Jak e lɛl ekʼawŋ
Ów ekʼit eke wɛl kʼuw any
Bwo el Jak ee? Lʼel ɛy Ɛs Kↄtↄkↄ Jesu lisijim (Matie 13.55, Mark 6.3, Galat 1.19, 1 Korɛnt 15.7). Lʼel Jerusalɛm e Nyamel a ecʼidr ɛsɛl ab ɛm e nyam (Ob Kok 15.13-21, Galat 2.9). Jak nↄn lɛl na awŋ Israɛl ecʼeb lɛw yony a, gbɛkↄ ow elm Amani Sig ɛm ecʼeb lɛw yony a. Aŋa ow el Jwifɛl a ekʼitŋn ɛrm ɛm el Jesu eci, ke gbre ijr a sosiɛm anŋ Palɛstin ok ↄkm ↄmu es im ir susu ɛjecʼa oglog, Krist eci jam us ɛsɛl fɛŋ ekʼel Nyamel ekʼusr Israɛl ekʼel Nyam ecʼagŋ a usu a. Jak ecʼa, agŋ amua anake el Nyam ecʼagŋ tasi a. In e lɛl ab ɛm, nʼam dad wɛl eke wɛl kʼusur ɛrm gbre ij ɛm, wɛl el ɛsɛwru, wɛl is es ke wɛl kok low ɛsɛ elel eke ↄmn bʼerur ab af. Nʼam ɛwar egbreŋgbi eke kʼocm ɛl ecʼos a ɛwrm sos ow af ɛtŋ nʼam atr ↄgbↄru sos es.
Nuŋ krɛkrɛ ab ɛm, Jak am ɛlu in e lɛl ab ɛm ecʼów a eke li bʼow li dad a e low ↄkm. Nuŋ yony ɛm a, nʼam dad agŋ lisijimɛl a eke kʼɛw sos ɛrm, yecʼɛtŋ ke -li kʼusrmn egbreŋgbi sos -lʼakamn ↄgbↄru. Kↄ tasi ɛm ow it eke -li kʼɛlum ↄgbↄru abu aŋke -lʼel agŋ eke egbreŋgbi a bʼeb ɛl ecʼabu ɛm ecʼob fɛŋ. Nuŋ 3.1 toŋ nuŋ 4.12 ɛm a, Jak am dad agŋ a eke bʼocr ɛl sosi ɛsɛwru, ke am erur eke ki yɛgm agŋ ɛjecʼa Nyam odad a, aru sos ɛw lele ów es atar ab ɛgb es, ke ɛw ɛrm sodad eke -li bʼow -li dad ab af. Nuŋ 4.13 toŋ nuŋ 5.6 ɛm a, nʼam ɛwar egbreŋgbi eke kʼɛw ɛrm sos ɛw lele ɛnyɛmbri yony yony owi ab e lís.
Lɛl a ecʼuwr ɛm a, nʼam ↄkn wɛl eke wɛl kʼinym es kikri gbre ijr ɛm, ke wɛl ŋↄ́ŋn Nyam agŋ a ekʼanŋ sos es ↄw ɛm a lele ↄ́lu ab eci.
1
Ɛsŋn
1 Ɛm Jak, Nyam lele Ɛs Kↄtↄkↄ Jesu Krist ab e juma kok ɛs, mʼam ɛsŋn ↄny fɛŋ ekʼeel eb lɛw yony a †Eb lɛw yony:Jak am nↄn lɛl awŋ Jwifɛl fɛŋ ekʼel Krist e jam us ɛsɛl krɛkrɛ ekʼanŋ Palɛstin ok ↄkm ↄmu es im anŋ susu ɛjecʼa, oglog Krist eci jam us ɛsɛl fɛŋ ekʼel Nyamel ekʼusr Israɛl, ekʼel Nyam ecʼagŋ a usu. eke ↄmu es wus na nimum af a.
Gbre ɛm ecʼↄmn ↄny lele sɛwr ab
2 Krist ɛm ecʼagŋ lisijimɛl, eke bʼↄbar gbre, es abur akpasu akpasu a, ke sos ɛm íŋn ↄny, ánŋn ehe ɛm, 3 aŋke ɛsɛ elel eke ↄny yɛji uwr any ab af, eke ↄny eci Nyam ecʼↄmn a eke ↄnyn a bʼakm ɛbm ɛkn es a, ow bʼↄŋ ↄny ɛrm susu ínymn es kikri. 4 Ìnymn es kikri kpɛkŋ low low fɛŋ ɛm, yecʼɛtŋ ke ↄny e low kok fɛŋ ɛm íyr nɛny igŋn nuŋ, ke kʼↄ́nymn low kaka fɛŋ ecʼes abur. 5 Kↄ eke ↄny ɛm ecʼɛgŋ nyam ↄnym sɛwr eke kʼuw elel eke li ki kokr ke nʼínym es kikri ɛbm ɛkn owi ɛm a, lʼíbrm Nyam, ke ow yɛ́gmʼn, aŋke Nyam el ɛrm mamnu ekʼↄ́ↄm ɛgŋ ob kaka ŋkpɛs ɛm. 6 Gbɛkↄ ow akpl ke lʼíbrm ↄmn ɛm, ke bɛbar kʼánm ɛm. Ɛgŋ eke bi bɛbar a, anŋ ɛsɛ okij e mra eke lɛf bʼↄny didm es ab af. 7-8 Ɛgŋ ikŋ na kí tutr eke Ɛs Kↄtↄkↄ bʼow ↄŋʼn yecʼa eke nʼam ibrm a, aŋke lʼel ɛgŋ eke ucum low nyam ↄnym es ke bi cɛcm any in ecʼes an ɛm.
Gbↄr lele ob ↄny ab
9 Ke Krist eci jam us ɛs ekʼↄnym ob a ntotŋ ók eke Nyam ↄny igblʼl ogŋ a sosiɛm. †Nyam ↄny igblʼl ogŋ:Krist eci jam us ɛs eke bi kok Nyam juma tasi a, it ekʼuw any eke, eke lʼel gbↄru wus af aŋa yɛji, ke Nyam anake sↄsum ocʼr a; afr ow bʼow ↄŋʼn ob ↄny ekʼel in ecʼehe. Ɛ̀kan 4.10; Efɛs 2.6-7. 10 Ke Krist eci jam us ɛs ekʼↄny ob a, yɛji sos ɛm íŋn eke Nyam ↄny isʼr es a sosiɛm. †Nyam ↄny isʼr es:ow it eke gbreŋgbi kʼúw any eke, wus af aŋa in ecʼob ↄny a bʼow ɛc. Eke lʼuw na any a, ke afr li bʼow nʼɛŋn ehe, ekʼel in ecʼob ↄny tasi. Ow it eke li kʼuw any eke in ecʼob ↄny a elm low kaka wus af aŋa, ɛtŋ in obi bʼow ɛc ɛsʼelel eke suw mamn bʼuw es kpab ɛy wus ab af. 11 Ɛsɛ elel eke ligbn bʼafŋ ↄnyn suw, ke bi wɛwr in e dↄdↄ ab es, ke suw eci sakpl a bʼirm a, ɛbɛn nɛnyɛmbri nyam gbreŋgbi yɛji bʼow uw digŋ in e sijuma ok es.
Ɛbm ɛkn lele mɛju ab
12 Ehe él ɛgŋ eke bʼinym es kikri ɛbm ɛkn owi ɛm a eci. Eke nʼinym es kikri a sosiɛm Nyam bʼow ↄŋʼn sel a †Grɛk ɛm a sel a ke sel ɛŋn e tufɛ: ow el any eb e mɛny ɛwr, ekʼel ɛbm ɛkn eke wɛl bʼakm es ecʼob ap eke wɛl bʼɛŋn. eke lʼɛwar agŋ ekʼerur ir a. 13 Eke mɛju ow ɛgŋ ɛm a, ke li kí dad li kʼɛsɛ: «Nyam anake ɛjuʼm a», aŋke Nyam mɛju owi anm in ɛm. Ow sosiɛm lʼɛ́jum ɛgŋ kaka. 14 Sica eke ɛgŋ ɛy mɛju owi ɛm, ke in obi in obi ecʼów tutr eŋuŋ anake ↄŋʼn lʼↄgŋ meb a. 15 Ɛtŋ ɛmɛny ów tutr eŋuŋ eke bʼanŋ ɛgŋ ɛm ow a, bʼis ɛgŋ sikpl. Ɛtŋ ca eke sikpl a bʼagb afŋn es a, ow bʼism ɛgŋ luw ab. 16 Erur ɛm ecʼagŋ lisijimɛl, kʼɛ̀jurir ↄny sosi: 17 sob ap amamn fɛŋ bʼanŋ Nyam ogŋ ow; Nyam ekʼel usuayl eci kok ɛs a ogŋ ow bʼanŋ ow; in ɛm low itŋn kaka anm; nʼam titŋnm ɛsɛ usuayl lele ncebn ab af. 18 In obi lʼerur, ɛtŋ nʼↄŋ ɛy sel in ecʼodad ebl nawrɛ ab ɛm, yecʼɛtŋ ke sʼél mob mob fɛŋ eke li kok anŋ owr a e krɛkrɛ.
Ɛ̀gŋ Nyam ecʼodad eb ke án es af
19 Erur ɛm ecʼagŋ lisijimɛl, sica ɛgŋ nyam nyam fɛŋ ígŋ lↄru es iri low ok es sos ɛm, nↄ́fr odad ke kʼéblm ɛrm fafa, 20 aŋke ɛrm bebl bʼↄŋ ɛgŋ am kokm low ekʼel nɛnyɛmbri nyam Nyam ecʼany af. 21 Na sosiɛm, ìgŋn low ŋuŋ fɛŋ eke bi ŋuŋn ↄny ecʼes an a ɛlul es, ke ébr ɛrm es ɛy ɛm, Nyam ecʼodad eke wɛl dad ↄny ekʼↄtu eke kʼeb ↄny ecʼabŋ ɛlu es a.
22 Kʼɛ̀jurir ↄny sosi ki dadr kʼɛsrɛ: «Sʼírir Nyam ecʼodad a cɛ»; kↄ kòkr ɛsɛ elel eke irir ab af. 23 Kↄ ɛgŋ ekʼam iri odad a ke ↄ́sum a, anŋ ɛsɛ ɛgŋ ekʼam ɛkan in sosi akrↄŋnↄ ɛm elel eke nʼanŋn, 24 ke ca li bʼↄny any lʼoc es ke kpɛkŋ li bʼijl elel eke nʼanŋn ab es a. 25 Kↄ ɛgŋ eke bʼɛw ol sↄbↄ a eke bʼↄŋ ɛgŋ el lewi a †ol sↄbↄ a eke bʼↄŋ ɛgŋ el lewi a:ke Nyam ecʼodad a nimum ana. Ɛtŋ ekʼɛgŋ bʼɛlum Nyam ecʼodad a, ke nʼanm sikpl kok owi ɛm ij. ɛrm, ke bʼucu ↄny es, ke ám dadm ɛsmɛ: «mʼíri cɛ», ke bʼɛw ɛrm af kok a, bʼow ɛŋn Nyam ecʼↄwrↄ in ecʼów kok ɛm.
26 Eke ɛgŋ bi tutr eke lʼel Nyam nuŋ igŋ ɛs, ɛtŋ lʼɛ́wm ɛrm in ecʼodad dad ɛm a, nʼam ɛjur in sosi, ɛtŋ in e Nyam nuŋ igŋ a el ↄfr ↄfr. 27 Kin yeci ekʼel Nyam nuŋ igŋ nawrɛ tasi Nyam ɛy Ɛs ecʼany af a: ke ɛ́w uwiyŋɛl lele eŋnyↄw ekʼanŋ gbre ɛm a e low ɛrm, ke ↄ́su sos wus na e sikpl owi ɛm.
†1:1 Eb lɛw yony:Jak am nↄn lɛl awŋ Jwifɛl fɛŋ ekʼel Krist e jam us ɛsɛl krɛkrɛ ekʼanŋ Palɛstin ok ↄkm ↄmu es im anŋ susu ɛjecʼa, oglog Krist eci jam us ɛsɛl fɛŋ ekʼel Nyamel ekʼusr Israɛl, ekʼel Nyam ecʼagŋ a usu.
†1:9 Nyam ↄny igblʼl ogŋ:Krist eci jam us ɛs eke bi kok Nyam juma tasi a, it ekʼuw any eke, eke lʼel gbↄru wus af aŋa yɛji, ke Nyam anake sↄsum ocʼr a; afr ow bʼow ↄŋʼn ob ↄny ekʼel in ecʼehe. Ɛ̀kan 4.10; Efɛs 2.6-7.
†1:10 Nyam ↄny isʼr es:ow it eke gbreŋgbi kʼúw any eke, wus af aŋa in ecʼob ↄny a bʼow ɛc. Eke lʼuw na any a, ke afr li bʼow nʼɛŋn ehe, ekʼel in ecʼob ↄny tasi.
†1:12 Grɛk ɛm a sel a ke sel ɛŋn e tufɛ: ow el any eb e mɛny ɛwr, ekʼel ɛbm ɛkn eke wɛl bʼakm es ecʼob ap eke wɛl bʼɛŋn.
†1:25 ol sↄbↄ a eke bʼↄŋ ɛgŋ el lewi a:ke Nyam ecʼodad a nimum ana. Ɛtŋ ekʼɛgŋ bʼɛlum Nyam ecʼodad a, ke nʼanm sikpl kok owi ɛm ij.