16
Os eke wɛl ↄkl eke kʼɛlum Jerusalɛm e Nyamel a abu
1 Sica si dádr os a eke wɛl am ↄkl eke kʼɛlum Jerusalɛm e Nyamel a ecʼↄmn ɛsɛl a abu a e low. Kòkr low nɛnyɛmbri nyam a cɛ eke mi dad mʼↄŋ Sinyamel ekʼanŋ Galasi wus af a: 2 dimas fɛŋ, ɛgŋ ɛgŋ akŋ ɛtŋ, bʼow oc os am ɛw es saw; ow ↄ́ŋ ke wɛl kʼékum eke mi kʼanŋ mʼow gbuŋ ke wɛl ás os a luku. 3 Lɛgŋ a eke mi bʼow mʼow a, agŋ a eke sↄsumn otr a, mi bʼow mʼɛrm ɛl Jerusalɛm. Mi bʼow mʼↄŋ ɛl abusu e lɛl, ke -lʼoc ↄny ecʼob ap a -nʼim. 4 Sica ekʼow it ekʼɛm obi yɛji mi kʼim a, ke -nʼim lel ɛm ab.
Pↄl am bɛbm eke kʼim usu
5 Mi bʼow mʼow ↄny ogŋ yogŋ eke mi bʼɛc Maseduan a, aŋke mi bʼow mʼɛcr yogŋ eci. 6 Kʼaw ke mʼánŋ ↄny ab sɛgŋ bɛb, oglog ke ow él lɛfr lɛgŋ iy a nimum. Ow ↄ́ŋ ke ɛ́lumnʼm abu mʼↄkŋ any mʼim ɛm ecʼusu a. 7 Tasi ɛm a, mʼerurm eke ow kʼel ɛkn cɛ mi kʼɛkn ↄny ke mʼáfŋ es mʼaam. Mʼam ↄny tutr eke mi kʼanŋ ↄny ab sɛgŋ bɛb eke Ɛs Kↄtↄkↄ ɛgŋ cɛ.
8 Gbɛkↄ mi bʼow mʼanŋ Efɛs toŋ ke Pantekↄt ecʼes gbɛgbl a ów, 9 aŋke ɛm e juma kok ecʼabusu nↄnↄ ɛruʼm es aŋa, eke agŋ nↄnↄ am atar ɛm ab yɛji.
10 Eke Timote ow a, ɛ̀wr in e lís e low ɛrm, yecʼɛtŋ ke lʼɛ́kn eke ebr ir sɛnyn sɛnyn ↄny ogŋ yogŋ, aŋke in yɛji Ɛs Kↄtↄkↄ e juma nʼam kok ɛsɛ ɛm af. 11 Ɛgŋ kaka ↄny ɛm a kʼíir ir es. Kↄ ↄŋan in ob eke kʼɛlumʼn abu, lʼɛ́wl lʼow nʼɛŋnʼm ɛrm es ɛy ɛm, aŋke mʼam ekuʼr in lele agŋ lisijimɛl a eke bʼow ɛwlʼl ab ab.
12 Sica ɛy lisijim Apolↄs e lís ecʼa, † Apolↄs:Ɛ̀kn Ob Kok 18.24; 19.1; 1 Korɛnt 1.12; Tit 3.13. mʼatrʼr sos es sakp nↄnↄ eke li kʼow lʼɛkn ↄny agŋ lisijimɛl bɛb ab ab, gbɛkↄ sicaca ɛm a, li kʼerurm eke li kʼim usu. Eke abusu bʼow ɛruʼr es a, li bʼow lʼow.
Ów ↄm es abal el lele ɛsŋn ab
13 Ànŋn any owr, ìnymn es kikri ↄmn ɛm! Àtar sos es, ↄnyn lɛc! 14 Kòkr fɛŋ erur ɛm.
15 Agŋ lisijimɛl, ɛmɛny kin low ↄm nyam: ↄny uwr any eke Stefanas lel in ecʼakŋ ab ab el Akayi † Akayi:el Grɛs esr ɛm a e wus ogog. Af yogŋ anake Korɛnt ecʼɛb a anŋ a. wus ogog ecʼagŋ krɛkrɛ eke itŋn ɛrm ɛm, ke ɛgŋ ↄmn ɛsɛl ɛjecʼa e juma eke -li ki kok -nʼↄŋ a e low -lʼebr. 16 Ow sosiɛm, ɛ̀lumn agŋ nɛnɛ a lele agŋ a fɛŋ eke am atr sos es kok juma ɛl ab a.
17 Sos ɛm am iŋnʼm Stefanas, Fↄrtunatus lele Akayikus ab ecʼow na eke ow am ɛknʼm a eci. † Stefanas, Fↄrtunatus lele Akayikus ab:wɛl bi tutr eke agŋ nyahan na anake oc Korɛnt e Nyamel a e lɛl ekʼawŋ Pↄl a isʼr a. Ɛl eci saw eke -nʼanŋnʼm a, ow anŋ ɛsɛ ↄny yɛji saw cɛ ↄny anŋnʼm af. 18 Ɛɛ, -nʼↄŋʼm ɛrm es ɛy ɛtŋ ↄny yɛji -nʼↄŋ ↄny. Ow akpl eke kʼuwr agŋ nɛnɛ a e leg ab any.
19 Azi wus af † Azi wus afel wus ogog nyam eke Rom ecʼes ɛw ɛs a ɛw es. Yɛfɛnyna ɛm a, usu na anake wɛl bʼɛsŋ Turki a. Efɛs ecʼɛb a eke Pↄl anŋ ɛm nↄn lɛl na a, el wus ogog yogŋ e sɛb a e lↄgŋ any. e Sinyamel a fɛŋ am ɛsŋn ↄny. Akilas, Prisil lele agŋ a eke bʼas luku ɛl ecʼakŋ a, am ɛsŋn ↄny sɛnyn sɛnyn Ɛs Kↄtↄkↄ e nin ɛm.† Akilas lele Prisil ab:Ɛ̀kn Ob Kok 18.2, 18-19. 20 Ɔmn ɛsɛl a fɛŋ ekʼanŋ aŋa a am ɛsŋn ↄny. Ɛ̀sŋninin ↄny ↄfr ke ɛ́yarir af ɛsɛ Krist ɛm ecʼagŋ lisijimɛl lele lisijↄwɛl ab af.
21 Ɛm Pↄl, ɛm obi ecʼabu ɛm mi nↄn ɛsŋn na.
22 Eke ɛgŋ nyam érurm Ɛs Kↄtↄkↄ, ke Nyam ígŋ ↄwlʼl! Marana ta! Ɛy Ɛs Kↄtↄkↄ òw. † Marana ta:na odad ekʼel Arame ɛbr ɛm, ow e nyandrɛ el: ɛy Ɛs Kↄtↄkↄ òw! Jesu lele Palɛstin e kretiɛnɛl krɛkrɛ ab ab ecʼɛbr nyam ekʼɛbr.
23 Ke Ɛs Kↄtↄkↄ Jesu ɛ́dŋ ↄny ↄwrↄ!
24 Mʼerur ↄny fɛŋ Ɛs Kↄtↄkↄ Jesu Krist ɛm.
†16:12 Apolↄs:Ɛ̀kn Ob Kok 18.24; 19.1; 1 Korɛnt 1.12; Tit 3.13.
†16:15 Akayi:el Grɛs esr ɛm a e wus ogog. Af yogŋ anake Korɛnt ecʼɛb a anŋ a.
†16:17 Stefanas, Fↄrtunatus lele Akayikus ab:wɛl bi tutr eke agŋ nyahan na anake oc Korɛnt e Nyamel a e lɛl ekʼawŋ Pↄl a isʼr a.
†16:19 Azi wus afel wus ogog nyam eke Rom ecʼes ɛw ɛs a ɛw es. Yɛfɛnyna ɛm a, usu na anake wɛl bʼɛsŋ Turki a. Efɛs ecʼɛb a eke Pↄl anŋ ɛm nↄn lɛl na a, el wus ogog yogŋ e sɛb a e lↄgŋ any.
†16:19 Akilas lele Prisil ab:Ɛ̀kn Ob Kok 18.2, 18-19.
†16:22 Marana ta:na odad ekʼel Arame ɛbr ɛm, ow e nyandrɛ el: ɛy Ɛs Kↄtↄkↄ òw! Jesu lele Palɛstin e kretiɛnɛl krɛkrɛ ab ab ecʼɛbr nyam ekʼɛbr.