, chat-takan che chaꞌ tak waꞌbaj cuꞌan wa —xchaꞌ.
4 Ri Jesús xucꞌul uwach:
—Jewaꞌ tzꞌibital can chupa Rutzij Upixab ri Dios:
Na xew ta ruma ri wa e cꞌas ri ticawex,
ma e cꞌaslic ruma ronoje tak chꞌaꞌtem quel lo puchiꞌ ri Dios Dt. 8:3
—xchaꞌ.
5 Ecꞌuchiriꞌ, ritzel winak xucꞌam bi pa ri santowilaj tinamit Jerusalem cꞌa chicaj che ruwi ri Rocho Dios. 6 Xubiꞌij cꞌu che:
—We katzij at Ucꞌajol ri Dios, chacꞌaka bi awib cꞌa chuꞌlew y na jinta cꞌo cacꞌulumaj, ma jewaꞌ tzꞌibital can chupa Rutzij Upixab ri Dios:
Ri Dios quebutak lo ru ángeles awucꞌ
chaꞌ catquichajij.
Catquichap cꞌu rucꞌ ri quikꞌab
chaꞌ na caꞌchika ta rawakan che juna abaj Sal. 91:11-12
—xchaꞌ.
7 Ri Jesús xucꞌul uwach:
—Jewaꞌ tzꞌibital can chupa Rutzij Upixab ri Dios:
Macꞌam upa ri Dios Kajawxel*Na utz taj camin uwach ri Dios chaꞌ cucꞌut ruchukꞌab. Dt. 6:16
—xchaꞌ.
8 Ecꞌuchiriꞌ, ritzel winak xucꞌam tanchi ubi ri Jesús chutzaꞌm jun nimalaj juyub y xucꞌut cꞌu chwach, ronoje ri takanic caꞌan puwi tak ri tinamit che ruwachulew rucꞌ ronoje ruchomalil tak waꞌ. 9 Xubiꞌij cꞌu che:
—Ronoje tak waꞌ canya pakꞌab we caxucubaꞌ awib chinuwach y calokꞌnimaj nukꞌij —xchaꞌ.
10 Ecꞌu ri Jesús xubiꞌij che:
—Chatela chinuwach Satanás, ma jewaꞌ tzꞌibital can chupa Rutzij Upixab ri Dios:
Lic chalokꞌnimaj ukꞌij ri Dios Kajawxel
y xew Rire chanimaj ukꞌij Dt. 6:13
—xchaꞌ.
11 Ecꞌu ritzel winak xuya can ri Jesús y xel bi chiriꞌ. Xecꞌun cꞌu lo jujun ángeles y xquijeko caquinimaj ri Jesús.
Ri Jesús cujek cacꞌutun chwi rutakanic ri Dios
(Mr. 1:14-15; Lc. 4:14-15)
12 Ri Jesús, echiriꞌ xuto cꞌo ri Juan pa cárcel, xeꞌec tanchi Galilea. 13 Xel bi pa ri tinamit Nazaret y xeꞌjekela pa ri tinamit Capernaúm. Waꞌ jun tinamit cꞌo chuchiꞌ ri mar pa ri luwar re Zabulón y re Neftalí. 14 Xuꞌan cꞌu waꞌ chaꞌ e cuꞌana janipa rutzꞌibam can ri kꞌalajisanel Isaías echiriꞌ xubiꞌij:
15 Pa ri luwar re Zabulón y re Neftalí,
ri cꞌo pa rubeyal ri mar,
chꞌaka yaꞌ che ri nimayaꞌ Jordán,
pa tak ri luwar re Galilea pa ejekel wi
uqꞌuiyal winak na e ta aj judiꞌab;
16 ri ticawex ejekel pa kꞌekuꞌm xquil ri Kꞌijsak
yey ri ejekel pa ri kꞌekuꞌm re camic,
xwon ri Kꞌijsak paquiwiꞌ Is. 9:1-2
xchaꞌ.
17 Chwi cꞌu lo riꞌ xujek ri Jesús catzijonic, jewaꞌ cubiꞌij: «Tzelej tzij alak chwach ri Dios, ma rutakanic ri Dios petinak chilaꞌ chicaj lic xa nakaj chi cꞌo wulok» cachaꞌ.
Ri Jesús quebusiqꞌuij cajib e aj chapal car
(Mr. 1:16-20; Lc. 5:10-11)
18 Echiriꞌ cabin ri Jesús chuchiꞌ ri mar re Galilea, xril pan quiwach queb achijab quichakꞌ quib, jun Simón rubiꞌ (Pedro quecha che) y ri jun chic Andrés rubiꞌ. Rique e aj chapal car, yey e riꞌ quetajin che ucꞌakic ri qui atarraya pa ri mar.
19 Ecꞌu ri Jesús xubiꞌij chique:
—Chixpetok, chixterej lo chwij, y riꞌin canꞌan chiwe ix aj molol ticawex,†“Ix aj molol ticawex”: Ri chac xyaꞌ chique e quequitzucuj ticawex re quebuꞌan utijoꞌn ri Jesús. jelaꞌ pachaꞌ iꞌanom lo chique ri car —xcha chique. 20 Y na jampatana xquiya can ri qui atarraya y xeterej bi chirij ri Jesús.
21 Xbin cꞌu pan jubikꞌ chic y xeril chi pan queb achijab quichakꞌ quib, jun Jacobo rubiꞌ y ri jun chic Juan rubiꞌ. Wa caꞌib e ucꞌajol ri Zebedeo. Rique e cꞌo chupa jun barco junam rucꞌ ri quikaw y quetajin che ucꞌojoxic ri qui atarraya. Ecꞌu ri Jesús xebusiqꞌuij bi. 22 Y na jampatana rique xquiya can ri quibarco y ri quikaw, y xeterej cꞌu bi chirij ri Jesús.
Ri Jesús cacꞌutun chiquiwach uqꞌuiyal winak y lic e qꞌui ri quebucunaj
23 Ri Jesús xicꞌow che ronoje tinamit re Galilea. Cacꞌutun pa tak sinagogas chujujunal tinamit, cutzijoj ri Utzilaj Tzij re rutakanic ri Dios y cucunaj ronoje uwach yabil cꞌo chique ri winak.
24 Conoje ri e cꞌo pa tak ri tinamit re Siria xquetaꞌmaj tak ri cuꞌan ri Jesús. Xequicꞌam cꞌu lo chwach Rire conoje ri ticawex rucꞌ tak uqꞌuiyal cꞌaxcꞌolil. Waꞌ e ri e cꞌo pa yabil, ri cꞌax quicꞌulumam, ri e cꞌo paquikꞌab itzel uxlabixel, ri quebumaj tew y ri e sic. Ecꞌu ri Jesús xebucunaj conoje.
25 Lic e qꞌui cꞌu ri xeterej bi chirij. Waꞌ e petinak Jerusalem y che jujun chic luwar re Judea, cucꞌ ri e petinak pa tak ri tinamit re Galilea, re Decápolis y che jujun chic tinamit e cꞌo chꞌaka yaꞌ che ri nimayaꞌ Jordán.