18
Pↄl im ɛy Korɛnt baŋn
1 Eke ów amua bʼɛc a, Pↄl igb Atɛn im ɛy Korɛnt. †Korɛnt el Akayi wus af ecʼɛb gbɛl; ɛb na ɛm, agŋ ufu es ɛm ɛtŋ in eci nfaci ij owi a agb nↄnↄ. 2 Yogŋ nʼɛŋn Jwif nyam eke wɛl bʼɛsŋ Akilas; wɛl ewʼr Pↄŋ eci wus ab af. Nʼanŋ Rom, Itali wus af lʼow ɛy Prisil ab ow kʼibnm, aŋke yogŋ Sesar Klod ↄŋ abusu wɛl ogŋ Jwifɛl a fɛŋ. Pↄl im ɛŋn ɛl, 3 ɛtŋ eke -nʼↄnyn juma nyam ekʼel ndey lɛl ɛm lɛ́f e kok a, lʼir wɛl ab ɛtŋ -li bʼokr af -li kok juma. 4 Nɛnɛgŋ fɛŋ, Pↄl bʼim Nyam nuŋ igŋ usu a, ɛtŋ eke li bʼeb odad a, li bʼↄl eke li kʼeb Grɛkɛl lele Jwifɛl ab.
5 Sica eke Silas lele Timote ab anŋ Maseduan ow a, †Filip e Nyamel a ↄŋ Silas lele Timote ab os is Pↄl. Ow ↄŋ Pↄl sos ok es in e Nyam juma kok ab ɛm. Li kókm juma a eke ow ɛm li bʼɛŋn os a ij. Ɛ̀kn 2 Korɛnt 11.9; Filip 4.14-15; Ob Kok 17.15. Pↄl bʼoc in e lɛgŋ a fɛŋ am dad Jwifɛl a Nyam odad am ij nɛny dad eke Mesi a Jesu. 6 Kↄ Jwifɛl a ɛ́gŋm in e low a ebm ɛtŋ bi wɛwrʼr; ow sosiɛm lʼufŋ in e mob sus ɛm a e siflefl ab es lʼok wɛl es, †lʼufŋ in e mob sus ɛm a e siflefl ab es lʼok wɛl es:ow e nyandrɛ el ɛgŋ ab ecʼijarm. Ɛ̀kn Matie 10.14 lele ow ecʼakr otar ab ab. ɛtŋ li dad wɛl ninɛ: «Eke batŋ irmn, ke ↄny obi ɛm ana; ow elm ɛm e low ij. Sicaca ɛm a, mʼow mʼoc any mʼↄkŋ agŋ ekʼelm Jwifɛl a.»
7 Pↄl igb yogŋ im ir Titius Justus ogŋ, ekʼin ecʼêl a titm Nyam nuŋ igŋ usu a. Lʼelm Jwif kↄ lʼel ɛgŋ nyam eke ɛgŋ ɛl eci Nyam nuŋ igŋ owi a eb. 8 Krispus ekʼel Nyam nuŋ igŋ usu a ecʼes ɛw a, lele in ecʼakŋ ab ab †Bɛ̀bmn Ob Kok 16.15,33. ub Ɛs Kↄtↄkↄ nawrɛ. Korɛnt baŋn eyŋ nↄnↄ ekʼiri Pↄl ecʼodad a yɛji ub nawrɛ ɛtŋ ok mij nuŋ. 9 Sica ncok nyam, Pↄl am ɛrur mɛmn ɛtŋ Ɛs Kↄtↄkↄ am dadʼr ɛsɛ: «Kʼùru erŋn! Nɛny ánŋʼŋ ɛm am dad! Kʼàbl nɛny, 10 aŋke mʼanŋ ŋ ab. Ɛgŋ kaka kʼↄtum kokmʼŋ low ŋuŋ aŋke ɛb na ɛm, agŋ nↄnↄ el ɛm eci.» 11 Pↄl anŋ Korɛnt kok lakpo nyam awl nↄhↄn ɛtŋ am yɛgm agŋ Nyam odad.
12 Lakpo ab af eke Galiↄn eb Rom ecʼes ɛw Akayi ogog ecʼa, Jwifɛl okr af irŋn Pↄl. -Lʼoc ow -nʼim jɛj ok ecʼany af 13 ɛtŋ -li dad ninɛ: «Ɛgŋ na am ↄl eke kʼeb agŋ igŋ Nyam nuŋ ekʼotm ol a ecʼab es.» †Rom eyŋ ↄŋ abusu eke wɛl ki kok Nyam nuŋ igŋ owi ɛsɛ Jwifɛl ecʼab af, kↄ ow elm Nyam nuŋ igŋ owi fɛŋ gbɛ. Jwifɛl am ok Pↄl ów af aŋke ɛl ecʼa, Pↄl am yɛgm agŋ Nyam nuŋ igŋ owi ɛjeci; ow el low ligbɛl ekʼitm Rom eyŋ ecʼol ab ɛm. Galiↄn gbɛ am oc Pↄl eci low yɛgm a ɛsɛ Jwifɛl ecʼab af. 14 Eke Pↄl ↄl eke ki dad odad a, Galiↄn dad Jwifɛl a ninɛ: «Ɔny Jwifɛl, tasi ɛm a, blel ow el low ŋuŋ li kok, oglog low ligbɛl marɛm anake li kok a, ke blel mʼók sos es mʼiri ↄny ecʼodad a. 15 Kↄ ekʼow el ów es atar odad ebl owi af, en owi af lele ↄny obi e sol owi af ab a, na ↄny obi e low eke kʼɛkan ana. Sodad nɛnɛ a, mʼérurm eke mi kʼel ow e jɛj ok ɛs!» 16 Ɛtŋ lʼogŋ wɛl jɛj ok usu a. 17 Ɛl fɛŋ -nʼↄny Sↄstɛn ekʼel Nyam nuŋ igŋ usu a ecʼes ɛw ɛs a, ɛtŋ -nʼam ↄr ow jɛj ok ɛsɛl a ecʼany af; gbɛkↄ Galiↄn cicm sar okm ɛl es.
Pↄl ɛwl im Antiↄs
18 Pↄl anŋ Korɛnt ibn. Sica lʼɛlu agŋ lisijimɛl a es, ɛtŋ lʼeb mijɛtŋ lʼot Prisil lele Akilas ab nʼim Siri. Gbuŋ ke -lʼeb mijɛtŋ a, Saŋkre ɛb ɛm yogŋ, Pↄl ↄŋ wɛl ɛrʼr sin aŋke lʼij nɛny. †Pↄl ɛdŋ sɛgŋ eb ij nɛny Nyam ecʼany af eke kʼɛgŋm mar, ɛrm sin (Awl 6.1-21). Sakp nↄnↄ Jwifɛl bi kok ɛbɛn Nyam bia ɛlu eci. Ba wɛl bʼɛr sin, ke lɛgŋ a eke wɛl ɛdŋ eb a uwr ŋ̂. Ɛ̀kn Ob Kok 21.24 lele akr otar ab ab yɛji. 19 -Nʼim -lʼok Efɛs ɛtŋ Pↄl ɛlu ɛl es yogŋ. Nʼim lʼɛy Nyam nuŋ igŋ usu a ɛtŋ Jwifɛl ab ab -nʼam atar ów es. 20 -Lʼibrm ow ekʼow kʼanŋ ɛl ab ibn, kↄ lʼɛgŋm. 21 Ke lʼɛ́lu wɛl es a, li dad wɛl ninɛ: «Eke Nyam ɛgŋ, lɛgŋ ɛjeci mʼow mʼɛwl mɛny mʼow ↄny ogŋ aŋa.» Ɛtŋ lʼigb Efɛs nʼimn mijɛtŋ ɛm eci. 22 Eke lʼitr es Sesare a, lʼuyu nʼim Jerusalɛm lʼɛsŋn Nyamel ecʼagŋ a, gbuŋ ɛtŋ nʼim Antiↄs. 23 Li kok sɛgŋ bɛb yogŋ ɛtŋ nʼim. In ecʼim ɛm a, lʼɛcr Galasi lele Friji e wus ab af eci ɛtŋ nʼam atr jam ɛsɛl a sos es.
Apolↄs im Efɛs
24 Jwif nyam eke wɛl bʼɛsŋ Apolↄs ke wɛl ew Alesandri a, ow ɛy Efɛs. Lʼel odad ebl mamn ɛs eke uw Nyam Lɛl any sɛnyn sɛnyn yɛji. 25 Wɛl yɛgmʼn Ɛs Kↄtↄkↄ Jesu ecʼejagb a e low, ɛtŋ ari at ɛm, nʼam ↄb kokoba li yɛgm agŋ Jesu e lís e low fɛŋ cɛcɛ ɛm; gbɛkↄ Jan eci mij ok nuŋ a cɛ e low lʼuw any. †Bɛ̀bmn Ob Kok 19.3-4. 26 Nʼam dad ów ↄmn ɛm tasi Nyam nuŋ igŋ usu yogŋ. Eke Prisil lele Akilas ab iriʼr lebl a, -lʼoc ow ɛtŋ -lʼotar Ɛs Kↄtↄkↄ Jesu ecʼejagb a e low akr tasi -lʼok ow.
27 Sica eke Apolↄs am erur eke kʼim Akayi wus af a, agŋ lisijimɛl a atrʼr sos es, ɛtŋ -li kok lɛl -nʼawŋ ɛb ab ɛm eci jam ɛsɛl a yecʼɛtŋ ke wɛl ébʼr sɛnyn sɛnyn. Eke nʼim lʼɛy yogŋ a, agŋ a eke Nyam e bibm ɛm ↄny ↄmn a, lʼɛlum wɛl abu nↄnↄ. 28 Tasi ɛm a, dedeku fɛŋ ecʼany af nʼam ot ów tasi li yɛgm eke Jwifɛl a ↄnym low ij: Nyam Lɛl ɛm, nʼam ɛlu ↄkm eke Mesi a Jesu.
†18:1 Korɛnt el Akayi wus af ecʼɛb gbɛl; ɛb na ɛm, agŋ ufu es ɛm ɛtŋ in eci nfaci ij owi a agb nↄnↄ.
†18:5 Filip e Nyamel a ↄŋ Silas lele Timote ab os is Pↄl. Ow ↄŋ Pↄl sos ok es in e Nyam juma kok ab ɛm. Li kókm juma a eke ow ɛm li bʼɛŋn os a ij. Ɛ̀kn 2 Korɛnt 11.9; Filip 4.14-15; Ob Kok 17.15.
†18:6 lʼufŋ in e mob sus ɛm a e siflefl ab es lʼok wɛl es:ow e nyandrɛ el ɛgŋ ab ecʼijarm. Ɛ̀kn Matie 10.14 lele ow ecʼakr otar ab ab.
†18:8 Bɛ̀bmn Ob Kok 16.15,33.
†18:13 Rom eyŋ ↄŋ abusu eke wɛl ki kok Nyam nuŋ igŋ owi ɛsɛ Jwifɛl ecʼab af, kↄ ow elm Nyam nuŋ igŋ owi fɛŋ gbɛ. Jwifɛl am ok Pↄl ów af aŋke ɛl ecʼa, Pↄl am yɛgm agŋ Nyam nuŋ igŋ owi ɛjeci; ow el low ligbɛl ekʼitm Rom eyŋ ecʼol ab ɛm. Galiↄn gbɛ am oc Pↄl eci low yɛgm a ɛsɛ Jwifɛl ecʼab af.
†18:18 Pↄl ɛdŋ sɛgŋ eb ij nɛny Nyam ecʼany af eke kʼɛgŋm mar, ɛrm sin (Awl 6.1-21). Sakp nↄnↄ Jwifɛl bi kok ɛbɛn Nyam bia ɛlu eci. Ba wɛl bʼɛr sin, ke lɛgŋ a eke wɛl ɛdŋ eb a uwr ŋ̂. Ɛ̀kn Ob Kok 21.24 lele akr otar ab ab yɛji.
†18:25 Bɛ̀bmn Ob Kok 19.3-4.