1 Agŋ lisijimɛl, yecʼekʼel Abŋ Lala e sob ap ecʼa, mʼerurm eke kʼúwmn ow e lís e low kaka any.

2 Lɛgŋ sig ɛm a eke kʼuwmn Nyam any a, wɛl bʼↄdum ↄny ab imn sinyam yadŋ ekʼam dadm odad ogŋ, ɛtŋ am dogŋnmn sos kaka. 3 Ow sosiɛm mʼerur eke mi ki dad ↄny low nyam: eke ɛgŋ nyam dad: «Ke abu ɛyr ɛ́ŋn Jesu!», ow kʼↄtum elm Abŋ Lala ↄↄmʼn eke li ki dad ɛbɛn. Ɛtŋ ɛmɛny ɛgŋ kʼↄtum dadm: «Jesu el Ɛs Kↄtↄkↄ!», eke ow elm Abŋ Lala nyimnmʼn. †Jesu el Ɛs Kↄtↄkↄ:lɛl nↄn ɛs a am ɛlu ↄkm eke Jesu el Nyam. Grɛk ɛm ecʼodad ebl a eke aŋa wɛl am itŋn dad Ɛs Kↄtↄkↄ a (Kuriↄs): ow el odad ebl nyam a cɛ eke Jwifɛl oc ɛsŋn Nyam e nin a (Yahweh), lɛgŋ ab ɛm eke Amani Sig eke wɛl nↄn Ebre ɛm a, -lʼitŋnin Grɛk ɛbr ɛm a. (Ɛ̀kn Ów ecʼakr otar usu a, odad ebl na: Sɛptant.)

4 Sica yecʼekʼel Abŋ Lala e sob ap ecʼa, Nyam ↄŋ agŋ in e bibm ab ɛm sob ap ɛrŋ ɛrŋ, gbɛkↄ Abŋ nyam a cɛ bʼↄŋ agŋ sob ap a. 5 Ow ↄny juma ɛrŋ ɛrŋ eke wɛl bi kok, gbɛkↄ Ɛs Kↄtↄkↄ nyam a cɛ e juma. 6 Ów ɛrŋ ɛrŋ anŋ eke wɛl bi kok, gbɛkↄ Nyam nyam a cɛ bi kok juma ɛy fɛŋ ɛm, ɛtŋ bʼɛlum ɛy abu fɛŋ a eke si bi kok ab ɛm. 7 Abŋ Lala bʼↄŋ ɛy ɛm ecʼɛgŋ fɛŋ bibm nyam in sↄny cɛ eci, agŋ likpr a e nimamn eci. 8 Li bʼↄŋ ɛgŋ nyam odad sɛwr ɛm eke bʼanŋ Nyam ogŋ ow a e bibm, ke Abŋ nyam a cɛ, nʼↄ́ŋ ɛgŋ ɛjeci nyam low any uw a eke bʼanŋ Nyam ogŋ ow a e bibm. 9 Abŋ nyam a cɛ bʼↄŋ ɛgŋ nyam ↄmn leg leg e bibm, ke nʼↄ́ŋ ɛgŋ ɛjeci nyam agŋ ewlm ecʼa. 10 Li bʼↄŋ ɛgŋ nyam akrowa kok e bibm, ke nʼↄ́ŋ ɛjeci nyam odad eke bʼanŋ Nyam ogŋ ow a e dad ecʼa, ke nʼↄ́ŋ ɛjeci nyam yɛji eke kʼuw ów yecʼekʼel Nyam ecʼAbŋ ecʼów ab any lele ɛl ekʼelm ab ab e bibm. Li bʼↄŋ ɛgŋ nyam am ↄtu ɛbr sɛbr e wɛl uwm any e bibm, ke nʼↄ́ŋ ɛjeci nyam ow ecʼitŋn e bibm. 11 Gbɛkↄ amua fɛŋ a, Abŋ Lala nyam coco a cɛ bi kok ow e low. Li bʼↄŋ ɛgŋ ɛgŋ in e sob ap a ɛsɛ elel eke li bʼerur ab af.

12 Aŋa sʼóc low nyam sʼɛbmn. Ɛgŋ e sos megl a el ob nyam coco, gbɛkↄ nʼɛnyn susu nↄnↄ cɛ. Ɛtŋ eke nʼɛnyn susu yɛji, susu susu a fɛŋ okr af el sos megl nyam; Krist ecʼa yɛji ɛbɛn cɛ. 13 Ɛy fɛŋ, Jwifɛl, agŋ ekʼelm Jwifɛl, madu lele ewi ab, Abŋ Lala nyam ab ɛm cɛ sʼɛŋn mij ok nuŋ, sos megl nyam coco eke si kʼokr af sʼel Krist ɛm a eci. Ɛtŋ ɛy fɛŋ, sʼɛŋn Abŋ nyam coco na anŋ ɛy ɛm.

14 Tasi ɛm a, sos megl nimum a ↄ́nym sos ogog nyam cɛ, kↄ sos ogog nↄnↄ li bʼɛli. 15 Lakr ↄtu e ki dad ɛsɛ: «Ɛm, eke mʼelm abu a, mʼelm sos megl ecʼogog nyam.» Kↄ ɛbɛn yɛji, lʼel sos ogog nyam cɛ. 16 Lↄru ↄtu e ki dad ɛsɛ: «Ɛm, eke mʼelm nyamn a, mʼelm sos megl ecʼogog nyam.» Kↄ ɛbɛn yɛji, lʼel sos ogog nyam cɛ. 17 Blel sos megl a nimum el anyamn, ayaf sʼↄtu e si kʼirir low ee? Ɛtŋ blel ow el ↄru ↄfr cɛ, ke ayaf sʼↄtu eke si kʼↄdur ob sↄsŋ sʼeb ee? 18 Gbɛkↄ, Nyam sisigm sos ogog ogog fɛŋ es sos megl a nimum ɛm, ɛsɛ elel eke lʼerur ab af. 19 Eke sos megl a nimum el sos ogog nyam cɛ, ke lʼelm sos megl ij. 20 Sos ogog ogog a anake bʼokr af el sos megl nimum nyam a.

21 Nyamn kʼↄtum dadm abu ɛsmɛ: «Ɛm, mʼↄnym ŋ ecʼes abur!» Ɛtŋ nuŋ kʼↄtum dadm akr ɛsmɛ: «Ɛm, mʼↄnym ↄny ecʼes abur!» 22 Nawrɛ ɛm a, sos ogog ogog a ekʼↄnym any nↄnↄ a bↄbↄ yɛji, ↄny low e bi kok sos a nimum ɛm. 23 Susu a eke si bʼɛkn ɛsɛ ɛl ekʼelm low kaka af a, si bi tat ɛl abu af nↄnↄ. Ɛtŋ ɛl a eke wɛl ↄtum eke kʼɛkn a, si bʼↄny mɛwl si sus ɛl mob. 24 Ɛy e sos a e susu susu a e wɛl ↄtu eke kʼɛkn a, ibram mob sus na fɛŋ. Gbɛkↄ Nyam eke kok sos megl a, nʼↄŋ susu a eke wɛl bʼɛkn ɛsɛ susu eke elm low kaka af a ɛlum nↄnↄ. 25 Ɛbɛn a, sos megl a ow elm ɛm ow bubrm. Kↄ nana, sos ogog ogog a fɛŋ bʼebr ɛl ↄfr ecʼɛrm mij. 26 Eke sos ogog nyam am ij gbre, sos ogog ogog a fɛŋ am ij gbre in ab. Eke wɛl kok sos ogog nyam anygbeŋ, sos ogog likpr a fɛŋ am kok sos ɛm iŋn in ab.

27 Ɔny ecʼa, eel Krist e sos megl a, ɛtŋ ↄny ɛm ecʼɛgŋ nyam nyam el sos megl a ecʼogog nyam. 28 Ow sosiɛm anake Nyamel ɛm, Nyam ikŋ anym krɛkrɛ ɛm ɛw: ɛrm ɛsɛl, yony ɛm: kokoba ↄb ɛsɛl, nyahan ɛm: low yɛgm ɛsɛl. Ke sica ow e jam a, wɛl bʼɛŋn sakrowa kok ɛsɛl lel ɛl a ekʼɛŋn ɛgŋ ewlm e bibm ab a. Sica ow ↄny abu ɛlum ɛsɛl lele agŋ nyimn ɛsɛl ab, ɛtŋ ɛl a eke ɛŋn sɛbr eke wɛl uwm any ecʼɛbr e bibm a yɛji anŋ. 29 Kↄ ɛl fɛŋ -lʼel ɛrm ɛsɛl ee? Ɛl fɛŋ -lʼel kokoba ↄb ɛsɛl ee? Ɛl fɛŋ -li bi yɛgm agŋ low ee? Ɛl fɛŋ -li bi kok sakrowa ee? 30 Ɛtŋ ɛmɛny, ow elm ɛl fɛŋ yɛji -lʼewlamn ↄ́lu, -li dadmn odad sɛbr eke wɛl uwm any ɛm, -lʼitŋnmn sodad a. 31 Ow sosiɛm a ↄↄl sob ap ekʼↄny any a ecʼɛŋn es!

Gbɛkↄ sica, mʼam ow mi yɛgm ↄny ejagb nyam ekʼel sↄbↄ akm bɛb a fɛŋ.