Pↄl e lɛl ekʼawŋ Filip eyŋ
Ów ekʼit eke wɛl kʼuw any
Filip el Maseduan ecʼɛb nyam ekʼanŋ Grɛs wus af. Lʼel Rom e sɛb a eke ɛw es a e nyam. Filip eyŋ ntotŋ bʼok eke -lʼeel Rom ecʼes ɛw a ecʼagŋ. Ow sosiɛm, -li bi sus mob ɛsɛ Rom eyŋ af ɛtŋ -li bʼerur Latɛn eke el wɛl ecʼɛbr a ecʼɛbr. Filip ɛb ab ɛm, Jwifɛl ijm abi. -Lʼufum es yɛji -lʼijm agŋ lɛw a eke bʼↄŋ abusu ke -li bʼↄny Nyam nuŋ igŋ usu a. Eke Pↄl am ɛc ↄb Amani Mamn eci kokoba sakp yony ɛm ecʼa, ow ɛm li sigm Nyamel es Filip ɛb ɛm (ɛ̀kn Ob Kok 16.11-40). Nyamel ab ɛm, agŋ a eke elm Jwifɛl a ufu es nↄnↄ.
Pↄl eci juma kok ɛc ab ɛm, es ɛw ɛsɛl ɛwʼr abu af. Eke Filip eci Nyamel a iri eke Pↄl anŋ sobel ɛm a, -li kok ob ap -nʼↄŋ ɛl ɛm ecʼɛgŋ nyam eke wɛl bʼɛsŋ Epafrodit a im ↄŋ ow. Ow ↄŋ, Pↄl nↄn lɛl na eke kʼɛlu ɛl bia, ke nʼↄ́ŋ wɛl in e lís ecʼamani yɛji. Eke batŋ ow el sobel ɛm Pↄl anŋ nↄn lɛl a yɛji, in eci lɛl a eci liy a el kretiɛn eci sos ɛm iŋn eke bʼↄny eke ow el ses babur nↄnↄ ecʼany af bↄbↄ yɛji.
Sica Filip eci Nyamel ab ɛm, irirm nↄnↄ anŋ Nyam nuŋ igŋ ɛsɛl a ecʼaraŋn. Pↄl am dad ɛl eke -li kʼeb Krist eci es is a eci sɛwl a, ke -lʼebarir ɛl ↄfr. Yogŋ low yɛgm ɛsɛl ayadŋu yɛji anŋ. Ɛl ɛm eci bɛb erur eke kretiɛnɛl a, lɛc ɛm, kʼɛlum Jwifɛl ecʼol a. Ɛtŋ bɛb a am ir ɛb wus ecʼów aw a cɛ eci. Yadŋ ɛm ecʼów yony na e lís anake Pↄl am ↄm kretiɛnɛl a ów eke kʼↄsu sos a.
Lɛl na am yɛgm eke Pↄl ↄny Filip eci kretiɛnɛl a ecʼerur nↄnↄ.
1
Ɛsŋn
1 Pↄl lele Timote ab, ekʼel Jesu Krist ecʼↄbↄwi a, e lɛl ekʼam awŋ Filip baŋn e Nyam ecʼagŋ ekʼanŋ Jesu Krist ab, Nyamel ecʼidr ɛsɛl lele diakrɛl ab. 2 Ke Nyam ɛy Ɛs lele Ɛs Kↄtↄkↄ Jesu Krist ab ɛ́dŋ ↄny ↄwrↄ ke ↄ́ŋ ↄny ɛrm es ɛy.
Pↄl am ɛlu Nyam bia
3 Mi bʼↄŋ Nyam bia sakp sakp fɛŋ eke mi bʼↄkn ↄny e low a. 4 Sɛgŋ a fɛŋ e Nyam eke mi bi ŋↄŋn mʼↄŋ ↄny a, sos ɛm iŋn ɛm mi bi ŋↄŋn, 5 Amani Mamn a ecʼelel ekʼɛlumnʼm abu mi mↄmun es lɛgŋ krɛkrɛ ɛm ɛtŋ toŋ igŋ yɛfɛnyna ɛm a sosiɛm eci. † Ob Kok 16.13-16. 6 Mʼuw any tasi eke Nyam ekʼↄb nuŋ am kok juma mamn na ↄny ecʼɛrm ab ɛm a, bʼow ucu ↄny es toŋ ígŋ nuŋ, toŋ ow ók lɛgŋ eke Jesu Krist bʼow ow a. 7 Mʼↄny low ij, eke mʼↄny tutr nɛnɛ ↄny fɛŋ e lís. Mʼoc ↄny ɛm ecʼɛrm fɛŋ ɛm, aŋke ke ow el ŋgbraka ɛm eke mʼanŋ, ke ow el lɛgŋ a eke mʼↄny abusu eke mi ki dogŋn, ke mʼↄmun Amani Mamn ab es a yɛji, ↄny a fɛŋ ɛŋan Nyam eci bibm a ɛsɛ ɛm af. 8 Ɛtŋ Nyam ij ɛm e daŋku eke ↄny fɛŋ mʼerur ↄny tasi, ɛsʼelel eke Jesu Krist ↄny erur ligbɛl ↄny ecʼab af.
9 Ɛtŋ ow eke mʼam ibrm ɛm e ŋↄŋn ɛm a el: ke erur na ekʼↄnyn a ágb afŋn es, ke ow ↄ́ŋ ↄnyn low any uw lele nuŋ ɛm ↄny ab, 10 yecʼɛtŋ ke úwr ów tasi eke el nawrɛ ab any. Ow bʼow ↄŋ ayal, abr ɛnym kʼánm ↄny lís, lɛgŋ a eke Jesu Krist bʼow ow a, 11 ɛtŋ ów amamn eci ey eke wɛl bʼɛŋn Jesu Krist ɛm a, bʼow ok ↄkm ↄny ɛm; ke ow él Nyam ecʼanygbɛl lele kↄklm ab.
Jesu Krist el sel ɛŋn
12 Sica lisijimɛl, mʼerur eke kʼuwr any eke es abur na ekʼɛŋnʼm a, tasi ɛm a, ↄŋ Amani Mamn a imn anym eci, 13 aŋke sica agŋ a fɛŋ ekʼanŋ es ɛw ɛs a e gbugŋ a lele susu ɛjecʼab a uw any eke Krist sosiɛm mʼanŋ ŋgbraka ɛm. † Ob Kok 28.30, Efɛs 3.1. 14 Ɛtŋ agŋ lisijimɛl nↄnↄ ecʼↄmn ekʼↄny Ɛs Kↄtↄkↄ ɛm a obn, ŋgbraka na ɛm eke mʼanŋ a; ow ↄŋ erŋn ↄnym ɛl ɛtŋ lokm susu ɛm -nʼam dad Nyam ecʼodad.
15 Nawrɛ tasi ekʼɛl ɛm ecʼagŋ nyam nyam, ɛm sosiɛm, bʼↄb Krist ecʼAmani a ŋkre ɛm, ów es atar ɛm, ɛbɛn yɛji, likpr bʼↄb Krist ecʼAmani a erur ɛm tasi. 16 Ɛl akpasu a, -li bʼↄb Krist ecʼAmani a erur ɛm, aŋke -lʼuw any eke ɛm eci sobel ɛm aŋa eke mʼanŋ a, el Amani Mamn a e dogŋn eci. 17 Ɛtŋ ɛl a eke bʼↄb Krist ecʼamani a sow tutr eŋuŋ ɛm, ɛm eci ŋkre ogŋ ɛm a, ɛl e tutr a el, ke -lʼobn ɛm e gbre ij a sobel ɛm aŋa eke mʼanŋ a. 18 Yɛji ↄfr ↄfr! Ekʼɛl eci sow tutr a el eŋuŋ oglog amamn yɛji, ɛm e sos ɛm iŋn a el: Krist ecʼamani a ecʼa, wɛl am ↄb ɛtŋ ow bʼow iŋnʼm sos ɛm sɛgŋ fɛŋ, 19 aŋke mʼuw any eke ↄny e Nyam ŋↄŋn lele Jesu Krist ecʼAbŋ Lala ecʼabu ɛlum ab ab, bʼow el ɛm eci sↄg. 20 Sica ɛsɛ elel eke mʼam eku ke mʼam ↄmn tasi a, mi kʼɛknm low yecʼeke kʼↄnyʼm ɛ́s. Kↄ ke ow el sicaca oglog ke ow el sɛgŋ fɛŋ, mʼↄny ↄmn tasi ɛtŋ mi bʼow mʼɛlu Krist eci sagb a ↄkm ɛm ecʼɛgŋ el fɛŋ ɛm, ɛm ecʼowr anŋ ɛm oglog ɛm e luw ɛm bↄbↄ yɛji. 21 Ɛm ecʼa, tasi ɛm a Krist anake el ɛm e sel a, ɛtŋ luw el ɛm eci ŋgrusiɛ. 22 Gbɛkↄ ekʼow it eke mi kʼanŋ owr ke mi kok juma mamn, ke mi kʼúwm low yecʼeke mi ki sↄsum mʼoc ab any. 23 Mʼanŋ sow tutr yony ecʼaraŋn: mʼam erur eke mi kʼuw ke mʼím mʼanŋ Krist ab, na anake akpl afŋn es a. 24 Gbɛkↄ ow it ke mʼánŋ owr sos megl ɛm ↄny e nimamn eci. 25 Ca mʼuw any tasi ŋ̂! Mʼow mʼanŋ owr, mi bʼow mʼir ↄny fɛŋ ab yecʼɛtŋ ke ow ɛ́lum ↄny abu iman anym eci, ke ↄ́nyn sos ɛm iŋn ↄmn ɛm. 26 Ke lɛgŋ eke ɛmɛny mi bʼɛwl mʼow mʼɛŋn ↄny a, ↄny e sos ɛm iŋn a eke ↄnyn Jesu Krist ab ecʼaf okr ɛm a, ágb nↄnↄ.
Krist ecʼAmani Mamn ab af ecʼes an
27 Gbɛkↄ ow e tasi a cɛ el: ke áan es nyim nyim Krist ecʼAmani Mamn ab af, yecʼɛtŋ ke, eke mʼow mʼɛkn ↄny ɛtŋ mʼowm yɛji, mʼíri ekʼinymn es kikri ɛtŋ okar af ow tutr nyam ɛm, ɛtŋ am dogŋnin low abŋ nyam ɛm, ↄmn ekʼAmani Mamn ↄŋ ↄny a eci. 28 Kì yɛbr ↄny ecʼefnu a akunda kaka fɛŋ ɛm kʼↄ́ŋ erŋn kʼↄny ↄny; low na bʼow yɛgm ɛl eke -lʼirm ŋ̂, ke ↄny ecʼa, ow yɛgm ↄny ekʼanŋn ↄny e sↄg ecʼebr af; ɛtŋ ow el low ekʼanŋ Nyam ogŋ ow, 29 aŋke Nyam ↄŋ ↄny bibm eke kʼubr Krist nawrɛ, ɛtŋ ow elm na cɛ kↄ ke ɛmɛny íjr in e gbre yɛji. 30 Sicaca ɛm a, ↄny lel ɛm ab anake sʼokr af sʼam dogŋn low a. Low dogŋn nyam a cɛ eke lɛgŋ ekʼɛc ab ɛm † lɛgŋ ekʼɛc ab ɛm:Ob Kok 16.19-40. mi dogŋn, ke ɛmɛny mʼam dogŋn ɛsɛ elel ekʼuwr any ab af a.