Nunia Jeremías chikich papin aarmiayi. Nu aarmauka nuwaitai:

Wikia Yuse suwirin wainkau asan, nukap wait wajayajai. Yus wina: Teenam pujuinawa nunismek pujusta tusa umatmiayi. Kintajai metek ni uwejejai wina shitatua nunisnak nekapmamramiajai. Wina namangkruncha tura wina nuwapruncha weamtikrurmiayi. Tura asan kunchrun kupirtukua nunisnak nekapmamramiajai. Yus winaka wenurmaunum pengké jiinkichminnum pujtusmiayi. Turamtai wenurmaunum wikia wait wajakun wake mesekan pujuyajai. Tura asan jakawa nunisnak tsaancha waintsuk pujuyajai. Tura jiru mermajai jingkiatawarmia nunisnak nekapmamramiajai. Tura wikia yainkata tamaitiat Yuska pachitsachmiayi. Antsu kaya wenurmaunum pujusta tusa winaka metruamiayi. Juun yawaa anumak aints ainaun nakawa nunisarang aints ainauka winaka nakarsarmiayi. Tura asaramtai nukap shamakun pujumiajai. Aints ainau tishimkujai nangkamiar ijumi tusar, tatangkan nujkar ijuinawa nunisang: Ame tatangka nunismek ata tusa Apurka wina pujtusmiayi. Tura asamtai aints nangkijai ijumua nunisnak wisha nekapmamramiajai.

Kintajai metek wina aintsur ainau wishikrurarmiayi. Tura asamtai umutin yapaun umawa nunisnak wikia nekapmamramiajai. Tumamtai wina Yusur wake mesektinun nintimtikrurmiayi. Tura Yus tsangkamruku asamtai, nungka tsetseri apaati tusar nungkanam ajuntrarmiayi. Wikia angkan nintimsar pujustinnaka tura warastinnasha kajinmakmiajai.

Yaanchuikia Yus nekasampi wina uwemtikrurtatua tu nintimsan pujuyajai. Antsu yamaikia nu nintimtairunka kajinmaran pujajai. Wikia wake mesekmauruncha, tura wait wajakmauruncha tura wiki pujusmauruncha aneakjai. Tura nuna nintimran napchau nekapeajai.

Antsu kichkinak nintimratasan wakerajai. Nuna nintimran pengker nintimsan pujustinuitjai. Yuse wait anengkratairi pengké amukashtinuitai. Tura ni pengker awajkartutirisha nangkankashtinuitai. Yuse pengker awajkartutiringkia kintajai metek yamarmaitai. Yus nekas juuntapita. Tura asa iinka ajapramangka pengké ukurmakchatnuitji tajai. Tura wiki nintimsanak: Wi yuumamurnaka Apurka mash surustinuitai. Tura asamtai niin tuke nintimsan pujajai. Ii Apuri niin nintimtusar pujuinautinka pengker awajtamsatnuitji. Iikia takamtaik pujusar: Ii Apuri iin yainmakti tusar nakastin nekas timiá pengkeraitai.

Natsaka juun wajatsuk Yusen umirkatnuka timiá pengkeraitai. Yus aintsun: Amek pujusam wina nintimtursata tamati, nu aintska ningki pujus chichatsuk Yusen nintimratnuitai. Tura mianchawaitjai tusa, Yus wina wait anentrurchatpiash tusa, nungka tsetseri antitnak nu aintska tsuntsumruatnuitai. Tura yapiin awatiartas wakerinamsha nu natsaka yapirun awatiti tusa tsangkamkatnuitai.✡Mat 5.39; 26.67

Ii Apuringkia iincha tuke ajapramangka ukurmakchatnuitji. Ni wait anengkratairingkia pengké amukachmin asamtai, iin wait wajaktiniun suramsayat tuke wait anentramratnuitji. Yuska nekas aintsti ainautin wait wajaktinaka suramtanka nakitawai.

Ii Yusri tu ati tusa, nuná eemak wakerau asamtai, aints ainautikia chichaaji tura ii turamuring turaji. Yus wakerau asamtai, pengker ainia nuka tura pasé ainia nusha wainkatnuitji.

Aints ainauti tunaarintin ayatrik ¿warukarik iikia nangkamrik timiá wait wajaji tajik? Ii pujutri itiurak ata tusar tenapkesar nintimrarmi. Turar ii Apuri umirkarmi. Turar ii Yusri nayaimpinam puja nusha nintimsar nukap searmi. Ii tunau nintimtairisha tura ii pasé turutirisha tsangkukratkata tiarmi.

Wina aneetir yaktarun Jerusalénkan mesramun nintimsan juutkamaikiakun pujajai. Ii Apuri nu yaktanmaya ainau wait wajakmauri nuke ati tutsuk pujamtaikia, wikia tuke inangnatsuk juutkun pujajai. Wina yaktarnia nuwa ainaun timiá pasé awajsaru asaramtai, wina nintirsha najamrutawai. Aints nanamtiniun tukutasar eainawa nunisarang nangkamiar wina eatkarmiayi. Tura nungka taimunam wina engketawar, nunia kaya juunjai tekturkarmiayi. Wikia aints entsanam jakeawa nunisnak nintimsan jakatatjapi tu nintimnuyajai.

Apuru, nungka taimunam pujusan amincha untsukmiajme. Tura wi untsummatai wina chichamur anturtukam amesha winitrimiame. Tura shamkaip tusam Apuru, wina uwemtikrurmiame. Jeremías nu chichaman aarmiayi.