Hageo apu Zorobabelan tura sacerdote apuri Josuén chicharak:

—Yus timiá kakaram aa nuka atumin chichartamak: Atumi aintsri ainau chichainak: Yuse jee jeamkatin kintaka jeatsui, tina nunaka nangkamiar tinawai. Tura Yuse jeengka jeamchayatrum, atumi jeengka shiiram taujai jeamkaram pujarme. Tura asaram itiur pujaji tusaram nintimrataram, Yus turamrume.

Atumka árak nukap araayatrum jumchik juwaarme. Tura nukap yuwayatrum tuke yapararme. Tura nukap umayatrum tuke kitamakrum pujarme. Tura atumi wejmakri nuparam entsaariatrum tuke tsetsemarme. Tura atumi kuikiari pengké jeatsui. Tura asamtai ¿warukarik ai pujaji? tusaram nintimrataram.

Atumka Yuse jee jeamtsuk pujau asaram nekasrum pengkerka pujatsrume. Atum wina pengker awajtustasrum wakerakrumka yamaikia mura wakaram, numi ainau ajakrum wina jearka jeartuktaram, Yus turamrume. Atumka nukap eayatrumek ¿atum juwarme nuka warukang timiá jumchiki? tusan iniajrume. ¿Atumi jeen nuke nintimsaram pujatsrumeash?

Antsu wina jearka pachiatsrume. Tura asaram atum juwarme nuka jumchikitai. Tura wi yumi jiturchati tusan surimiau asamtai, atumi ajarin árak araamiarume nuka nereenatsui. Wi atumi Apuri asan nunasha tajarme, Yus turamrume, —Hageo Zorobabelan tura Josuéncha timiayi.

Tamati apu Zorobabel tura sacerdote Josué tura aints ainau mash Hageo chichamen antukar nintimrar Yusen umirkarmiayi. Turinamtai Yus tawai tita timiau asa, Hageo aints ainaun chicharak:

—Yus atumin chichartamak: Shamkairap. Wikia tuke atumjai pujajai turamrume, —timiayi. Tura Yus ni aintsri ainaun pengker nintimtikrau asamtai, Zorobabel tura Josuésha tura chikich aints ainausha mash ataksha Yuse jeen jeamtan nangkamawarmiayi.

Tura Yus seati juun jean jeaminak pujuinai, Yus Hageon ataksha chicharak:

—Yamaikia apu Zorobabel, tura Josuésha tura mash aints ainausha chicharkum: Atum yamai pujautirmesha nintimrataram: ¿Ya aintsua Salomón yaanchuik wina jearun nekas shiirman jeartukmia nuna wainkamia? ¿Atumsha wainkamkuram? ¿Tura jea yamai jeamu wearme nusha itiur waintrume? ¿Ju jeaka warukuita? ¿Nekas mianchawaitai tatsurmeash? Turayatrum napchauka nintimtsuk pujustaram.

Tura wi atumjai pujau asamtai, wina jearka pachitsuk jeartuktaram. Wi yaanchuik atumi juuntri ainaun Egiptonmaya jiikin timiaja nunaka ataksha tajarme: Wina Wakantruka atumjai pujau asamtai napchauka nintimtsuk asataram. Wikia jearnaka wina paaniurun engkean nekasan pengker awajsatatjai. Wikia ataksha nungkanmasha tura nayaimpinmasha aa nunaka mash muchratnuitjai.✡Heb 12.26 Kuik nungkanam ainia nuka tura kurisha mash winaruitai, Yus asan tajarme, —Yus Hageon timiayi.

Nunia Yus ataksha chichaak:

—Ju jeaka atum jeartukmarume juka chikich jear yaanchuik nekas shiiram amia nuna nangkamasang shiiram atinuitai. Tura juni angkan pengker nintimtunisrum pujustinuitrume. Wi Yus asan tajarme, —timiayi.✡Esd 5.1-2