1 Yus pengke nintintin ainaun nekas pengker awajsatnuitai.

2-3 Antsu wikia jampesarang pujuinaun suwirpiaku jiakun,

tura pasé aints ainauncha suwirpiaku jiakun,

aints iyaachak wajawa nunisnak tunau jurumachak wajakjai.

4 Pasé aints ainau najaimiatsuk pujuinau asar ni jakatniurinka nintiminatsui.

5 Tura chikich aints wait wajaina nunisarka waitka wajainatsui.

Tura chikich aintska itiurkachminnum pujuina nunisarka pujuinatsui.

6 Tura asar jampesarang pujuinawai,

tura chikich aints ainauncha pasé awajinawai.

7 Ni namangkengka apuitai.

Turayat tuke ni nintijai tunau nintimin ainawai.

8 Chikich aints ainaun wishikinawai.

Tura jampesarang:

Wi wakeraknaka pachitsuk pasé aa nunaka turamnawaitjai tinawai.

9 Yusnasha pachisar pasé chichainawai,

tura aintsnasha pachisar tuke aujmatinawai.

10 Tu pujuinau asaramtai,

chikich aints ainau niin pachisar:

Nekasar pengker pujuinawai tinawai.

11 Tura nintiminak:

¿Itiur pujuinawa nuna Yus nekawash? ¿Tura Yus nayaimpinam puja nuka nu aintsu turamurinka nekawash? tinawai.

Ni inintramuri tu awai.✡Sal 10.4, 11; 14.1

12 Nu pasé aints ainau jiij pujurtaram.

Pachitsuk ni kuikiarin yujinawai tinawai.

13 Tu tinau wainiatnak,

wikia nangkamnak nintir tunaarinchau ati tusan wakerukmajai.

Turasha nangkamnak tunau takatsuk pujustaj timiajai.

14 Turayatnak pachitsuk kintajai metek wait wajajai,

tura kashincha kashincha wina katsumrinawai,

tu nintimsan pujumjai.

15 Antsu tu chichaaknaka Yusen umirkaru ainaun pasé nintimtiknuyajai.

16 ¿Timiá tunau ainayat warukaya timiá yuumatskesha pujuinawa? tusan nuna tenapkesan nintimratatkaman pengké yumtin nintimsan pujuyajai.

17 Antsu nuniangka Yuse jeen wayaan,

Yusen nintimran iniakun:

¿Nu pasé aints ainauka tuni pujusartinui? tu iniam,

Yus winaka nekamtikruamiayi.

18 Nu aints ainauka iyaatnak wajainawai,

tura mengkaatanak wajainawai.

19 Nuka aneachmau mengkaakartin ainawai.

Turasha sapijjai amukartin ainawai turutmiayi.

20 Apuru ame aints shintarua nunismek nu pasé aints ainauka amuktinuitme.

21-22 Wikia pasé aints ainau pujutrin wainkan,

tangku nintinchawa nunisnak katsurman nintimsan pujuyajai.

Turamtai nintir najamnuyayi.

23 Turayatnak tuke amijai pujuyajai.

Tura asamtai tunaanum ayaaraim tusam,

untsur uwejrun achirkamiame.

24 Wina chichamur umirtukta tusam,

chichamem akupturkamiame.

Tura wi jakamtaikia,

wina pengker awajtusam juruktinuitme.

25 ¿Warukanak nayaimpinam winitnasha wakeraja? Nayaimpinam wininka aminak wainkatasan wakerajme.

Amijai pujaknaka ju nungkanam ainia nunaka pengké wakerukchatnuitjai.

26 Wina pujutruka amukatnuitai.

Antsu tuke Yusnum pujustin asamtai,

Yus wina nintirun kakamtikrurtinuitai.

27 Aints Yusen nintimtsuk pujuinauka tuke mengkakartin ainawai.

Tura asaramtai niin umirtsuk pujuinaunka Yus amuktinuitai.

28 Antsu wikia tuke Yusen nintimsan pujusminuitjai.

Kame tu pujaknaka timiá pengker pujustinuitjai.

Apuru wina Yusur asam,

wina ejarkatnumka ametme.

Tura asakmin ame turamurmin wikia aints ainaun mash nekamtikiatnuitjai tajame.