15
Ri ángeles caquicꞌam lo wukub cꞌaxcꞌobic
1 Xinwil jun chic nimalaj cꞌutubal chilaꞌ chicaj yey waꞌ lic na jinta cꞌana cꞌo wi: E wukub ángeles caquicꞌam lo ri wukub qꞌuisbal cꞌaxcꞌobic; yey rucꞌ waꞌ caqꞌuis wi ri royowal ri Dios.
2 Tecꞌuchiriꞌ, xinwil jun mar catzuꞌn pachaꞌ vidrio yey cawon akꞌ chupa. Conoje ri na xesocotaj ta ruma ri nimalaj itzel chicop, na xexuquiꞌ tane chwach ri jun ucꞌaxwach y na xquiya tane luwar cacoj chique ri retalil re ri rajlibal rubiꞌ ri nimalaj itzel chicop, conoje rique e tacꞌal chwi ri mar catzuꞌn pachaꞌ vidrio y cucꞌaꞌam ri qui arpa yaꞌtal chique ruma ri Dios. 3 E caquibixoj cꞌu ri bix re ri Moisés✡Éx. 15:1 ri raj chac ri Dios y caquibixoj ri bix re ri Kꞌapoj Bexex, jewaꞌ caquibiꞌij:
Lal Dios Kajawxel, ri cꞌo ronoje unimal chukꞌab pakꞌab la.
Lic nimaꞌk y lic chomilaj tak ri chac ꞌanom la,
lic jusucꞌ y lic usucꞌ ronoje ri caꞌan la,
Lal ri Takanel paquiwi tak ri tinamit.
4 ¿Cꞌo nawi junok na cuxiꞌij ta rib chiwach la, Lal Kajawal?
¿Y cꞌo nawi junok na cuyac ta ukꞌij ri biꞌ la?
Ma xew Rilal lic Lal santo.
E uwariꞌche conoje tak ri tinamit che ruwachulew
quecꞌunic y coꞌlquilokꞌnimaj kꞌij la,
ma kꞌalajisam la ri jusucꞌ kꞌatbal tzij la paquiwiꞌ
quechaꞌ.
5 Tecꞌuchiriꞌ, xinwilo echiriꞌ xtekꞌebax ri Rocho Dios chilaꞌ chicaj pa cꞌo wi ri caxa re ri tzij uꞌanom ri Dios cucꞌ rutinamit.✡Ap. 11:19 6 Chupa cꞌu ri Rocho Dios xebel lo wukub ángeles, ri yaꞌtal chique quequiya pa cꞌaxcꞌobic tak ri winak che ruwachulew. Quicojom cꞌu quikꞌuꞌ ꞌanatal rucꞌ cꞌul lino yey waꞌ lic sak y lic cawonic, yey chwa quicꞌuꞌx cojotal jun pas re oro. 7 Jun cꞌu chique ri cajib cꞌo quicꞌaslemal pachaꞌ e ángeles✡Ap. 4:6-8 xuya chique ri wukub ángeles jujun copas re oro nojinak che ri royowal ri Dios, ri na jinta utakexic rucꞌaslemal. 8 Ecꞌu ri Rocho Dios xnoj che sib ruma runimal uchomalil y ruchukꞌab ri Dios. Nabe na cꞌut quicꞌow wa wukub cꞌaxcꞌobic quicꞌamom lo ri wukub ángeles, cꞌa ecꞌuchiriꞌ utz coc junok pa ri Rocho Dios.