Yus ni chichamen etserin Joel naartinun chichaman nekamtikiamia nuka nuwaitai: Joel aints ainaun chicharak:

—Juun ainautiram, tura mash aints ainautirmesha anturtuktaram. Atumi ajarin manchi ainau mash mesraru asaramtai, nu wait wajamunka atumi juuntringkia pengké wainkacharmiayi.

Nampeu aints ainautiram shintartaram. Atumi amutiri atsau asamtai juutkamaikiakrum pujustaram. Nawan aintsun ninumkatas wakerak warasiat aishri jakamtai, juutak entsatin pushun entsar, wake mesek pujawa nunisarang sacerdote ainau ni yutairi tura umutiri atsau asamtai juutinak pujuinawai. Atum aja takautiram, atumi ajari mesramu wainkaram, juutkamaikiakrum wake mesekrum pujustaram.

Sacerdote ainautiram, aints ainau untsukrum, juun ainausha mash irumrataram. Tura ijarmaram pujustaram titaram. Ii Apuri kintari jeatak wajasi. Yus nungkan yumpungtata nu kintaka jeatak wajasi, —Joel timiayi.

Nunia Yus aints ainaun ataksha chichaman akuptak:

—Antsu yamaikia nintimjai tuke wina pengker nintimtursataram. Atumka yutsuk pujusrum, tura juutkamaikiakrum pujusrum wina untsurkataram turamrume. Ii Apuri tuke wait anengkratin asa, tura jaimias ni aintsri ainaun tuke aneau asa, wait wajaktiniun wi akupkatatjai tímia nunaka inaisatnuitai. Tura asamtai tunaarum inaisaram atumi Yusri umirkataram, —timiayi.

Nunia Yus Joelan ataksha chicharak:

—Nungka amukatin jeatak wajamtai, mash aints ainamunam yumi yaranua nunisnak wina Wakantrunka akupkatnuitjai. Tura asamtai atumi uchirisha tura atumi nawantrisha wina chichamrun etseriartinuitai. Nuniasha atumi juuntri wina pachitsar karamrurartinuitai. Tura natsa ainausha ni jiijaingkia winaka waitinachu wainiatnak, paan nintimtikrartinuitjai. Tura wina inatir aishmang ainauncha tura nuwa ainauncha wina Wakantrunka akuptukartinuitjai. Tura yakí nayaimpinmayan shamrumtinun inakmastinuitjai. Tura nungkanmasha wainchati takatnaka inakmastinuitjai. Aints maaniamunam numpan nukap wainkartinuitai. Tura jisha nukap keenaun wainkartinuitai. Nunia mukunit nungkanam nukap atinuitai. Tsaasha tsawai wainiat kajintratnuitai. Tura nantuncha numpa tumaun keaun wainkartinuitai. Nunia wina paaniurjai tura wina kakarmarjai nu kintaka jeatnuitai. Antsu wina naarun pachitsar seatin ainauka uwemrartin ainawai, —Yus tawai tusa Joel aarmiayi.✡Hech 2.16-21