Jan e lɛl yony ɛm ekʼawŋ
Ów ekʼit eke wɛl kʼuw any
Jan ekʼel Jesu ecʼɛrm ɛs lel Efɛs e Sinyamel a ecʼidr ɛs ab a anake kok lɛl na am awŋ Nyamel nyam a. Nyamel a eke nʼam awŋ lɛl na a, el Efɛs eci ɛb saw saw a e nyam. Jan am oc Nyamel ikŋ a bɛbmn yↄw gbɛl ab ɛtŋ nʼam ot ↄmn ɛsɛl a ekʼanŋ ɛm yogŋ a, li bɛbmn yↄw gbɛl nyam lel ow ecʼey ab. Na sosiɛm anake nʼam ɛsŋ ow Nyamel “ey lis” a. Nyamel a eke in Jan li bʼim ɛm a e lisijↄw el na eke nʼam awŋ lɛl a.
Nʼam ibrm Nyamel a eke nʼam awŋ lɛl a ecʼagŋ a eke -li kʼerurir ɛl ↄfr, ke -lʼↄsu sos low yɛgm ɛsɛl ayadŋu e lís, ke -li kʼebmn agŋ amua etu eke wɛl bʼow ɛl ogŋ yogŋ a.
1
Ɛsŋn
1 Ɛm Nyamel ecʼƐgŋ Likpekp, mʼam awŋ Yↄw gbɛl lele in ecʼey ab†Yↄw gbɛl lele in ecʼey ab:Grɛk ɛm a Kiria ekʼel Nyamel ecʼagŋ a nimum. eke Nyam sↄsum ot, ke mʼerur a lɛl. Ɛtŋ ow elm ɛm sↄny mʼerur ↄny, kↄ ɛl a fɛŋ ekʼuw low nawrɛ†low nawrɛ:Jan e lɛl ab ɛm, low nawrɛ ke Amani Mamn ana. ab any a yɛji, 2 low nawrɛ ekʼanŋ ɛy ɛm, ke bʼow anŋ ɛy ɛm godo godo fɛŋ a sosiɛm. 3 Ke Nyam Ɛs, lele Jesu Krist Ɛs Iyŋ ecʼↄwrↄ, sↄrŋ ikŋ lele ɛrm es ɛy ab, ánŋ ɛy ab nawrɛ ɛm lele erur ɛm ab.
Ɛgŋ lawl ecʼerur
4 Sos ɛm am iŋnʼm nↄnↄ eke mʼɛkn ŋ ecʼey bɛb am an es low nawrɛ ɛm ɛsɛ ol eke sʼeb Ɛs ogŋ ab af. 5 Sica Yↄw gbɛl eke Nyam sↄsum oc, low eke mʼam ibrmʼŋ a el: sʼérurir ɛy ↄfr. Ke na ow elm ol owr mʼɛnym mʼↄↄmʼŋ, kↄ ow eke sʼeb kpↄkpↄ ɛm ɛtŋ ab ana. 6 Ɛtŋ erur a el: ke sʼán es Nyam e sol ab af. Ɛtŋ ol a el: ke kókr erur e low ɛsɛ elel eke irir kpↄkpↄ ɛm ɛtŋ ab af.
Low any uw ɛsɛl ayadŋu
7 Ayadŋu nↄnↄ ow wus na af ekʼɛ́gŋm Jesu Krist ekʼow sos megl ɛm a e low ebm. Ɛgŋ eke bi kok ɛsɛ ɛl af a, lʼel yadŋu, lʼel Krist ecʼifnu. 8 Ɔ̀sur sos gↄŋ yecʼɛtŋ ke kʼírmnmn ↄny e juma eke kokr a eci labm sↄg, kↄ ke ɛ́ŋan ow ecʼob ap ligbɛl a. 9 Ɛgŋ fɛŋ eke bi digŋ Krist eci low yɛgm a ɛlu es a, okrm af Nyam ab; kↄ ɛgŋ eke bʼucu low yɛgm na ↄny es a, lʼokr af Ɛs lele Jim ab.
10 Ekʼɛgŋ fɛŋ am ow ↄny ogŋ ɛtŋ lʼisam low yɛgm na ab a, kʼèbr ir kʼɛlul il akŋ, kʼↄ̀ŋan in akpa bↄbↄ yɛji; 11 ɛgŋ eke bʼↄŋʼn akpa a, ke ow e juma eŋuŋ a anake in yɛji nʼam kok a.
Uwar ɛm ecʼodad
12 Mʼↄny ów nↄnↄ eke mi ki nↄn mʼawŋ ↄny, kↄ mʼerurm eke mi kʼoc lɛl lele lɛl mij ab; gbɛkↄ mʼam tutr eke mi kʼow mʼɛkn ↄny, ke si dád sʼokarir yecʼɛtŋ ke ɛy e sos ɛm iŋn a él tasi. 13 Esŋ jↄw†Esŋ jↄwel Nyamel a eke Nyamel ecʼƐgŋ Likpekp a ekʼam awŋ lɛl a anŋ ɛm a ecʼagŋ a. eke Nyam sↄsum oc a ecʼey a am ibrmʼŋ.