2
Sel ɛŋn a eke wɛl dad ow e low a ↄny any nↄnↄ
Low na sosiɛm a, ow it eke si kʼoc ɛrm sʼɛw sodad eke sʼiri ab af; eke ow elm ɛbɛn, si bʼow sʼitir ejagb any. Nyam ɛcr afr ɛrm ɛsɛl ɛm ↄŋ agŋ in ecʼodad a, ɛtŋ lʼɛlu odad a e nawrɛ ekʼel a ↄkm tasi. Low na el ol a eke Sinayi lafɛny af, wɛl ↄŋ Israɛl eyŋ a. Agŋ bɛb ɛgŋm usrmʼn sos, ɛgŋm ɛluamʼn, ɛtŋ ɛl fɛŋ -nʼɛŋn gbre a ekʼit eke kʼɛŋn ɛl a. Sica ɛy, ayaf si bʼow sʼaru gbre na sʼɛgb es, eke si bʼigŋ sel ɛŋn ligbɛl na sʼɛlu es ee? Sel ɛŋn na, Ɛs Kↄtↄkↄ anake ikŋ anym ↄb in ecʼamani a. Ɛtŋ agŋ a eke iri wɛl dad sel ɛŋn na e low a, ɛlu in e low nawrɛ e lʼel a ↄkm. Nyam in obi yɛgm eke ɛl e sodad a el nawrɛ, mɛny ɛwr, ów ɛgbɛl, lele sakrowa ɛrŋ ɛrŋ eke bʼiti any ab ɛm. Ɛmɛny Nyam yɛgm eke ow el nawrɛ Abŋ Lala ecʼob ap ɛrŋ ɛrŋ a eke li cɛc agŋ ɛsɛ elel eke lʼerur ab af ab ɛm.
Jesu uw ɛy fɛŋ eci
Sʼam dad wus eke kʼow a e low. Ow elm afr ɛrm ɛsɛl Nyam ↄↄm abusu eke kʼɛw wus na es. Tasi ɛm a, ow eke wɛl bʼɛŋn Nyam Lɛl ɛm a el:
Kↄ agŋ bla -lʼel eke kʼɛw ɛl e low ɛrm ee?
Bla -lʼel eke ki kok ɛl e lís owi ee?
Ɛw ɛl afr ɛrm ɛsɛl ecʼew lɛgŋ tɛl eci,
ↄŋ ɛl anygbɛl lele sos usr ab ɛsɛ es ɛw tufɛ af,
ot ów a fɛŋ ɛw es ɛl ecʼakr ew, ɛl ecʼes ɛw ew. Selu 8.5-7.
Nyam ↄŋ agŋ abusu ob ob fɛŋ af. Lʼɛgbm ob kaka es eke anm wɛl ecʼabusu ab ɛm. Gbɛkↄ yɛfɛnyna, sʼam ɛkn tasi, agŋ kʼↄnym abusu ob ob fɛŋ af. Kↄ bla anake ɛy yɛji sʼam ɛkn ab ee? Jesu anŋ sɛgŋ bɛb afr ɛrm ɛsɛl ecʼew, kↄ sica, Nyam ↄŋʼn anygbɛl lele sos usr ab ɛsɛ es ɛw e tufɛ af. Bla ecʼee? Aŋke lʼij gbre ɛtŋ lʼuw yɛji. Ow ↄŋ ɛtŋ Nyam ecʼɛrm mamn ɛm, Jesu uw agŋ fɛŋ eci. 10 Nyam anake kok wus a ɛtŋ wus anŋ in eci. Kↄ lʼerur ekʼin ecʼey ab ɛm e nↄnↄ ligbɛl kʼanŋ in ecʼanygbɛl a e low ɛm. Ɛtŋ ekʼow el Jesu ekʼam ot im ɛl sel ɛŋn a ogŋ a, ow it eke Nyam kʼoc gbre ijr ɛm ↄŋʼn lʼiy nɛny lʼigŋ nuŋ.
11 Jesu bʼↄny agŋ fɛŋ e sikpl a oc ɛl es lís. Ɛtŋ ɛbɛn a, ɛgŋ eke bʼayal agŋ a lele agŋ a eke wɛl ayal ab ab ɛl fɛŋ bʼↄny ɛgŋ Ɛs nyam. Na sosiɛm ow ↄnymʼn ɛ́s eke li kʼɛsŋ wɛl lisijimɛl. 12 Tasi ɛm a, Jesu dad Nyam ninɛ:
Mi bʼow mʼↄb ŋ e nin a ecʼamani mʼok ɛm lisijimɛl.
Dedeku ecʼaraŋn, mi bʼow mi kↄklmʼŋ. Selu 22.23.
13 Ɛmɛny Jesu cɛ, li dad ninɛ:
Ɛm, mi bʼow mʼoc ɛm ecʼↄmn a nimum nimum mʼɛlu Nyam ɛm.
Ɛmɛny ninɛ:
Kin ɛm lele ey a eke Nyam ↄŋʼm ab ab. Ɛ̀kn Esayi 8.17, Sɛptant ɛm ecʼodad eke wɛl oc.
14 Ey amua ↄny low nyam eke okr ɛl af: -lʼel agŋ ekʼↄny sos megl lele mebl ab. Agn ↄny abusu eke kʼibi ɛl. Na sosiɛm, Jesu, in yɛji itŋn el ɛgŋ, yecʼɛtŋ ke nʼↄny agn eci lɛc a lʼoc es in obi eci luw ab ɛm. 15 Agŋ ekʼanŋ ɛsɛ madu af ɛl ecʼowr anŋ a nimum ɛm, luw eci muru eke -nʼↄnyn a sosiɛm a, Jesu sↄg ɛl in e luw ab ɛm. 16 Tasi ɛm a, lʼowm afr ɛrm ɛsɛl eci abu ɛlum eci, kↄ lʼow agŋ ekʼel Abraham ecʼalaw a ecʼabu ɛlum eci. 17 Na sosiɛm anake ow it eke li kʼitŋn nimum nimum lʼot lisijimɛl lele lisijↄwɛl ab es, yecʼɛtŋ ke lʼél wɛl ecʼegb waw ɛs ligbɛl, eke ɛrm mamn iy ɛm gbↄŋ ke el cɛcɛ Nyam e juma kok ab ɛm, ke bʼɛŋn agŋ e sikpl oc ap ecʼabusu a. 18 Ɛtŋ eke Jesu in obi ij gbre ɛbm ɛkn ɛm a, lʼↄtu eke li kʼatm agŋ a fɛŋ eke ɛl yɛji wɛl bʼɛbm ɛkn a abu.

2:2 Low na el ol a eke Sinayi lafɛny af, wɛl ↄŋ Israɛl eyŋ a.

2:8 Selu 8.5-7.

2:12 Selu 22.23.

2:13 Ɛ̀kn Esayi 8.17, Sɛptant ɛm ecʼodad eke wɛl oc.