Nunia Moisés aints atsamunam ataksha Yuse chichamen nuiniartas Israel ainaun mash irurmiayi. Tura aints ainaun nuiniak:

—Yus iin mura Sinaí tutainum chichaman akupturmakmiaji nuka nuwaitai.

Israel ainautiram, antuktaram. Ii Yusri kichkitai. Nuka iinu Apurintai. Tura ami Yusrum ami Apuram asamtai, tuke nintimaurumjai anen ata. Tura asam tuke inaitsuk Yus nintimsam aneeta. Tura Yus ami kakarmarmijai tuke umirkata.✡ Marc 12.29, 30

Ju kintati wikia ju chichaman atumin akupaja nuka atumi ninti ukustaram. Tura kajinmatsuk atumi uchiri nu chichamka nuiniartaram. Tura jeemin pujakrumka, tura jinta wekaakurmesha, tura kanurtasrum tepakrumsha, tura kashik nantakrumsha atumi uchiri nuiniartaram, —timiayi.

Nunia ataksha Israel ainaun chicharak:

—Atum nukap yujarmintrum tura Yus atumi juuntri ainaun nungkan susatnuitjarme tímia nuni nekasrum pujusmintrum tusan, ju kintati chichaman akuptajrume nuka miatrusrumek umirkataram. Yus atumin: Miajuitjai tutsuk asataram tusa, tura nekasarash wina umirtukarat tusa atumin nekapramsamiarume. Tura itiur nintimrume tusa nekaatas, tura wina akupamurun umirtukchartimpiash tusa, aints atsamunam cuarenta (40) musach atumin ayatmas wekamtikramsamiarume. Aints aya yutanak yutanak nintimtinauka tukeka pujuschartinuitai. Antsu Yuse chichamen nintimtinauka nekasar tuke pujusartinuitai tusa, atumin tsukajai wait wajakrumin maná yuwataram tusa nintimtikramramiarume, —Moisés timiayi.✡ Mat 4.4

Nunia ataksha Israel ainaun chicharak:

—Musachjai metek atumi ajarinia juwarme nu cien (100) juukrumka, Yus diez (10) susataram, tura diez (10) juukrumka, Yus kichik susataram.✡ Mal 3.8-10

Ami yachim tura uchiram tura nawantrumsha tura nuwaram nekasam aneame nusha tura ami amikrumsha chikich Yus atsau waininayat amin chichartaminak: Iikia chikich yus umirkami turaminamtaisha, pengké anturkairap. Antsu wait anentsuk tura ni turamuringkia uurtsuk maataram. Atumea eemkaram kaya jukiram nu aintska tukutaram. Nunia chikich aints ainausha kayajai tukuarti. Aints atumin chichartamak: Yus umirtsuk asataram turamu asamtai, kayajai tukuram maataram. Nu turakrumin Israel ainau nuna antukar mash shaminak nunaka ataksha pengké turuwarchatnuitai, —Yus Moisésan tu akatar akupkamiayi.

Nunia ataksha Israel ainaun chicharak:

—Nungkan Yus atumin suramsatas wakera nuni jearam, apu ainau tura chichaman iwiarin ainau inaikiataram. Turakrumin nuka aints ainau chichamen nekasashi tusar tenapkesar nekaawartinuitai. Tura mash aints metek ainawai tusaram, ni pasé turinamuri jiisrum, nekasrum nu pasé aints ainaun achiktinuitrume. Antsu nu aintska atumin chichartamak: Wikia amin kuikian susatjame, nunia angkan pujusta tusam akuptukta tamatisha anturkairap.

Tura Yus nungkan atumin suramsatas wakera nuni jearmeka, nu nungkanmaya ainau pasé turina nuka turuwairap. Aints Yuschau waininayat ni yusrin ningki najanamun pengker awajsartas jinam ni uchirin tura nawantrincha wengkararai tusa Yus surimiawai. Tura ukunam atiniun pachisar aints ainau wakantrintin jiisar nekaatasar wakerina nuna nekaawarai tusa Yus surimiawai. Chikich nungkanmaya ainau nu pasé turamunka turinau asaramtai, atumi Yusri atumi Apuri asa, nuna turuwarai tusa pengké surimiawai, antsu pengké tunaarinchau pujustaram tusa wakerawai.✡ Mat 5.48

Yus iin chichartamak: Wikia atumi aintsrin amea nunisang wina chichamur etserin ata tusan atumin akuptuktinuitjarme. Tura wi titatja nunaka mash atumi weari ainaun ujaktinuitai. Nu atumin turamtiata nuka mash umirkataram. Yus turamji, —Moisés timiayi.✡ Hech 3.22; 7.37

Nunia ataksha Moisés Israel ainaun chicharak:

—Aints juun tunaun turamtaikia, nu aintska jakati tusar numinam nenasmawa nuka kajerkamuitai. Tura asamtai nu aintsu namangkengka kashisha tuke numinam nemaschatnuitai, antsu kintamtsaing nu aintsu namangke iwiarsatnuitai, —Moisés timiayi.✡ Juan 19.31; Gál 3.13

Nunia ataksha Israel ainaun chicharak:

—Waaka trigo neren pakartas najamtaikia, trigo páchitsuk yuwati tusaram jangkengka jingkiatawairap.✡ 1 Cor 9.9-11

Aints ni yachiijai tsanias pujak, uchin yajutmatsuk jakamtaikia, wajeri chikich aintsun pachitskeka ninumkashtinuitai. Antsu jakau yachí uchin yajutmartas wajerin nuwatkati. Tura uchin yajutmarka nuka ni yachí jakau uchiriya nunisang atinuitai, —Moisés timiayi.✡ Mat 22.24-30

Tura Yuse chichamen etsertan mash umis, Moisés mura Nebo tutainum wakamiayi. Tura nuni wakamtai, Yus Canaán nungkan mash Judá nungkan nangkamak, juun entsan jeatak wajas inaktus Moisésan chicharak:

—Au nungkanmaka ame wechamin wainiatnak aya jiista tusanak wakerukmajai. Wikia juun Abrahaman, tura Isaacan, tura Jacobon tura nuna weari ainauncha:

—Nu nungkaka atumnau ati timiaja nuka awaitai, —timiayi.

Yus tamati Yuse inatiri Moisés Yus tímia nunisang Moab nungkanam jakamiayi. Tura Yus ningki Moisésnaka iwiarsamiayi. Antsu ¿tuning iwiarsaya? tusarka aints kichkisha nekaacharminuitai.✡ Jud 9

Moisés ciento veinte (120) musach pujus jakamiayi. Timiá juuntach ayat, jii pengké kusurchau tura pimpirchau ayat jakamiayi. Moisés jakamtai, Israel ainau kichik nantu juutiarmiayi.

Iwiaku pujus Moisés tuke Yusen wainak nijai chichauyayi. Tura Yuse chichamen etserin Moisésa nuniska pengké kichkisha atsuyayi.