1 Apuru wina Yusur asam,

turasha wina uwemtikrurtin asakmin,

tsawaisha tura kashisha yainkata tusan seajme.

2 Tura wi seajme nu anturtukam airkata.

3 Wikia timiá pasé pujau asan,

jakamin nekapeajai.

4 Wina kakarmar atsau asamtai,

wina pachitsar wári jakatatui tiarminuitai.

5 Wikia aints jakau iwiarsamunam ukusmawa tumawaitjai.

Tura aints maaniamunam maamua tumawaitjai.

Turasha aints amin ejamunka waintsuk kajinminawa tumawaitjai.

6 Tura wikia waa jiitamranam tee amaunum ajuarmawa tumawaitjai.

7 Ame kajekmaurum akupturkau asakmin,

aints entsa tampaaramunam ujungmawa tumawaitjai.

8 Turamtai wina amikur ainau ajapruwar ukukiarti tura tsuutrarti tusam aitkaramame.

Tura asan wikia aints kársernum engkeamua tumawaitjai.

9 Tura timiá juutu asan,

wainmichua nunisketjai.

Apuru kintajai metek amincha uwejrun takuin seajme.

10 ¿Jakaru ainau wainchati takat wainmamtikiatmeash?

¿Tura jakaru ainau amin maaketai turaminawak?

11 ¿Jakaru ainau iwiarsamunam ami nekas chichammin pachisar,

tura ami anengkratairumin pachisar chichainawak?

12 ¿Tura jakaru ainamunam aints kichkisha ami pengker turamurmin tura ami wainchati takatrumin nintiminawak?✡Sal 6.5; 115.17

13 Antsu wikia Apuru amin seajme.

Kashik amincha wina seamurnaka antumtikiajme.

14 Apuru ¿waruka winasha nakitrame?

¿Waruka winasha anumrutme?

15 Wikia natsa akunka wait wajayajai,

tura jatancha wakerin ayajai.

Tura ame wina itiurkachmin akupturkumnisha atsannuyajai.

Turayatun yamaikia atsantrachmin nekapeajai.

16 Ami suwirum winaka nepetuki.

17 Tura asamtai aints nujang nujangkruamunam japen wajawa tumawaitjai.

18 Wina amikur ainau tura wina irutkamur ainausha yajá akupkamu ainawai.

Tura asaramtai wikia teenam pujuinawa nunisketjai.✡Sal 31.11; 38.11