1 Apuru wina chichamur nekas aa nu anturtukta.

Tura wi untsuamka amesha airkata.

Wikia waitrichu asamtai,

wi seamur anturtukta.

2 Ame nekasam pengker aa nu nekau asam,

wina tunaar amataikia,

wait wajaktin surustasam wakerakmeka nusha turata.

3-4 Wina nintimaur ainia nuka nekawaitme.

Kashisha wina waitkatasam tarutnuyame.

Tura tunaari atsuash tusam nekaprakmesha tunaaruka atsau waitnuyame.

Chikich aints ainau chicham achamnaun chichaina nunisnaka chichachuyajai.

Tura ami chichamem aarmaun umiakun,

pasé aints ainau maanitan wakerin ainia nunisnaka turichuyajai.✡Sal 139.23

5 Ami jintim nekas aa nuni amaktinuyajai.

Turasha aints ainau:

Nu jintanmaka wekaatsuk asata,

turutinau wainiatun pengké pachichuyajai.✡Mat 7.13-14

6 Yusru ame wina airkata tusan amin untsuajme.

Wait aneasam wina chichamrusha anturtukam airkata.

7 Aints: Wina nemasur ainamunam ami kakarmarmijai winasha ayamrutkata turaminauka ami anengkratairum nekamtikiata.

8-9 Aints ni jiin tenap wainina nunismek winasha waitkata.

Turakum pasé aints ainau wina jiiru pujuinauka nepetkam waitkata.

Wina nemasur ainau wina tentatkar mantuwartas wakerina nu nepetkam ayamtikrurta.

10 Nu aints ainauka pasé chichainawai.

Tura ningki nintimtumasar:

Wikia miajuitjai tumaminawai.

11 Tura wi wekaamtai arakchichu nemartinawai.

Nunia nungká ujuarmi tusar nakarinawai.

12 Nu aints ainau juun yawaaya nunisarang ainawai.

Tura juun yawaa kajewa nunisarang asar,

anumkar ni nanchikijai kuntinun achikiartas nakainawa nunisarang aints ainaun nakainawai.

13 Apuru wajakim nu aints ainaujai ingkiunikiam tikishmamtikiawarta.

Nu aints ainau nepetkarai tusam,

ami nangkirmijai papeekam uwemtikrurta.

14 Apuru ami kakarmarmijai nu aints ainamunmaya angkanmamtikruata.

Nu aints ainauka ju nungkanam ainia nuna wakerinak nunak nintimtinawai.

Tura asaramtai kuikiartin wajasarti,

tura ni uchiri yutan yuwinak ampuje pujakarti,

tura ni tirangki ainausha ni ampirmaurin yuwaarti tusam tsangkatkata.

15 Antsu wikia nekasan yapimin wainkatasan wakerajai.

Tura kintajai metek shintaran amijai ingkiunikian nekasan maaketai titatjame.✡Ap 22.2-4