Pↄl e lɛl ekʼawŋ Galat eyŋ
Ów ekʼit eke wɛl kʼuw any
Pↄl nↄn lɛl na awŋ Sinyamel ekʼanŋ Galasi wus af a. (Yɛfɛnyna ɛm a, Galasi wus na anŋ Turki ɛm). In obi li sigm Sinyamel amua ɛm e bɛb es, gbɛkↄ eke nʼŋgboŋ wus ab af a, low yɛgm ɛsɛl ɛjeci ow am ↄny yecʼa eke li yɛgm Jesu Krist ecʼAmani Mamn a e lís a titŋn. Low yɛgm ɛsɛl amua el Jwifɛl eke ɛgŋ Jesu eb, ke am at nɛny es dad eke nawrɛ ub ɛs in it eke in kʼanŋ Jwifɛl ecʼol a fɛŋ ecʼɛlum ɛm: ow it ke wɛl úbrʼr likr es, lʼɛ́lum sol ekʼel ob ij ecʼa, ke lʼↄ́su ses gbɛgbl e sɛgŋ a. Agŋ amua am dad yɛjʼeke Pↄl in elm ɛrm ɛs tasi ɛtŋ owʼn itm eke wɛʼn kʼiri ow ecʼodad a.
Pↄl nↄn lɛl awŋ Galat eyŋ, yecʼɛtŋ ke nʼↄ́ŋ Krist e nawrɛ ub ɛsɛl a uw Amani Mamn eci low nɛnyɛmbri nyam ab any. Lʼikŋ anym lʼotar low nuŋ af ekʼow it eke wɛl kʼɛsŋʼn Jesu Krist ecʼɛrm ɛs a e low akr. Nʼam at nɛny es li dad eke Nyam in ɛsŋʼn, kↄ owʼn elm agŋ. Ɛmɛny nʼam otar akr eke in e juma a tasi in el ke in óc Amani Mamn a in yɛgm agŋ a ekʼin elm Jwifɛl a. Ow ↄŋ nʼam yɛgm eke ↄmn a cɛ eke wɛʼn bʼoc in ɛlu Jesu Krist ɛm a, in bʼↄŋ agŋ in el nyim nyim Nyam ecʼany af. In e lɛl a ecʼeŋ es abal el ɛm a, Pↄl am yɛgm eke nawrɛ ub ɛs ecʼes an a e nuŋ in el erur eke owʼn ↄny Jesu Krist ecʼa lel ↄmn a eke owʼn oc in ɛlu ow ɛm ab ab. Eke nawrɛ ub ɛs nyam bʼↄny erur na lele ↄmn na ab a, in ecʼes an a bʼow ɛy ↄkm in obi ɛm.
1
Ɛsŋn
1-2 Ɛm Pↄl, lel ɛm lisijimɛl a fɛŋ ekʼanŋ aŋa ab ab e nin ɛm, mʼam awŋ Galat e Sinyamel a lɛl na. Mʼel ɛrm ɛs, gbɛkↄ ow elm agŋ mum oglog ɛgŋ kaka fɛŋ ɛwmʼm ɛrm ɛs. Tasi ɛm a, Jesu Krist in obi lel Ɛs Nyam ekʼigbmʼn luw ɛm ab ab, ɛwʼm ɛrm ɛs. 3 Ke Nyam ɛy Ɛs lel Ɛs Kↄtↄkↄ Jesu Krist ab ɛ́dŋ ↄny ↄwrↄ ke ɛ́ŋan ɛrm es ɛy. 4 Ɛs Kↄtↄkↄ Jesu ɛwr in sosi awoba, yecʼɛtŋ ke lʼéb lʼɛlu ɛy es ɛy e sikpl ab ɛm. Li sↄg ɛy wus na e suŋ ab ɛm, ɛsɛ elel eke Nyam ɛy Ɛs erur ab af. 5 Anygbɛl él Nyam eci sɛgŋ fɛŋ! Amɛn.
Amani Mamn tasi a
6 Nyam ɛsŋ ↄny bibm a ekʼɛŋan Krist sosiɛm a eci; sica ow am ɛwʼm any iti eke kʼupŋn in ij fafa nɛnɛ, ke ɛ́wal am lɛɛr “Amani Mamn” ɛjeci nyam. 7 Nawrɛ ɛm a, Amani Mamn tasi ɛjeci anm; agŋ gbɛ anŋ ekʼam wuwal ↄny nuŋ ɛm, ke am erur ekʼitŋn Amani Mamn a eke bi dad Krist ecʼodad a. 8 Na sosiɛm, ekʼɛgŋ kaka fɛŋ am dad ↄny Amani Mamn ɛjeci ekʼelm ow a eke si dad ↄny a ecʼodad, ke Nyam ógŋ ↄwlʼl, ekʼow el ɛy oglog ɛrm ɛs nyam ekʼanŋ afr ow bↄbↄ yɛji. 9 Mʼikŋ anym mi dad ɛtŋ ɛmɛny mʼam dadr ɛm: ekʼɛgŋ kaka fɛŋ am dad ↄny Amani Mamn ɛjeci ecʼodad ekʼótarm es yecʼa eke sʼↄŋ ↄny ab ab, ke Nyam ógŋ ↄwlʼl.
10 Sica kↄ agŋ ecʼaw eke kʼawʼm a mʼam ↄl es, kↄ Nyam ecʼab ee? Kↄ agŋ mʼam ↄl eke kʼerurʼm ee? Njaŋ! Blel mʼam ↄl ekʼagŋ kʼↄny ɛm ecʼerur ana, mi kʼↄtum mʼelm Krist e libↄwi.
Elel eke Pↄl eel ɛrm ɛs
11 Agŋ lisijimɛl, mʼam dad ↄny eke kʼuwr any ekʼAmani Mamn a eke mʼↄb mʼok ↄny a, elm ɛgŋ e low eke ↄkn. 12 Ow elm ɛgŋ ogŋ mʼebm, ɛtŋ ɛgŋ kaka fɛŋ yɛji yɛgam im ow e low, kↄ Jesu Krist in obi ɛlu ow e low ↄkm yɛgmʼm. † Pↄl e lís e low ecʼa, ɛ̀kn Ob Kok 9.3-6.
13 Ɛtŋ irir wɛl dad ↄny elel eke mi kokr lɛgŋ ab ɛm eke mʼanŋ Jwifɛl e Nyam nuŋ igŋ ebr ab ɛm a e low. Uwr elel eke mʼijr agŋ a fɛŋ ekʼel Nyamel ecʼagŋ a gbre, ke mʼɛw lɛc ɛm eke mi ki ŋuŋn ɛl ab any. 14 Lɛgŋ ab ɛm a, wɛl bʼɛkn tasi, eke mʼafŋ ɛm lawlɛl a fɛŋ ekʼel ɛm ecʼↄwↄrŋ ab es, Jwifɛl e Nyam nuŋ igŋ ebr a ecʼów fɛŋ e kok ɛm. Mʼↄny lɛc mʼakm ɛl fɛŋ ɛy lagŋɛl e Nyam nuŋ igŋ ebr ab ɛm e sol esig e dogŋn owi ɛm.
15 Gbɛkↄ, gbuŋ ke wɛl éwʼm a ɛtŋ Nyam sↄsum ocʼm in eci sↄrŋ ikŋ ab ɛm, ɛtŋ lʼɛsŋʼm eke mi ki kok in e juma. 16 Ɛtŋ eke lʼɛgŋ lʼeb eke li kʼɛlu Jim ↄkm li yɛgmʼm, yecʼɛtŋ ke mʼↄ́tu mʼim mʼↄb in ecʼAmani Mamn a e kokoba mʼok agŋ ekʼelm Jwifɛl a, mʼiim mʼibram ɛgŋ kaka eke ki yɛgmʼm low. 17 Ɛtŋ mʼɛwlm mʼiim Jerusalɛm mʼɛknm agŋ a ekʼikŋ anym el ɛrm ɛsɛl gbuŋ ke ɛm yɛji mʼel a; kↄ kpɛkŋ mʼↄkŋ any mʼim Arabi wus af, yogŋ anake mʼanŋ mʼɛwl mʼow Damas ɛb ɛm a. 18 Akpo nyahan ɛc gbuŋ ɛtŋ mʼim mʼɛy Jerusalɛm; yogŋ anake mʼuw Piɛr † Piɛr:Arame ɛbr ɛm a, Kefas. any, ke mʼanŋ in ab toŋ sɛgŋ lɛw yen a. 19 Mʼɛknm ɛrm ɛs ɛjeci kaka, ekʼow elm Ɛs Kↄtↄkↄ lisijim Jak cɛ. 20 Low na eke mʼam awŋ ↄny ow e lɛl a, el low nawrɛ tasi; mʼam eb Nyam daŋku ekʼow elm yadŋ mʼↄnym.
21 Ow e jam a, mʼim Siri lele Silisi ab eci wus ab af. 22 Gbɛkↄ Jude ecʼagŋ a ekʼub Krist nawrɛ a, kʼɛknm im any af lɛgŋ kaka. 23 Low cɛ eke -lʼirir wɛl dad ɛm e lís a el: «Ɛgŋ a eke lɛgŋ sig ɛm a, bʼijr ɛy gbre a, lɛgŋ na ɛm am dad Amani Mamn a eke sʼub nawrɛ ke lʼerur eke li ki ŋuŋn a e low.» 24 Ɛtŋ -nʼam kↄklm Nyam ɛm sosiɛm.