1 Agŋ lisijimɛl, ɛm ecʼa, mʼↄtum mi dadm ↄny odad ɛsɛ agŋ eke Nyam ecʼAbŋ Lala a am nyimn af. Kↄ mi dad ↄny odad ɛsɛ agŋ eke erur eke kʼir ɛb ɛsɛ agŋ ekʼↄnym Abŋ Lala af. Ɔny anŋn ɛsɛ ey abu ɛm af yecʼekʼel ↄny ecʼↄmn Krist ɛm a. 2 Mʼↄŋ ↄny mɛny mij ɛgŋn, ow eke ow kʼel ob ij leg leg a, aŋke kʼↄtumn ijmn ob leg leg. Ɛtŋ yɛfɛnyna ɛm yɛji, kʼↄtumn cɛ, 3 aŋke am erurir eke kʼiir ɛb ɛsɛ agŋ ekʼↄnym Abŋ Lala af. Tasi ɛm a, ekʼↄny ↄfr ɛm a, nyamnɛyr lele ów ɛsu ab bʼanŋ, ke anmn ɛsɛ agŋ ɛjecʼab af ee? Ke ↄny ecʼɛb ir a anm sɛgŋ fɛŋ ɛsɛ agŋ a ekʼↄnym Abŋ Lala ecʼab af ee? 4 Eke ↄny ɛm ecʼɛgŋ nyam bi dad ɛsɛ: «Ɛm, Pↄl eci mʼel,» ɛtŋ ɛjeci nyam bi dad ɛsɛ: «Ɛm gbɛ Apolↄs eci mʼel a,» ke ki dadmn odad ɛsɛ elel eke agŋ ɛjecʼa bi dad ab af ee?

5 Apolↄs, ke bwo ee? Ɛtŋ Pↄl, ke bwo ee? Ɛy Nyam e juma kok ɛsɛl cɛ. Ɛy ɛm Nyam ɛcr ↄŋ ↄny eel ↄmn ɛsɛl, ɛtŋ ɛy ɛm ecʼɛgŋni nyam nyam kok juma in ecʼob ap a eke Nyam ↄŋʼn ab ɛm. 6 Ɛm, mʼewl egb a, ɛtŋ Apolↄs okʼr mij, kↄ Nyam anake ↄŋʼn lʼagb a. 7 Ow anake ɛgŋ a ekʼewl egb a lele ɛgŋ a eke okʼr mij ab ab elm low kaka a. Kↄ ɛgŋ a ekʼↄŋʼn lʼagb a anake kok low a fɛŋ a, ɛtŋ ɛgŋ a, in lʼel Nyam. 8 Ɛgŋ a eke bʼewl a lele ɛgŋ a eke bʼok mij ab ab el kpɛŋ. Nyam bʼↄŋ ɛgŋ ɛgŋ e juma a eke kok a e labm sↄg. 9 Tasi ɛm a, ɛy fɛŋ Nyam ab sʼam kok juma, ɛtŋ ↄny eel Nyam eci ↄgm a. Ɔny cɛ ɛmɛny eel in ecʼêl a eke lʼus a.

10 Ɛm ecʼob ap a eke Nyam ↄŋʼm ab ɛm, mi sigm lebn nↄmu ɛm ab es ɛsɛ êl us ɛs mamn af, ɛtŋ ɛgŋ ɛjeci fɛŋ am us af yogŋ. Gbɛkↄ ɛgŋ fɛŋ ɛ́w ɛrm, af yogŋ ecʼus ab ɛm. 11 Lebn nↄmu ɛm a anŋ lɛgŋ a ɛtŋ: ow ow el Jesu Krist. Ɛtŋ ɛgŋ kaka kʼↄtum ɛlum lebn ɛjeci nↄmu ɛm. 12 Ɛgŋ ↄtu eke kʼoc sika, jɛtɛ, mebn ey amamn, oglog likŋ, bɛny oglog papo, us lebn nↄmu ɛm na af. 13 Gbɛkↄ, ɛgŋ fɛŋ e juma a bʼow ɛru es kpata wɛl ɛkn jɛj ok e lɛgŋ a, aŋke lɛgŋ a, al ligbɛl nyam bʼow anŋ eke bʼow ɛlu ɛgŋ fɛŋ e juma e kok a e sakpl a ↄkm. 14 Eke ɛgŋ nyam us êl ekʼij lɛc al a ecʼany af, li bʼow nʼɛŋn ob ap. 15 Eke ow ɛcrm ɛbɛn, ɛtŋ in e juma a ɛtu al ab ɛm a, li bʼow lʼirmn fɛŋ. In, li bʼow nʼɛŋn sel, gbɛkↄ ow bʼow anŋ ɛsɛ ɛgŋ eke uru es ubr al ɛm af.

16 Ɔny uwmn any eke eel Nyam ecʼêl a, ke Nyam ecʼAbŋ a ir ↄny ɛm ee? 17 Ekʼɛgŋ nyam ŋuŋn Nyam ecʼêl a, Nyam bʼow ŋuŋnʼn, †ŋuŋn Nyam ecʼêl a:nuŋ 1 toŋ 4 ɛm a, Nyam ecʼêl ŋuŋn owi a, el Nyamel ɛm ecʼagŋ a ecʼɛm eke wɛl bʼↄny bubr inym es ogog ogog a e low. aŋke in ecʼêl a el lala ɛtŋ êl a, ow ow el ↄny.

18 Ɔny ɛm ecʼɛgŋ kaka kʼɛ́jur in sosi. Ekʼɛgŋ nyam ↄny ecʼaraŋn a am ocr in sosi sɛwru, ɛsɛ wus ecʼagŋ ecʼelel eke bi tutar ab af, ow akpl eke “nuŋ ɛm kʼuŋʼn” ke lʼél sɛwru tasi. 19 Tasi ɛm a, wus ecʼagŋ e sɛwr a, Nyam ecʼa nuŋ ɛm ŋuŋ. Na sosiɛm anake Nyam Lɛl dad ninɛ: Nyam bʼↄny ɛsɛwru, ɛl obi eci kprakpr ab ɛm.†Job 5.13. 20 Ɛtŋ Nyam Lɛl cɛ ɛmɛny dad ninɛ: Ɛs Kↄtↄkↄ uw ɛsɛwru e tutr ab any, lʼuw any eke ow elm low kaka.†Selu 94.11, Sɛptant ɛm ecʼodad eke wɛl oc. 21 Ɛgŋ kaka ↄtum eke kʼɛw sos eke nʼam us any ɛs kaka fɛŋ jam a sosiɛm. Tasi ɛm a, fɛŋ el ↄny eci: 22 Pↄl, Apolↄs oglog Piɛr, wus na, sel, luw, caca ɛm lele lɛgŋ ekʼanŋ anym am ow ab ab. 23 Fɛŋ el ↄny eci, gbɛkↄ ↄny, eel Krist eci ɛtŋ Krist el Nyam eci.