1 Wina Apurka wina paantruitai.

Tura wina uwemtikrurtinuitai.

Tura asamtai ¿yanak shamkataj?

Wina Apurka wina ayamrutkatin asamtai ¿warinak shamkataj?

2 Pasé aints ainauka wina nakitruraru asar,

wina mesturartas tura mantuwartas wakerutinawai.

Turinayat tukumkar ayainawa nunisarang ainawai.

3 Suntar untsuri mesetan najanawartas kaunkar,

wina tententawarun wainiatnak,

wina nintirka kurarchatnuitai.

Antsu angkan napchauka nintimtsuk pujustinuitjai.

4 Wina Apurnaka kichkinak seayajai.

Tura wi seayaja nuka nuwaitai:

Iwiaaku pujaknaka wikia aints Yuse jeen pujawa nunisnak kintajai metek Yusen maaketai titasan,

tura ni pengkerin wainkatasan

tuke wakerajai.✡Sal 23.6

5 Itiurkachminum pujamtaisha wina Apurka winaka ejarkatnuitai.

Tura ni jeen jeamtaisha winaka pengker nintimtursatnuitai.

Wina Apurka tuke pujú asa,

pampa nunisketai.

Tumau asamtai wikia Apurun nintimsan aints pampanam yakí wajawa nunisnak uwemran angkan pujustinuitjai.

6 Tu nintimsan pujaknaka,

wina nemasur ainau wina

tententawaru wainiatnak shamtsuk pangkain jiistinuitjai.

Tura asan Yuse jeen jean,

Yusen maaketai titasan

tangkun maan epeatnuitjai.

Tura warasan wina Apurun kantan kantamruatnuitjai.

7 Apuru amin untsuajme.

Anturtukta.

Wait anentruram airkata.

8 Apurun eaktaj tu nintimran,

wikia nekasan wina nintirjai amin tuke eajme.

9 Apuru wait aneasam anumrutkaip turasha kajertukaip.

Ameketme wina yainkatnumka.

Wina Yusur asam,

tura wina uwemtikrurtin asam,

ajapruam ukurkiip.

10 Wina apar tura wina nukursha ukurkiaramtaisha,

ame wina Apur asam,

winaka ajapruamka pengké ukurkishtinuitme.

11 Apuru jintim inaktursata.

Wina nemasur ainau eatinau asaramtai,

jintim nekas pengker aa nuni wekaasata tusam nekaprutata.

12 Tsanukratin ainau nangkamiar wina pachitsar wait chichaman chichartinau asaramtai,

wina nemasur ainau ni wakeramurin najaninak,

wina mesturarai tusam tsangkamrukaip.

13 Antsu wikia iwiaaku pujaknaka,

Apuru ami pengkeerumin nekasnapi wainkatnuitja tusan nekajai.

14 Tura asan mash aints ainautirmin tajarme:

Atumsha Apuram nintimtustaram.

Tura kakartaram,

turasha atsantrataram.

Nekasan tajarme:

Apuram nintimtustaram.