1 Lɛgŋ ekʼɛc ab ɛm, uwr ↄny ecʼów ↄbr lel ↄny e sikpl ab ab sosiɛm. 2 Ɔny iir ɛb ɛsɛ elel eke wus ecʼagŋ bʼir ɛb ab af; ɛlumn sabusu eŋuŋ ecʼes ɛw ɛs a ekʼin ecʼes ɛw anŋ lɛf ɛm a. Es ɛw ɛs a, in lʼel low ŋuŋ ecʼabŋ a eke caca ɛm a am kok juma agŋ a ekʼɛ́luam Nyam ab ɛm a. 3 Lɛgŋ ab ɛm, ɛy yɛji sʼanŋ ɛsɛ agŋ amua af, ow a eke sʼam ir ɛb ɛsɛ elel ekʼɛy ecʼów aw eŋuŋ bʼↄŋn ɛy ab af a. Sʼɛlum ɛy ecʼów aw eŋuŋ a lel ɛy e sow tutr eŋuŋ ab ab. Ɛtŋ ɛy ecʼelel tasi a eke sʼanŋn a sosiɛm, sʼit eke Nyam eci jɛj ok a kʼↄŋ ɛy sʼabur es ɛsɛ agŋ likpr ab af.

4 Gbɛkↄ Nyam eci sↄrŋ ikŋ a agb nↄnↄ ɛtŋ in ecʼerur eke nʼↄny ɛy ecʼa ↄnym any ↄkŋnin; 5 na sosiɛm anake ɛy eke sʼanŋ ɛsɛ agŋ ekʼuw abŋ ɛm ɛy ecʼów eŋuŋ a sosiɛm a, nʼↄŋ ɛy sʼanŋ owr Krist ab a. Ɛɛ, Nyam e sↄrŋ ikŋ a anake sↄg ɛy a. 6 Jesu Krist ab ecʼaf okr ab ɛm Nyam igbm ɛy luw ɛm, ɛtŋ Krist ab cɛ nʼↄŋ ɛy si sig es afr. 7 Nyam ɛlu in ecʼɛrm mamn eke nʼↄnyn ɛy a ↄkm Jesu Krist ɛm, yecʼɛtŋ ke li yɛ́gm ɛy sɛgŋ fɛŋ in e sↄrŋ ikŋ ligbɛl ab ɛm eci gbreŋgbi eke lʼij a. 8 Tasi ɛm a, in eci sↄrŋ ikŋ ab ɛm anake li sↄg ↄny a, aŋke ↄny ubr nawrɛ. Ow elm ↄny ɛm ow anm owm, kↄ Nyam in obi eci bibm eke ↄŋ ↄny. 9 Sel ɛŋn na, ɛŋnmn in ↄny ecʼów kok ɛm; ow sosiɛm a ɛgŋ kaka kʼɛ́w sos. 10 Tasi ɛm a, Jesu Krist ab ecʼaf okr ɛm anake Nyam kok ɛy a. Li kok ɛy yecʼɛtŋ ke sʼír ɛb ów amamn kok ɛm. Ɛtŋ ów amamn amua, Nyam ikŋ anym bɛbm ɛw es eke si ki kok.

11 Ɔny uwr any eke Jwifɛl el agŋ eke wɛl ubr likr es, ke bʼerur ɛsŋn ɛl sosi “agŋ ekʼubr likr es”. Ɔny ekʼelmn Jwifɛl mew ɛm ɛtŋ a, wɛl ubrm ↄny likr es ɛtŋ ow bʼↄŋ -li bʼɛsŋ ↄny “agŋ ekʼubrm likr es.” Ow sosiɛm, ↄny ↄkan lɛgŋ ab ɛm ecʼob eke eel a: 12 ↄny eel agŋ ekʼuwm Krist any, agŋ eke wɛl awlm Nyam ecʼagŋ ab ɛm, ke anm sinm a fɛŋ eke Nyam ɛwar a e low ɛm, ↄnym low ↄmn kaka, ke uwm Nyam any ɛl ecʼɛb ir ɛm wus af aŋa. 13 Gbɛkↄ sica, Krist ab ecʼaf okr ab ɛm, ↄny eke lɛgŋ ab ɛm kpabr es a, lɛgŋ na ɛm a, Krist eci mebl a ↄŋ ↄny okar af. 14 Ɛɛ, in lʼel ɛy ecʼɛrm es ɛy. Li kok Jwifɛl lel agŋ ekʼelm Jwifɛl ab ab el agŋ nyam coco. Li bubm sifn e lakp a †sifn e lakp a:kʼaw ke ow él brik ɛm lakp a eke Jerusalɛm eci Nyamel ab ɛm bi cɛc usu a ekʼagŋ ekʼelm Jwifɛl itm eke kʼok ɛm, ke el Jwifɛl sↄny eci usu a. eke cɛc ɛl ab es, in eci sos megl a eke li wawr egb olikŋ af ab ɛm. 15 Nʼↄny Mois ecʼol a ecʼes ɛw a lel ow ecʼów kpɛti kpɛti ab ab lʼↄwr es. Ɛtŋ Jwifɛl lel agŋ ekʼelm Jwifɛl ab ab, li kok wɛl el agŋ nyam coco ekʼokr af in ab, ɛtŋ ɛbɛn a ow el ɛrm es ɛy. 16 In ecʼolikŋ af e luw ab ɛm, nʼↄny Jwifɛl lel agŋ ekʼelm Jwifɛl ab ab lʼokr af el sos megl nyam coco ɛtŋ nʼↄny lʼokr wɛl ɛm Nyam ab, ɛtŋ ɛbɛn a lʼibi ifanin. 17 Ow am yɛgm eke Krist, ɛrm es ɛy ecʼAmani Mamn e kokoba lʼow lʼↄb lʼok ↄny ekʼelm Jwifɛl ke kpabr es Nyam e lís a, lele Jwifɛl eke titm Nyam ab ab. †Bɛ̀bmn Esayi 57.19. 18 Tasi ɛm a, Krist ɛm anake si kʼɛcr ɛy fɛŋ, Jwifɛl lel agŋ ekʼelm Jwifɛl ab ab, ke sʼↄ́tu si titm Nyam ɛy Ɛs, Abŋ Lala nyam a cɛ ecʼabu ɛlum ɛm.

19 Ow sosiɛm a, ↄny ekʼelmn Jwifɛl a, elmn etu agŋ ij oglog gbeŋ ecʼagŋ. Kↄ ↄny anŋn Nyam ecʼagŋ lala ab ɛm, ↄnyn ów a fɛŋ ecʼabusu ɛtŋ eel Nyam e bosu ab ɛm ecʼagŋ. 20 Sica ↄny eel êl a ekʼin eci misigrer a el Krist ecʼɛrm ɛsɛl a lele kokoba ↄb ɛsɛl ab ab a. Ɛtŋ lↄy ɛm eci lebn tasi a, el Jesu Krist in obi. 21 Krist ab ecʼaf okr ɛm anake êl a eci mebn a fɛŋ bʼokr af inym es kikri a. Ɛtŋ in cɛ li bʼↄŋ êl a agb el Nyamel lala eke Ɛs Kↄtↄkↄ oc ɛw saw. 22 Eke okar af Krist ab a sosiɛm anake ↄny yɛji anŋn êl a eke wɛl us ab ɛm a. Ɛtŋ agŋ likpr a fɛŋ ab, okar af eel êl eke Nyam ɛcr in ecʼAbŋ ab ɛm ir ɛm.