1 Sica, mʼam mʼow mi dad ↄny ów a eke bibrmnʼm ↄny e lɛl ab ɛm a e low. †Korɛnt e Nyamel a bibrm ów bɛb lɛl nyam eke -li kokr -nʼↄŋn ɛ́rmu nyahan oc im ↄŋ Pↄl ab ɛm (1 Korɛnt 16.17). Ɔny bi dadr eke owʼn akpl eke ɛgŋ igŋ in kʼↄ́nym yↄw. 2 Gbɛkↄ agŋ eke bʼij nfaci a sosiɛm, ke igŋ fɛŋ ↄ́ny in e yↄw, ke yↄw fɛŋ ↄ́ny in ecʼigŋ. 3 Ke igŋ fɛŋ kók low yecʼekʼel igŋ ecʼeke ki kók in e yↄw e lís a, ke yↄw fɛŋ yɛji kók in ecʼigŋ e lís ecʼekʼit a, 4 aŋke yↄw kʼↄtum ocm in e sos a kokrm low yecʼeke lʼerur a: in e sos a, in ecʼigŋ a eci. Ɛbɛn nɛnyɛmbri nyam, igŋ yɛji kʼↄtum ocm in e sos a, kokrm low yecʼeke lʼerur a: in e sos a in e yↄw a eci. 5 Ɛgŋ lawl kʼↄ́nyn sos es lawl e lís, ekʼow elm Nyam eke kʼↄnyn abusu ŋↄŋan eci cɛ. Eke bʼow kokr ɛbɛn lɛgŋ tɛl eci yɛji, ke ow él nɛny af okr ɛm ki kokr. Kↄ ow e jam a, ɛ̀wal am ɛrur usu nyam; ekʼow elm ɛbɛn, kʼↄtumn ↄnynmn sos es ij, ɛtŋ Satan ↄtu eke kʼebr ow ɛm ɛju ↄny.

6 Low na eke mʼam dad a, elm ol eke mʼam ↄŋ ↄny, kↄ low cɛ eke mʼam ɛw es mʼↄŋ ↄny. 7 Mʼam erur tasi eke agŋ a fɛŋ kʼanŋ ɛl sↄny ɛsɛ ɛm af, gbɛkↄ Nyam bʼↄŋ ɛy ɛm ecʼɛgŋni nyam nyam fɛŋ bibm nyam eke kʼel in sↄny cɛ eci.

8 Gbɛkↄ agŋ a ekʼanŋ ɛl sↄny a lele eŋnyↄw ab ab, mʼam dad ↄny mʼɛsɛ: eke bʼanŋn ɛsɛ ɛm af, ow el low nimamn ↄny eci. 9 Gbɛkↄ eke kʼↄtumn ↄnynmn sos es a, ɛ̀birir! Ow akpl eke kʼɛbirir, ow a eke kʼanŋn low ám aw ↄny ijr ↄny gbre a.

10-11 Agŋ a eke ɛbirir a, mʼam dad eke kʼanŋn usu nyam, ɛsʼelel eke Ɛs Kↄtↄkↄ in obi dad ab af. Igŋ itm eke kʼogŋ in e yↄw a, ɛtŋ yↄw itm eke kʼɛlu in ecʼigŋ ab es. Eke lʼɛlu in ecʼigŋ ab es a, ke nʼánŋ in sↄny oglog ke lʼɛ́gŋ lʼeb lʼokr ɛm ow ab.

12 Agŋ a eke ɛbirir ke ɛl e yↄw a oglog igŋ a ubm Nyam nawrɛ a, mʼↄny ów eke ɛl yɛji mi kʼↄm ɛl, ɛtŋ na ecʼa, ow elm Ɛs Kↄtↄkↄ dadm, kↄ ɛm mʼam dad. Eke Krist ɛm ecʼɛgŋ lisijim nyam ↄny yↄw eke ubm Nyam nawrɛ, ɛtŋ ow erur eke ow kʼir ɛb in ab a, ow itm eke li kʼogŋ ow, ekʼow elm nawrɛ ub lis a sosiɛm. 13 Ɛbɛn nɛnyɛmbri nyam, eke nawrɛ ub lis nyam ↄny igŋ ekʼubm Nyam nawrɛ, ɛtŋ ow erur eke ow kʼir ɛb in ab a, ow itm eke li kʼŋgboŋ ow ab, ekʼow elm nawrɛ ub ɛs a sosiɛm. 14 Tasi ɛm a, yↄw ɛc na ekʼelm nawrɛ ub ɛs a titm Nyam nↄnↄ, in e yↄw a eke lʼɛbi a sosiɛm. Ɛbɛn nyam coco, igŋ ɛy a ekʼelm nawrɛ ub lis a yɛji titm Nyam nↄnↄ, in ecʼigŋ a eke lʼɛbi a sosiɛm. Blel ow elm nɛnɛ ana, ↄny ecʼey a blel anŋ ɛsɛ ey ekʼitm eke Nyam kʼɛgŋ eb af, kↄ nawrɛ ɛm a, -lʼɛbm eke Nyam kʼɛgŋ eb ɛl. 15 Gbɛkↄ, ekʼɛl ɛm ecʼɛgŋ nyam ekʼubm Nyam nawrɛ a am erur eke kʼim a, lʼↄtu eke li kʼim. Eke ow ɛcr nɛnɛ a, ɛgŋ lisijim a oglog ɛgŋ lisijↄw a ↄnym low kaka ɛgŋ yecʼab ab ij. Ùwr any cɛ eke Nyam, in ecʼa ɛrm es ɛy ecʼɛb ir ɛm lʼɛsŋ ↄny. 16 Kↄ igŋ ɛy, ↄtu eke kʼuw any eke bʼow sↄg ŋ ecʼigŋ ab ee? Ɛtŋ kↄ yↄw ɛc, ↄtu eke kʼuw any eke ŋ yɛji bʼow sↄg ŋ e yↄw ab ee?

17 Lɛgŋ a eke Nyam ɛsŋ ↄny a, ↄny ecʼelel a eke Ɛs Kↄtↄkↄ ɛwr ↄny anŋn ab ɛm, am iir ɛb. Sica, eke ow elm mɛbi e low na eke mi dad a, ow it ekʼɛgŋ fɛŋ kʼir ɛb elel eke nʼanŋn ab ɛm. Ol na anake mʼam ɛw es Sinyamel a fɛŋ ɛm a. 18 Lɛgŋ a eke Nyam ɛsŋʼŋ a, ke ubr likr es ŋ̂ ee? Ekʼow el ɛbɛn, ànŋ elel a ekʼanŋn a! Eke lʼɛsŋʼŋ a, ke kʼubrm likr es ee? Ekʼow el ɛbɛn, kʼìm catŋ kʼubr es! 19 Ke wɛl úbr likr es oglog ke wɛl kʼúbrm es, elm low a eke el low tasi a. Low tasi a eke wɛl ki kok a el Nyam e low a eke dad a ecʼɛlum a. 20 Ke ɛgŋ fɛŋ ánŋ in ecʼelel a eke nʼanŋn ke Nyam ɛsŋʼn a. 21 Eke Nyam ɛsŋʼŋ a, kↄ adu el ee? Eke ow el adu el ke kʼèbr ow e low ɛrm mij! Kↄ ekʼↄtu ekʼel lewi, ke él kpɛkŋ. 22 Tasi ɛm a, ɛgŋ nyam ekʼel adu ke Ɛs Kↄtↄkↄ ɛsŋ a, el lewi ɛtŋ el Ɛs Kↄtↄkↄ eci. Ɛbɛn nyam coco, ɛgŋ nyam ekʼel lewi ke Ɛs Kↄtↄkↄ ɛsŋ a, el Krist ecʼadu. 23 An ligbɛl Nyam ɛnm ↄŋ ↄny eel ewi. Ow sosiɛm, kʼèel ɛgŋ ɛjeci e madu. 24 Agŋ lisijimɛl, ke ɛgŋ fɛŋ ánŋ in ecʼelel a eke nʼanŋn ke Nyam ɛsŋʼn a.

25 Ibrmn ɛm ecʼelel eke mʼam ɛkan ededyↄw oto eke ɛbim egŋ a e lís owi. Mʼɛŋnm ol kaka anm Ɛs Kↄtↄkↄ ogŋ owm low na eci. Gbɛkↄ mʼam dad ↄny ɛm ecʼelel eke mʼam ɛkan low a. Ɛs Kↄtↄkↄ eci sↄrŋ ikŋ a ekʼↄny ɛm e lís a sosiɛm, ↄtur eke kʼↄnyn ↄmn ɛm ɛm.

26 Kin yecʼeke mʼam tutr a: lɛgŋ na ɛm e ses babur a sosiɛm, ekʼagŋ ɛbirm, ow akpl ɛbɛn. Ɛɛ, ow akpl ekʼɛgŋ fɛŋ kʼanŋ ɛsɛ elel eke nʼanŋn ab af. 27 Kↄ ɛbi yↄw ee? Ekʼɛbi yↄw ke kʼↄ̀l in ecʼes ɛlu ij. Ɛbim yↄw ee? Ekʼɛbim yↄw ke kʼↄ̀l e kʼɛbi ij. 28 Gbɛkↄ, eke am ɛbi yↄw, ow elm sikpl kokm. Ɛtŋ eke dedyↄwli nyam ɛbi igŋ, in yɛji ow elm sikpl li kokm. Gbɛkↄ agŋ a eke ɛbirir a bʼow ij gbre nↄnↄ ɛl e sɛgŋ fɛŋ ecʼɛb ir ab ɛm, ɛtŋ ɛm, mʼerur eke low nɛnɛ kʼɛ́ŋnm ↄny.

29 Sica agŋ lisijimɛl, mʼam dad ↄny eke Ɛs Kↄtↄkↄ e mowrer e sɛgŋ a ↄfum ij. Caca ɛm ecʼagŋ ekʼɛbi ↄyↄw a, kók ɛsɛ wɛʼn ɛbim af. 30 Ɛl a ekʼam ikŋ ↄŋn a, kók ɛsɛ wɛʼn ikŋm ij af. Ɛl a ekʼanŋ sos ɛm iŋn ɛm a, kók ɛsɛ owʼn iŋnm wɛl af. Ke ɛl a ekʼam ↄl mob a, kók ɛsʼɛbɛn mob a eke wɛʼn ↄl a in elm wɛl ecʼaf. 31 Ɛl a eke am ɛŋn ob ij wus ecʼɛb ir na ɛm a, kók ɛsʼɛbɛn wɛʼn ɛŋnm in ijm af. Ɛɛ, wus na ecʼów a ecʼelel eke anŋn yɛfɛnyna a, kʼow anm ɛbɛn sɛgŋ fɛŋ.

32 Mʼam erur eke kʼↄnymn ɛrm mij kaka. Ɛgŋ nyam eke ɛbim yↄw a, bʼebr Ɛs Kↄtↄkↄ ecʼów ɛrm mij nↄnↄ, kok elel eke in owi kʼawr ow. 33 Kↄ ɛgŋ nyam eke ɛbi yↄw a, bʼebr wus ecʼów ecʼɛrm mij nↄnↄ, kók elel eke in owi kʼawr in e yↄw a, 34 ɛtŋ ɛbɛn a, ów yony a ecʼaraŋn li bi cɛc. Ɛbɛn nyam coco, yↄw nyam oglog dedyↄwli nyam eke ɛbim igŋ a, bʼebr Ɛs Kↄtↄkↄ ecʼów ɛrm mij nↄnↄ. -Li bʼerur eke -li kʼel ow eci nimum nimum, -lʼoc ɛl ecʼɛgŋ el a pupukpaŋ -nʼↄŋ ow. Kↄ yↄw nyam ekʼɛbi igŋ a, bʼebr wus ecʼów ɛrm mij nↄnↄ, kók elel eke in owi kʼawr in ecʼigŋ a.

35 Mʼam dad low na ↄny e nimamn eci, kↄ ow elm gbre eke mi kʼↄŋ ↄny ijr eci. Mʼam erur eke ki sↄsumn yecʼeke akpl a ocr, ow ↄ́ŋ ke úcur Ɛs Kↄtↄkↄ ↄnyn es, éel in sↄny coco eci.

36 Sica, eke igŋ nyam ekʼɛsu yↄw a, ow ecʼerur a am afŋn in es, ɛtŋ nʼam uru eke li ki kok low ↄbr ow e lís eke -li kʼanm ow yony a, ow akpl eke igŋ a ki kok low e nʼam ɛkn ekʼel low tasi a. -Lʼↄtu eke -li kʼɛbirir -lʼok es. Eke -lʼɛbirir a, ke na elm sikpl eke -li kokr. 37 Gbɛkↄ lʼↄtu eke li dad nʼↄŋ in ecʼɛrm a eke li kʼow lʼɛbim in e dedyↄw a, lʼɛruam ow ab yɛji. Eke li dad tasi nʼↄŋ in ecʼɛrm a, ekʼow elm atrm ɛm ɛtŋ lʼↄtu eke li kʼↄnyn sos es ow ecʼerur a eke bʼawʼr afŋn es a e lís, eke lʼɛbim ow ke ow akpl ɛbɛn. 38 Ow sosiɛm, ɛgŋ a ekʼɛbi in e dedyↄw a kok low mamn, gbɛkↄ in a ekʼɛgŋm eke kʼɛbi in e dedyↄw a kok ow akpl nↄnↄ.

39 Igŋ ɛy fɛŋ bʼanŋ in ecʼigŋ ab sɛgŋ a nimum eke nʼanŋ owr a. Eke in ecʼigŋ a bʼuw a, nʼↄny abusu eke li kʼɛbi igŋ eke lʼerur a, gbɛ ke lʼél igŋ ekʼↄny ↄmn Ɛs Kↄtↄkↄ ɛm cɛ. 40 Gbɛkↄ ɛm ɛm ecʼa, mʼam ɛkn eke li bʼow nʼanŋ ehe ɛm eke nʼanŋ ɛsɛ elel eke nʼanŋn ab af. Ɛtŋ mʼↄny tutr eke Nyam ecʼAbŋ a anŋʼm ɛm.