21
Pↄl aam Jerusalɛm
1 Eke sica sʼɛlu ɛl es a, sʼimn mijɛtŋ ɛm eci, kpɛkŋ kpɛkŋ toŋ sʼok Kↄs lekr ɛm; lɛgŋ bʼɛny a, sʼim sʼok Rod lekr ɛm, ɛtŋ sʼigb yogŋ sʼim sʼok Patara baŋn. 2 Yogŋ, sʼɛŋn mijɛtŋ nyam ekʼam ow im Fenisi ɛtŋ sʼok ɛm sʼim. 3 Sʼɛkn Sipr lekr a kpekpe ɛm, sʼɛcr ow ecʼesr ɛm a, ɛtŋ sʼimn Siri eci. Sʼitr es Tir eci nanu gbɛl a, yogŋ a eke mijɛtŋ a kʼusm in ecʼɛrɛkp ab es a. 4 Yogŋ sʼɛŋn jam ɛsɛl ɛtŋ sʼanŋ ɛl ab ow ij nɛnɛgŋ mum nyam. Eke Abŋ Lala ɛwar ɛl a, -li dad Pↄl eke kʼúyum iim Jerusalɛm. 5 Gbɛkↄ eke nɛnɛgŋ gber mum a oc es a, sʼɛwl sʼebr ɛy ecʼusu im ab ɛm. Ɛl fɛŋ -lʼow -lʼɛwl ɛy, ɛl ecʼↄyↄw lele ɛl ecʼey ab toŋ sʼok ↄkm baŋn a. Okij nɛny yogŋ, sʼok ↄwrↄkp wus si ŋↄŋn Nyam. 6 Eke sica sʼɛlulil es a, sʼok mijɛtŋ ab ɛm ɛtŋ ɛl gbɛ -lʼɛwl -nʼim gbugŋ gbugŋ.
7 Sica eke sʼigb Tir a, sʼim sʼok Pitolemais, ɛtŋ sʼuwar ɛy ecʼusu im mij af ecʼa. Yogŋ sʼɛkanin ɛb ab ɛm ecʼagŋ lisijimɛl ab ab, ɛtŋ sʼanŋ ɛl ab lɛgŋ nyam cɛ. 8 Lɛgŋ bʼɛny a, sʼim sʼok Sesare. Yogŋ, sʼok Amani Mamn a ecʼes ↄmun ɛs Filip ecʼakŋ a ɛtŋ sʼanŋ in ogŋ a. Lʼel agŋ lↄbŋ a eke wɛl sↄsum ot Jerusalɛm a e nyam. †Ɛ̀kn Ob Kok 6.5; 8.5. 9 Nʼↄny ey ↄyↄw yar eke ɛbim egŋ, ke bʼↄb kokoba dad odad eke Nyam bʼↄŋ ɛl a. 10 Sʼanŋ yogŋ ow kok sɛgŋ nↄnↄ toŋ ɛtŋ kokoba ↄb ɛs nyam eke wɛl bʼɛsŋ Agabus †Ɛ̀kn Ob Kok 11.28. anŋ Jude ow. 11 Lʼow ɛy ogŋ a, lʼoc Pↄl eci meb er ɛm a, nʼawŋ in ecʼakr a lele sabu ab ab, ɛtŋ li dad ninɛ: «Kin Abŋ Lala ecʼodad eke am dad: ɛgŋ a eke meb er ɛm na el in ecʼa, Jerusalɛm yogŋ, Jwifɛl bʼow awŋʼn ɛbɛn, ke -lʼoc -lʼɛlu ow agŋ ekʼelm Jwifɛl a abu ɛm.»
12 Eke sʼiri ów amua a, ɛy obi ɛy obi lele Sesare ecʼɛy lisijimɛl ab ab, si ŋↄŋn Pↄl eke kʼúyum iim Jerusalɛm. 13 Gbɛkↄ li dad ninɛ: «Kↄ bla sosiɛm ɛtŋ am ikŋn ↄŋn ↄwarʼm sos es ee? Ɛm, mi bɛbm sos, ow elm ɛm ecʼawŋ a cɛ eci, kↄ ke mʼúw Jerusalɛm Ɛs Kↄtↄkↄ Jesu sosiɛm.» 14 Eke sʼↄtum sʼebmʼn odad ebl ɛm a, sʼatramʼn ij ɛtŋ si dad sʼɛsɛ: «Ke ow él yecʼa ekʼƐs Kↄtↄkↄ am erur a!»
15 Eke sica sʼanŋ yogŋ si kok sɛgŋ bɛb a, si bɛbm sos sʼam uyu sʼimn Jerusalɛm eci. 16 Sesare eci jam ɛsɛl a ow ɛwl ɛy Jerusalɛm; -lʼoc ɛy -nʼim ɛgŋ nyam eke kʼeb ok ɛy akŋ a ogŋ; wɛl bʼɛsŋʼn Minasↄn, Sipr lekr ɛm ecʼɛgŋ ekʼel jam ɛs lɛgŋ kpekpe, ke ir Jerusalɛm. 17 Yogŋ eke sʼok a, ɛy lisijimɛl a eb ɛy sos ɛm iŋn ɛm.
Pↄl im Jak ogŋ a
18 Eke lɛgŋ ɛny a, Pↄl ot ɛy ab im Jak ogŋ a; yogŋ, Nyamel ecʼagŋ ekpekp a fɛŋ as luku. 19 Pↄl ɛsŋn ɛl, ɛtŋ mɛwl ɛm am dad ɛl in e juma ab ɛm ecʼów fɛŋ eke Nyam kok agŋ a ekʼelm Jwifɛl a ecʼaraŋn a. †Ow kʼↄdm Pↄl eci samani a eke am ↄŋ ɛl a, Azi wus af eci Sinyamel a eci ob ap a eke lʼeb a, nʼↄŋ wɛl. Ɛ̀kn 1 Korɛnt 16.1-4; Rom 15.25-28. 20 Eke -lʼirir ow ecʼodad a uwr a, -li kↄklm Nyam; ɛtŋ -li dad Pↄl ninɛ: «Ɛy lisijim, am ɛkn eke Jwifɛl fandi fandi ub Jesu nawrɛ, ke ɛl fɛŋ -li bʼucu ol a -nʼↄny es sɛnyn sɛnyn a. 21 Wɛl dad ɛl eke ŋ bi yɛgm Jwifɛl a fɛŋ ekʼin ir lutu a low eke wɛʼn kʼigŋ Mois ecʼol a in ɛlu es, ɛtŋ ɛmɛny ŋ bi dad wɛl eke wɛʼn kʼúbrm wɛl ecʼey a ekr es, wɛʼn kí kokm Jwifɛl ecʼów a. 22 -Li bʼow -lʼiri tasi eke ŋ ow aŋa. Ayaf si ki kokr ab ee? 23 Ow akpl ke kók ow a eke si bʼow si dadʼŋ a. Aŋa, sʼↄny agŋ yar ekʼij nɛny Nyam ecʼany af. 24 Òc ɛl ab im, ànŋ ɛl ab sos ayal eci low kok ab ɛm, ke sↄ́g ɛl e low kok a e labm, yecʼɛtŋ ke -lʼↄtu -lʼɛr sin. †Jwifɛl bɛb bʼij nɛny Nyam ecʼany af ɛdŋn lɛgŋ eb -li kʼɛgŋmn mar, -li kʼɛrmn sin. Pↄl ɛgŋ eb eke kʼel agŋ yar amua e low kok a ecʼidr ɛs. Ow sosiɛm, egb waw eke wɛl ibrm a (Awl 6.14-15), ow it ke li sↄ́g ow e labm. Sica sos ayal eci low kok a bʼuwr a, ow it ke lʼɛ́war Nyamel gbɛl ab ɛm eci egb waw ɛsɛl a, yecʼɛtŋ ke -li bɛbm sos egb waw a eci. Lɛgŋ ab af anake agŋ yar a bʼow ɛr sin, ke ofŋ sin a lele egb waw ab ab a. Ow ɛm a, agŋ a fɛŋ bʼow uw any eke ów a fɛŋ e wɛl dad ŋ e lís a elm nawrɛ; ow bʼow yɛgm eke ŋ yɛji anŋ Mois ecʼol a ecʼɛlum ɛm. 25 Agŋ a ekʼelm Jwifɛl ke ub nawrɛ a ecʼa, si kok lɛl sʼawŋ ɛl si dad ɛl ów yecʼa eke si bɛbm a. Kin ów a: -li kʼijmn ndey eke wɛl oc wawr egb ↄŋ sɛkp, -lʼɛgŋmn mebl, -lʼijmn ndey eke wɛl okm mebl es, -lʼijmn nfaci.» †Ɛ̀kn Ob Kok 15.20 lele ow ecʼakr otar ab ab.
26 Af yogŋ, Pↄl oc agŋ yar amua ab im, ɛtŋ eke lɛgŋ ɛny a, -nʼim wɛl ab sos ayal eci low kok ab ɛm. †Pↄl eci usu im ɛm a, ɛb ɛb a eke lʼɛc ɛm a ecʼagŋ a elm Jwifɛl; ow ↄŋ lʼaylm Nyam ecʼany af. Ow it eke li kʼayal sos gbuŋ ke lʼɛ́y Nyamel gbɛl ab ɛm. Low kok na bʼeb sɛgŋ lↄbŋ. Ɛmɛny nʼim Nyamel gbɛl ab ɛm ɛtŋ nʼam dad wɛl dedeku ɛm lɛgŋ yecʼaf eke sos ayal eci low kok a bʼow uwr ke wɛl bʼow waw ɛl ɛm ecʼɛgŋ nyam nyam ecʼegb a.†Bɛ̀bmn 1 Korɛnt 9.20.
Wɛl ɛdŋn Pↄl Nyamel gbɛl ab ɛm
27 Eke sos ayal eci sɛgŋ lↄbŋ a am ow uwr a, kpɛkŋ Azi ogog eci Jwifɛl a ɛkn Pↄl Nyamel gbɛl a e gbugŋ a. -Lʼij abra -nʼↄŋ dedeku a fɛŋ ɛtŋ -nʼↄny ow; 28 -nʼam ↄg -li dad -lʼɛsɛ: «Israɛl ecʼagŋ, ɛ̀lumn ɛy abu! Kin ɛgŋ a eke usu fɛŋ, agŋ fɛŋ ecʼany af bi dad ów eŋuŋ ok Israɛl ecʼagŋ af, Mois ecʼol ab af lele Nyamel gbɛl na af ab a. Ɛtŋ sicaca ɛm a, lʼot agŋ ekʼelm Jwifɛl lʼok Nyamel gbɛl ab ɛm; †lʼot agŋ ekʼelm Jwifɛl a lʼok Nyamel gbɛl ab ɛm:Ow itm eke agŋ ekʼelm Jwifɛl a kʼok Nyamel gbɛl a e gbugŋ lokm a. Ɛ̀kn Ezekiɛl 44.7. Yogŋ wɛl nↄn lɛl ekʼam dad ɛsɛ: Eke ɛgŋ ekʼelm Jwif afŋ ereb na es, ke in obi eci luw nʼam ↄl es a. ow ɛm a, -ni ŋuŋn usu lala a Nyam ecʼany af.» 29 Tasi ɛm a, -nʼam dad ɛbɛn aŋke -lʼɛkn Efɛs iy Trofim †Ɛ̀kn Ob Kok 20.4. Pↄl ab ɛb ab ɛm. -Nʼam tutr eke Pↄl oc ɛluʼl Nyamel gbɛl a e gbugŋ lokm a.
30 Likekr a eb es ɛb ab ɛm ɛtŋ ↄy ↄy a fɛŋ ɛm agŋ am anŋ ow. -Nʼↄny Pↄl -lʼↄdu -lʼɛlu ow ↄkm Nyamel gbɛl a e gbugŋ a ɛtŋ kpɛkŋ -li babl masany a. 31 -Nʼam ↄl eke -li kʼibi Pↄl, ɛtŋ kpɛkŋ wɛl im dad Rom e kumada a ekʼanŋ Jerusalɛm a likekr a eke eb es ɛb a fɛŋ ɛm a e low. 32 Kpɛkŋ lʼot srↄda eyŋ lele ɛl ecʼanym ɛsɛl ab ab ɛtŋ lʼuru es nʼim dedeku a ogŋ a. Eke -li bʼɛkn kumada a lele srↄda eyŋ ab ab a, -lʼↄrm Pↄl ij. 33 Kumada a ɛri im titm Pↄl, ↄŋ wɛl ↄnyʼn ɛtŋ ↄŋ abusu eke wɛl kʼoc ŋgbraka yony awŋnʼn; ɛtŋ lʼibrm ɛgŋ yecʼa eke lʼel a lele low yecʼa eke nʼam kok ab ab. 34 Gbɛkↄ dedeku ab ɛm, agŋ amua ám dad odad na, ke bɛb ám dad ɛjeci. Kumada a ↄ́tum irim low a tasi likekr na ɛm; nʼↄŋ abusu eke wɛl kʼoc Pↄl im in eci frutu lakp ab ɛm. 35 Eke Pↄl anŋ êl a ecʼaf uyu usu a, srↄda eyŋ a ocʼr abu ɛm abu ɛm, dedeku a e lɛc ekʼam ɛlu ↄkm a sosiɛm, 36 aŋke agŋ a fɛŋ am usʼr jam ↄg dad ɛsɛ: «Wɛl íbiʼr! Wɛl íbiʼr!»
Pↄl ibrm odad
37 Wanci ab af eke srↄda eyŋ a am ↄl eke kʼↄny Pↄl ɛlu frutu lakp ab ɛm a, li dad kumada a ninɛ: «Kↄ mʼↄny abusu eke mi ki dadʼŋ odad tɛl ee?» Kumada a ninɛ: «Kↄ bʼɛbr Grɛk ee? 38 Njɛ elm Ejipt iy a eke efnɛny a cɛ is ar ke ot áru fandi yar ab im loj ab ee?» †Lɛgŋ ab ɛm a, Rom am ↄny ses babur nↄnↄ Jude eke li kʼɛw es ab ɛm. Low ɛ́gŋm ebm ɛsɛl nↄnↄ anŋ eke bʼat Rom low. 39 Pↄl dad ninɛ: «Ɛm Jwif, wɛl ewʼm Tars ɛb ɛm, Silisi wus af, ɛb ekʼↄny any ecʼɛgŋ. Mʼam ŋↄŋnʼŋ, ↄŋʼm abusu mi dád dedeku a odad.» 40 Kumada a ↄŋʼn abusu. Pↄl inym es êl a ecʼaf uyu usu a ɛtŋ lʼↄwl wɛl abu eke -li ki yewal. Eke -li yewalil a, Pↄl am dad ɛl odad Ebre ɛm: †Ebre ɛbr ɛm:odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ Arame ɛbr ɛm.
†21:8 Ɛ̀kn Ob Kok 6.5; 8.5.
†21:10 Ɛ̀kn Ob Kok 11.28.
†21:19 Ow kʼↄdm Pↄl eci samani a eke am ↄŋ ɛl a, Azi wus af eci Sinyamel a eci ob ap a eke lʼeb a, nʼↄŋ wɛl. Ɛ̀kn 1 Korɛnt 16.1-4; Rom 15.25-28.
†21:24 Jwifɛl bɛb bʼij nɛny Nyam ecʼany af ɛdŋn lɛgŋ eb -li kʼɛgŋmn mar, -li kʼɛrmn sin. Pↄl ɛgŋ eb eke kʼel agŋ yar amua e low kok a ecʼidr ɛs. Ow sosiɛm, egb waw eke wɛl ibrm a (Awl 6.14-15), ow it ke li sↄ́g ow e labm. Sica sos ayal eci low kok a bʼuwr a, ow it ke lʼɛ́war Nyamel gbɛl ab ɛm eci egb waw ɛsɛl a, yecʼɛtŋ ke -li bɛbm sos egb waw a eci. Lɛgŋ ab af anake agŋ yar a bʼow ɛr sin, ke ofŋ sin a lele egb waw ab ab a.
†21:25 Ɛ̀kn Ob Kok 15.20 lele ow ecʼakr otar ab ab.
†21:26 Pↄl eci usu im ɛm a, ɛb ɛb a eke lʼɛc ɛm a ecʼagŋ a elm Jwifɛl; ow ↄŋ lʼaylm Nyam ecʼany af. Ow it eke li kʼayal sos gbuŋ ke lʼɛ́y Nyamel gbɛl ab ɛm. Low kok na bʼeb sɛgŋ lↄbŋ.
†21:26 Bɛ̀bmn 1 Korɛnt 9.20.
†21:28 lʼot agŋ ekʼelm Jwifɛl a lʼok Nyamel gbɛl ab ɛm:Ow itm eke agŋ ekʼelm Jwifɛl a kʼok Nyamel gbɛl a e gbugŋ lokm a. Ɛ̀kn Ezekiɛl 44.7. Yogŋ wɛl nↄn lɛl ekʼam dad ɛsɛ: Eke ɛgŋ ekʼelm Jwif afŋ ereb na es, ke in obi eci luw nʼam ↄl es a.
†21:29 Ɛ̀kn Ob Kok 20.4.
†21:38 Lɛgŋ ab ɛm a, Rom am ↄny ses babur nↄnↄ Jude eke li kʼɛw es ab ɛm. Low ɛ́gŋm ebm ɛsɛl nↄnↄ anŋ eke bʼat Rom low.
†21:40 Ebre ɛbr ɛm:odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ Arame ɛbr ɛm.