1 Erↄd Agripa dad Pↄl ninɛ: «Abusu ɛruʼŋ es eke ki dad odad dogŋn sos.» Ɛtŋ Pↄl igbl abu ogŋ am dogŋn sos sodad amua ɛm: 2 «Ɛb ebu Agripa, sos ɛm am iŋnʼm eke yɛfɛnyna mi kʼow ŋ ecʼany af mi dad odad mi dogŋn sos ów a fɛŋ eke ow af Jwifɛl am cicrʼm a eci. 3 Tasi ɛm a, uw Jwifɛl ecʼɛb ir owi lele ɛl eci ów es atar ab ab any. Ow sosiɛm, mʼam ŋↄŋnʼŋ eke kʼiri ɛm ecʼodad a ɛrm es ok ɛm.

4 Ɛm eci ŋgbafrɛ ɛm ɛtŋ ecʼes eke mʼan a, Jwifɛl fɛŋ uw any; -lʼuw elel eke nuŋ ↄb ɛm ɛtŋ mʼiir ɛm ecʼɛbr a ecʼaraŋn lele Jerusalɛm ab ab any. 5 -Lʼuwʼm any lɛgŋ kpekpe; eke -lʼerur, -lʼↄtu eke -li ki dad low nawrɛ: mʼel Farisiɛl ecʼogog ecʼɛgŋ †Ɛ̀kn Ob Kok 23.6; Filip 3.5. ekʼɛl e Nyam nuŋ igŋ owi ɛw tuↄtuↄ akm ɛl lawlɛl a fɛŋ ecʼa. 6 Ɛtŋ sicaca ɛm mʼanŋ jɛj ok ecʼany af aŋke mʼↄny ↄmn Nyam e low a ekʼɛwar ɛy lagŋɛl ɛw es ab ɛm. 7 Ɛy ecʼeb lɛw yony a ecʼagŋ a yɛji am ↄmn ɛwar na eke kʼɛy ↄkm; ow sosiɛm -nʼam igŋ Nyam nuŋ ari at ɛm, ncok lele lɛgŋ owr ab. Ɛb ebu Agripa, ↄmn ikŋ na sosiɛm ecʼanake Jwifɛl am okʼm ów af a! 8 Ɔny Jwifɛl, ke Nyam ígbm agŋ luw ɛm a, bla ɛtŋ am ubr ekʼow el low ekʼↄtu ee?

9 Ɛm obi yɛji, lɛgŋ sig ɛm a, mʼↄny tutr eke akunda kaka fɛŋ ɛm ow akpl eke mi kʼogŋ Nasarɛt e Jesu e nin a ar. 10 Low na anake mi kok Jerusalɛm a. Egb waw ɛsɛl ɛgbɛl a ↄŋʼm abusu akpasu mum nyam eke mi kʼok ↄmn ɛsɛl nↄnↄ sobel ɛm, ɛtŋ mi bʼɛlu abusu es lɛgŋ eke wɛl bʼↄb ɛl low luw ecʼa. 11 Sakp nↄnↄ mi bʼim Nyam nuŋ igŋ susu mʼↄŋ wɛl ijr ɛl gbre yecʼɛtŋ ke -lʼↄwr sar ɛl ecʼↄmn ↄny ab ɛm. Ɛl ecʼɛrm bebl eke mʼↄny a agb nↄnↄ, toŋ ow bʼↄŋ mʼim sɛb ɛjecʼɛm mʼijr ɛl gbre.»†Ɛ̀kn Ob Kok 8.3; 9.1-2; 22.4-5.

12 «Ɛbɛn lɛgŋ nyam egb waw ɛsɛl ɛgbɛl a ↄŋʼm abusu eke mi kʼim Damas mi kok juma.†Ɛ̀kn Ob Kok 9.1-19; 22.6-16. 13 Ɛb ebu Agripa, mʼus ejagb ɛtŋ lɛgŋ uyu nuŋ ɛm a, mʼɛkn usuayl ekʼanŋ afr am ɛjn ow; jɛjn a afŋn ligbn ecʼab es, ɛtŋ am ok ɛm lele agŋ a eke ɛl ab mʼus ejagb ab ab af. 14 Ɛy fɛŋ sʼok wus ɛtŋ mʼiri lebl nyam ekʼam ikŋ dadʼm Ebre ɛm ɛsɛ: “Sↄl, Sↄl, bla ɛtŋ am ijrʼm gbre ee? Kↄ bla ɛtŋ am ɛlu lɛc ↄkm ɛsɛ id eke in ecʼes ɛw ɛs bʼiyr likŋ af ee? Lɛc ↄfr ↄfr cɛ am ij.” 15 Mʼibrm mʼɛsɛ: “Ɛgŋ gbɛl, kↄ bwo el ŋ ee?” Ɛtŋ Ɛs Kↄtↄkↄ dad ninɛ: “Ɛm Jesu a eke am ij gbre a. 16 Sica ìgb inym es. Mʼɛlu sos ↄkm mi yɛgmʼŋ eke mi kʼocʼŋ el ɛm e juma kok ɛs; bʼow ij ɛm e daŋku dád ok agŋ elel eke ɛkanʼm †elel eke ɛkanʼm:odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ low yecʼa ekʼɛkn a. yɛfɛnyna, ke dád yecʼa eke ɛmɛny mʼow mi yɛgmʼŋ a yɛji. 17 Mʼow mʼↄsuʼŋ Jwifɛl ecʼany af lele agŋ ɛjecʼa eke mʼow mʼɛrmʼŋ ɛl ogŋ ab ab ecʼany af. 18 Mʼam ɛrmʼŋ eke kʼim fig fig ɛl anyamn, ↄny ot ɛl es ncebn ɛm ot ok ɛl usuayl ɛm, Satan ecʼabusu ab ɛm eke -nʼanŋn a ot ↄŋ ɛl Nyam. Eke -li bʼↄny ↄmn ɛm ɛm a, -li bʼow -nʼɛŋn ɛl e sikpl a ecʼoc ap lele es sig usu nyam agŋ a ekʼel Nyam ecʼab ab.” »

19 «Ɛb ebu Agripa, ɛbɛn a, es ɛkn owi a ekʼanŋ afr ow ke mʼɛkn a, mʼɛgbrm ow e low ij. 20 Kↄ mʼikŋ anym mi dad Nyam odad mʼok Damas ecʼagŋ a lele Jerusalɛm ecʼab ab, Jude ecʼagŋ a lele ɛb ɛjecʼɛm ecʼagŋ ab; ɛl fɛŋ, mʼibrm ɛl eke -li kʼitŋn ɛrm ɛm, -lʼɛwl -li lɛr Nyam, ke -li kok ów eke bi yɛgm ɛl ecʼitŋn ikŋ na tasi a. 21 Na sosiɛm anake Nyamel gbɛl a e gbugŋ a eke mʼanŋ a, Jwifɛl ↄnyʼm ke ↄl eke kʼibiʼm a. 22 Gbɛkↄ Nyam ↄsuʼm toŋ it yɛfɛnyna ɛtŋ mʼanŋ eke mi kʼij daŋku agŋ fɛŋ ecʼany af, kʼow el agŋ ekʼↄny any, kʼow el agŋ ekʼↄnym any. Mi dadm odad ɛjeci ekʼow elm kokoba ↄb ɛsɛl lele Mois ab ecʼa eke dad eke bʼow ɛy a cɛ: 23 Mesi a bʼow ij gbre, bʼow el ɛgŋ krɛkrɛ ekʼigb luw ɛm, bʼow ↄb usuayl a e kokoba ok ɛy ecʼɛb a lele ɛbr ɛjeci ecʼagŋ ekʼelm Jwifɛl a.» †Bɛ̀bmn 1 Korɛnt 15.20; Esayi 42.6; 49.6.

24 Eke Pↄl am dad ów in e sos dogŋn ecʼa, Fɛstus barmʼn es lebl tuↄtuↄ ɛm ninɛ: «Pↄl, nuŋ ɛm am uŋʼŋ! Wewr lɛl nↄnↄ toŋ ow am ɛwʼŋ nuŋ ɛm uŋ!» 25 Pↄl dadʼr ninɛ: «Ɛgŋ gbɛl, nuŋ ɛm uŋmʼm. Sodad a eke mʼam dad a el nuŋ ɛm es ok e sodad lele low nawrɛ tasi ab. 26 Ɛb ebu Agripa otar ów amua akr uw any, ow sosiɛm in ecʼany af mʼↄtu eke mi ki dad ↄmn ɛm. Mʼuw any tasi eke lʼuw ów a fɛŋ any, aŋke ow elm es lↄl ɛm e low. 27 Ɛb ebu Agripa, kokoba ↄb ɛsɛl ecʼodad a eke dad a ub nawrɛ ee? Mʼuw any ekʼub nawrɛ!» 28 Agripa dad Pↄl ninɛ: «Am tutr eke lɛgŋ tɛl na ɛm cɛ ↄtu eke kʼitŋnʼm mʼel kretiɛn ee?» †am tutr... kretiɛn ee:odad na Grɛk ɛm wɛl ↄtu ekʼitŋn ɛjecʼɛm dad ɛsɛ Bʼow ↄŋ mʼel kretiɛn caca ɛm! 29 Pↄl dadʼr ninɛ: «Kʼow él lɛgŋ tɛl ɛm oglog sɛgŋ nↄnↄ ɛm, mʼam ŋↄŋn Nyam ekʼow kʼélm ŋ sↄny cɛ, kↄ ↄny fɛŋ ekʼam irir ɛm ecʼodad yɛfɛnyna a anake kʼanŋn ɛsɛ elel eke mʼanŋn ab af a, kↄ ŋgbraka amua gbɛ kʼánm ɛm!»

30 Ɛb ebu a, es ɛw ɛs a, Berenis lele agŋ a eke -nʼanŋn yogŋ ab ab igb, 31 ɛtŋ eke -nʼimn saw ɛm a, -nʼam dadarir ɛl ↄfr ɛm -lʼɛsɛ: «Ɛgŋ na kokm low ↄbr owi ekʼow ɛm li kʼuw, oglog kʼow ɛm wɛl ɛluʼl sobel ɛm.» 32 Ɛtŋ Agripa dad Fɛstus ninɛ: «Blel ɛgŋ na ibram eke kʼɛkn Sesar ana, ke blel wɛl ɛ́luʼl es.»