49
Kuikiaka itiurtukchatnuitai
1-2 Mash nungkanam pujuinautiram,
kuikiartin ainautiram tura kuikiartichu ainautirmesha,
nunia miajuitjai tumamin ainautiram tura mianchau ainautirmesha,
ju chichamka tenapkesrum antuktaram.
3 Yamaikia Yuse nekamtairin pachisan chicham yumtin ainaun nekamtikiatjarme.
4 Kitarran tuntuikiamaikiakun chichaman nekaachminun kantamkun nekamtikiatjarme.
5 Pasé kinta jeamtaisha,
tura wina nemasur ainau tentatkaramtaisha ¿warukanak shamkataj? 6 Nu aints ainauka ni kuikiarin nintimsar:
Wikia yuumakchatatjai tinawai.
Nuniasha wikia nukap warinchurtinuitjai tumaminawai.
7 Antsu aints kichkisha ningkikia uwemrachartinuitai.
Tura Yus uwemtikrurti tusarka kuikianka kichkisha akiimiakchartinuitai.
8-9 Tuke jatsuk pujusmi tusarkia,
kuikiajaingkia pengké akiimiatmamkachminuitji.
10 Aints nintip ainauka tura nintinchau ainausha mash metek jainawai.
Tura ni kuikiarinka chikichan ukurinawai tusar,
paan nekaamnawaitji.
11 Aints ni nungkarin tura ni yaktarin ni naarijai inaikiamu ainayat,
ni tuke iwiarsamurin matsamsartin ainawai.
Tura tuke mengkaakartin ainawai.
12 Aints ainauka kuikiartin ainayat,
tukeka pujuschartin ainawai.
Antsu kuntin jaina nunisarang jakaartin ainawai.
13 Aints ningki nintimtumasar:
Wikia kuikiartinuitjai tumamin ainauka tuke mengkaakartin ainawai.
Tura miajuitjai tumamin ainausha nunisarang tuke amukartin ainawai.
14 Aints miajuitjai tumamin ainau kakarmaringkia yaitas mengkawai.
Tura asar tuke iwiarnastinnum jeainawai.
Uwija wainin ni uwijarin achik juwawa nunisang jataka nu aints ainaunka achiktinuitai.
Tura asamtai ukunam pengke aints ainau jakamunmaya nantakiar,
nu pasé aints ainaun inarartin ainawai.
15 Antsu winaka Yus jakamunmaya uwemtikrurtinuitai.
Tura ni pujamurin juruktinuitai.
16 Chikich aints kuikiartin asa,
ni jeen warinchu untsuri itau wainkurmesha napchauka nintimrairap.
17 Nuna turinutiat ni jaakka,
ninu aa nunaka kichkisha jukichminuitai.
Tura ni warinchuri ainauncha ni iwiarnatniurinka jeekachminuitai.✡1 Tim 6.7
18 Ni iwiaaku pujakka kuikiartin asa nukap waraawai.
Tura kuikiartin asamtai,
chikich aints ainau pengker nintimtuti ayat,
19 ni jakatniuri kintaka jeartinuitai.
Turamtai nuniangka paaniunka pengké wainkashtinuitai.
20 Aints ainauka kuikiartin ainayat,
tukeka pujuschartin ainawai.
Antsu kuntin jaina nunisarang jakaartin ainawai.✡Stg 5.1-5