1 Apuru ¿waruka timiá aráksha pujame? ¿Wi wait wajaisha waruka anumkamsha pujame? 2 Pasé aints ainau:

Wikia miajuitjai tusar,

mianchau ainaun kajerinak waitkinawai.

Tura ejatkan ningki puusar napinawa nunisarang ainawai.

3 Pasé aints ainauka ningki nintimsar:

Wi wakeraknaka wina wakeramurun pachitsuk turamnawaitjai tinawai.

Tu nintiminauka Yusen nakitinau asar,

niin pachisar pasé chichainawai.

4 Tura meemasar pajakiar chichainak:

Yuska atsawai.

Turasha ameka waruka aitkame turutinka atsawai,

tu nintiminawai.✡Sal 14.1

5 Tu nintiminauka tuke ni takatrin takakminau asar yuumatsuk pujuinawai.

Tura ningki nintimsar:

Wait wajaktinnasha Yuska suruschatatui,

nangkamiar tinawai.

Nuniasha ni nemase ainaun pachisar wishikinawai.

6 Tura ningki nintimtumasar:

“Wina nemasur ainauka ujuntrarchatnuitai.

Tura asamtai itiurkachminumka pengké pujuschatatjai”,

tinawai.

7 Tuke inaitsuk chikich ainaun jiyainak pasé chicharin ainawai.

Tura waitrinak chikich ainaun pasé awajsartas anangkinak chichainawai.

Tu chichainau asar chikich ainaun waitkinak pasé awajinawai.✡Rom 3.13-18

8 Nu pasé aints ainauka ayamrumichun nangkamiar maawartas anumkar,

yaktanmaya jiinkiti tusar nakainawai.

9 Juun yawaa kuntinun esai yuwatas waanam nakawa nunisang mangkartin anumak aints mianchaun nakawai.

Tura wainak aneachmau nu aintsun achik japiki juwawai.

10 Juun yawaa tsekengtias kaemua nunisang mangkartin aints ayamrumichun achiawai.

11 Pasé aints ainauka:

Yuska iinka nintimturmatsji.

Tura ni yapiin nukuku asa pengké wainmatsui,

tu nintiminawai.✡Sal 73.11

12 Apuru wajakim uwejem yakí takuim ami aintsrum ainau ayamrukta.

Tura aints wait wajainauka kajinmakiip.

13 Yusru ¿warukaya pasé aints ainau amin pachitmasar pasé chichainawa?

¿Waruka ningki nintimsar:

Yuska pachitmatsji tumaminawa?

14 Antsu ameka nu aints ainau pasé turamuri wainkau asam,

nekasam ni wait wajaktintri suwitme.

Tura asakmin ayamrumichu ainauka aminak eatminawai.

Tura mitaik ainau yainmeka ametme.

15 Ame pasé aints ainau kakarmari nepetkata.

Tura ni anumkar tunau turamurin pachisar mash uutsuk ujatkarti tusam chicharkata.

16 Apuru ii Yusri asam,

aints ainautin tuke inakratnuitme.

Tura asam amin umirtamkacharu ainau tuke ninu nungkarinia jiiktinuitme.

17 Apuru mianchau ainau seamuri antu weame.

Tura ni untsumauri antukam,

pengker nintimtakum yayaame.

18 Apuru mitaik wait wajainausha ayamrukta.

Tura aints ainau nungka najanamu asaramtai,

chikich ainaun waitkawarai tusam suritkata.