10
1 Cambiꞌij che alak hermanos, pakatzij wi ri lic curayij nucꞌuꞌx y ri lic cantzꞌonoj che ri Dios paquiwi ri e aj Israel e chaꞌ rique caquirik ri colobetajic. 2 Riꞌin cambiꞌij ri wilom chique: Rique lic caquitij ukꞌij quecꞌojiꞌ chi utz chwach ri Dios, pero waꞌ na caquiꞌan ta rucꞌ sakil naꞌoj. 3 Ma na cacaj taj caquimaj usucꞌ suꞌanic ri Dios cuꞌan jusucꞌ chique ri ticawex; ri cacaj e quebuꞌana jusucꞌ xa pa que rique. Y na quiyaꞌom ta cꞌu quib caꞌan jusucꞌ chique jelaꞌ pachaꞌ ri caraj ri Dios. 4 Yey ri Tzij Pixab catzꞌakat uwach rucꞌ ri Cristo; jecꞌulaꞌ china ri cacubiꞌ ucꞌuꞌx rucꞌ Rire, e caꞌan jusucꞌ che chwach ri Dios.
5 E puwi ri cuꞌana jusucꞌ ri ticawex ruma cutakej ri Tzij Pixab, jewaꞌ xutzꞌibaj ri Moisés:
China ri caꞌanaw re ronoje ri cubiꞌij ri Tzij Pixab,
riꞌ cꞌo ucꞌaslemal chwach ri Dios ruma cuꞌan waꞌ. Lv. 18:5
6 Noꞌj puwi ri cuꞌana jusucꞌ ri ticawex ruma ri cubulibal cꞌuꞌxaj, jewaꞌ cubiꞌij pa Ruchꞌaꞌtem ri Dios: «Mabiꞌij pa awanimaꞌ: ¿China cꞌu ri queꞌec cꞌa chilaꞌ chicaj✡Dt. 30:12 che ucꞌamic lo ri Cristo?» 7 O «¿China cꞌu ri cakaj cꞌa chupa ri siwan catzꞌirir upa che ucꞌamic lo ri Cristo chiquixoꞌl ri ecaminak?» 8 Na cajawax taj queꞌec junok, ma ¿saꞌ riꞌ ri cubiꞌij pa Ruchꞌaꞌtem ri Dios? Jewaꞌ cubiꞌij:
Rutzij ri Dios lic xa nakaj cꞌo wi chawe.
Cꞌo chupa rawanimaꞌ y quel lo pachiꞌ. Dt. 30:14
Ecꞌu chꞌaꞌtem waꞌ ri cakatzijoj riꞌoj puwi ri cubulibal cꞌuꞌxaj: 9 We riꞌat cakꞌalajisaj rucꞌ ruchiꞌ akul: «Ri Jesús e Wajawal» y cacoj cꞌu chupa rawanimaꞌ Rire xcꞌastaj lo ruma ri Dios chiquixoꞌl ri ecaminak, riꞌ catcolobetajic. 10 Ma pa ri kanimaꞌ cakacoj wi waꞌ chaꞌ cojuꞌan jusucꞌ chwach ri Dios; yey rucꞌ cꞌu ruchiꞌ kakul, cakakꞌalajisaj Rire e Kajawal chaꞌ jelaꞌ cojcolobetajic. 11 Ma Ruchꞌaꞌtem ri Dios jewaꞌ cubiꞌij puwi ri Cristo:
China ri cacubiꞌ ucꞌuꞌx rucꞌ, na caqꞌuixbesax taj
ma cucꞌul na ri royeꞌem che Rire Is. 49:23
cachaꞌ. 12 Echiriꞌ cubiꞌij «china», waꞌ queꞌelawi tob e aj judiꞌab o na e ta aj judiꞌab, ma xaki junam quiwach. Ma ri Kanimajawal e Cajawal que conoje, tob junwi tak ri quitinamit. Yey Rire cuya ri unimal rutzil ucꞌuꞌx chique conoje ri caquitzꞌonoj toꞌbal que che. 13 Ma Ruchꞌaꞌtem ri Dios jewaꞌ cubiꞌij:
E janipa ri caquitzꞌonoj colobetajic
chupa rubiꞌ ri Kanimajawal,
riꞌ quecolobetaj na Jl. 2:32
cachaꞌ.
14 ¿Suꞌanic cꞌu riꞌ caquitzꞌonoj colobetajic chupa rubiꞌ ri Kanimajawal we na quicojom ta rubiꞌ nabe? ¿Yey suꞌanic caquicoj rubiꞌ we na quitom ta puwi Rire? ¿Yey suꞌanic caquita ri tzijonic puwi Rire we na jinta junok catzijow re chique? 15 ¿Yey suꞌanic e cꞌo ri quetzijon puwi ri Kanimajawal we na jinta junok catakaw bi que chaꞌ caquiꞌan wa tzijonic? E pachaꞌ ri tzꞌibital can chupa Ruchꞌaꞌtem ri Dios:
¡Lic chom ri quicꞌunic ri caquicꞌam lo ri tzijonic
re ri utzil chomal,
ri quecꞌun che utzijoxic ri Utzilaj Tzij! Is. 52:7
cachaꞌ. 16 Noꞌj na conoje ta cꞌut xecojow re ri Utzilaj Tzij xtzijox chique. E pachaꞌ ri xubiꞌij can ri Isaías:
Kajawal, ¿cꞌo nawi junok cojoyom re ri katzijom chic? Is. 53:1
xchaꞌ. 17 Ri cubulibal quicꞌuꞌx ri ticawex cujeko echiriꞌ caquita ri catzijox chique; yey waꞌ wa caquito, e Ruchꞌaꞌtem ri Dios puwi ri Cristo. 18 Noꞌj cantzꞌonoj cꞌut: ¿Na xquita ta nawi ri Utzilaj Tzij? ¡Katzij, xquito! Ma e pachaꞌ ri cubiꞌij Ruchꞌaꞌtem ri Dios:
Che ronoje ruwachulew xtataj wi ri quikul
ri xetzijon puwi ri Dios;
y ri quichꞌaꞌtem oponinak pa ronoje luwar
cachaꞌ. 19 Cantzꞌonoj tanchi cꞌut: ¿Raj Israel na quetaꞌam ta nawi waꞌ? ¡Quetaꞌam! Nabe na, e pachaꞌ ri xutzꞌibaj can ri Moisés puwi ri xubiꞌij lo ri Dios chique raj Israel:
Riꞌin canꞌan chiwe cuꞌan cꞌax icꞌuꞌx
chirij jun “tinamit” na tinamit taj;
campetisaj iwoyowal chirij jun tinamit
na jinta quetaꞌam puwi ri Kꞌijsak†Chiquiwach ri e aj Israel, xew takal chique rique caquicꞌul ri rutzil ucꞌuꞌx ri Dios. Ruma waꞌ xpe coyowal echiriꞌ ri Dios xucꞌut ri rutzil ucꞌuꞌx chique tak ri tinamit che ruwachulew. Dt. 32:21
xchaꞌ. 20 Jecꞌulaꞌ, ri Isaías xuchꞌij ubiꞌxiquil ri ubiꞌim lo ri Dios paquiwi ri na e ta aj Israel:
Xinrikitaj cꞌu cuma ri na quinquitzucuj taj,
yey xinkꞌalajisaj cꞌu wib chiquiwach
ri na xinquitzꞌonobej taj Is. 65:1
xchaꞌ.
21 Noꞌj paquiwi raj Israel, jewaꞌ xubiꞌij lo ri Dios:
Lic xinelaj chique jun tinamit
e aj palajiy tzij y e titzꞌitak
chaꞌ quetzelej tanchi lo wucꞌ Is. 65:2
xchaꞌ.
✡10:6 Dt. 30:12
*10:18 Wa jun versículo re Salmos e cachꞌaꞌt chwi tak ri chꞌumil, ri caquikꞌalajisaj ruchukꞌab y ruchomalil ri Dios y quebilitaj pa ronoje luwar che ruwachulew. Jecꞌulaꞌ ri Pablo xujunimaj waꞌ rucꞌ rutzijoxic ri Utzilaj Tzij re ri Dios che ronoje ruwachulew.
†10:19 Chiquiwach ri e aj Israel, xew takal chique rique caquicꞌul ri rutzil ucꞌuꞌx ri Dios. Ruma waꞌ xpe coyowal echiriꞌ ri Dios xucꞌut ri rutzil ucꞌuꞌx chique tak ri tinamit che ruwachulew.