Judá nungkanam aints Elimelec naartin pujuyayi. Tura nuna nuwari Noemí naartinuyayi. Tura yakat Belén tutainum pujuarmiayi. Tura yurumak atsau asamtai tsuka amiayi. Tura ¿waring yuwataij? tusar: Moab nungkanam yurumak pujawai tamaun antukar, Elimelec ni nuwarijai tura ni uchiri jimiarjai nuni pujusmi tusar wearmiayi. Tura Moab nungkanam jear, uchiri mai nunia nuwan nuwatkarmiayi. Kichik nuwa Orfa naartinuyayi. Tura kitcha Rut naartinuyayi. Tura Moab nungkanam pujuinai Noemí aishri jakamiayi.

Tura aishri jakamunmaya diez (10) musach nangkamaramtai uchirisha mai jakarmiayi.

Noemí uchiri mai jakaramtai, Moab nungkanam pujuinauka Yusen umirchau asaramtai, Noemí Judá nungkanam yamaikia tsuka atsawai tamaun antuk, ni nungkarin waketkitas wakerimiayi. Tura nuni wetas Noemí ni najatin jimiaran chicharak:

—Wina wait anentruru asakrumin Yus atumin yainmakarti. Antsu yamaikia wait aneasrum, atumi nukurin waketkitaram. Tura asakrumin Yus atumin chikich aintsun ninumkati tusa suramsarti, —timiayi. Nunia najati mai tsatsarin mejeasar juutiarmiayi. Tura mai tsatsarin aneenak chicharinak:

—Atsa, amijai tsaniasar ami nungkarmin winitatji, —tiarmiayi. Tu tinam tsatsari ayaak:

—Atsa, nekasrum waketkitaram. ¿Waruka wijai wetasrumsha wakerarme? Wikia juuntach asan aintsun ninumkatatkaman tujintajai. ¿Tura aishrinataj takuncha itiur uchincha jurertajak? Uchir yamai akiinamtaikia ¿atumsha uchir ninumkatasrum itiur nakastarmek? Atsa najatru, nuka turachminuitrume, —timiayi.

Tamati mai ataksha juutiarmiayi. Tura juutiar umisar, Orfa ni tsatsarin mejeas, nunia nukurin waketkimiayi. Antsu Rutka waketkichmiayi. Antsu tsatsarin chicharak:

Tamati Noemí waketkita tutsuk iijai wemi tusa najatin jukimiayi. Tura mai Belén yaktanam wearmiayi.

Tura Belén yaktanam jearamtai, nuni aints ainau cebada juutan nangkamawarmiayi. (Cebadaka arusea tumawaitai, tura pang najantaintai.)

Noemí ajari atsau asamtai ¿waring yuwataij? tusar Rut cebada nungkanam kakeek tepaun wainak juukmiayi. Tura kintajai metek cebadan juuk tsatsarin yuratas itiarmiayi.

Nu nungkanmasha chikich aints Booz naartin pujumiayi. Nuka Noemí aishri jakamia nuna weari ayayi. Tura Rut cebada nungká kakeekaun eak juki, nunia chikich kintati Booza ajarin cebadan juuktas wemiayi. Tura cebada kakeekaun juwamtai, Booz tari Rutan wainak, aja takau wainiun iniak:

—¿Au nuwasha yáki? —timiayi.

Tu iniam aja takau ainaun wainin Boozan ayaak:

—Au nuwaka Moab nungkanmayaintai. Noemíjai tamia nuwaitai. Auka nuna najachirintai, —timiayi.

Tamati Booz Rutan chicharak:

—Wajerchi, ame wakerakmeka chikich ajanmaka wetsuk, tuke juni cebada kakeau jukita. Tura kitamakmeka muits puja nuni weme yumi amurta, —timiayi.

Tamati Rut: Wikia mianchawaitjai tusa, nungkanam pinakumar tepes aimiak:

—Wikia chikich nungkanmaya ai waitiatmesha ¿waruka winasha timiá pengkersha aujtame? —timiayi.

Tu iniam Booz aimiak:

—Ame aparam tura nukurmesha ukukim, tura nungkarmesha ukukim, ami tsatsaram pengker awajme nunaka winasha ujatkari. Tura Israela Yusri ami turamurmin wainkau asa, amin pengker awajtamsati, —timiayi.

Tura yuwinak pujusar, Rutan yuwita tusa untsukmiayi. Tura ataksha cebada eaktas weamtai, Booz ni inatiri ainaun chicharak:

—Au nuwaka itit awajtsuk asataram. Antsu atum cebada juwarme nunasha niisha nukap jukit tusaram kaketrataram, —timiayi.

Tu tinu asamtai Rut cebada kakeaun juki, angkuanmatai tsatsari jeen waketkimiayi. Tura waketkiamtai, Noemí cebada itamun wainak:

—¿Ju kintatisha tuniaya cebadasha juukmame? Amin yainmakunka nunaka Yus pengker awajsati, —timiayi. Tamati Rut ayaak:

—Aintsu ajarin ju cebadan wainkamja nuna naaringkia Boozaitai, —timiayi.

Nunia kintajai metek Booza ajarin cebadan kakermaun juukmiayi. Antsu kakerauri amukamtai inaisamiayi.

Cebada juukmauri mash amukamtai, Booz Rutan nuwatkamiayi. Tura nuwatkam Rut japruk nunia uchin jurermiayi. Tura uchirin Obed inaikiamiayi. Nu Obedka apu Davidta apatchiri ayayi.✡Mat 1.5; Luc 3.32