9
Nyam sↄsum Israɛl eyŋ oc
1 Ɛm mʼel Krist eci, ow sosiɛm, low a eke mʼam mʼow mi dad a el low nawrɛ, mi kʼↄtum mʼↄnym yadŋ. Ɛm e tutr a eke Abŋ Lala am nyimn a yɛji am dadʼm eke ow el low nawrɛ. 2 Ɛm ecʼɛrm a sos ↄw es nↄnↄ ligbɛl ɛtŋ mʼam ij gbre eke úwrm. 3 Mi bʼow mʼɛgŋ mʼeb eke Nyam kʼigŋ ↄwlʼm ke mi kpáb es Krist e lís, eke ow ↄtu cɛ eke kʼeb ɛm lisijimɛl Jwifɛl ɛlu es. 4 Bla ecʼee? -Lʼel Israɛl eyŋ, Nyam ot ɛl -lʼel ow ecʼey. Wɛl ecʼaraŋn nʼanŋ in ecʼanygbɛl ab ɛm, lʼɛgŋ sinm wɛl ab, nʼↄŋ wɛl in ecʼol a, li yɛgm wɛl sɛwl yecʼɛm eke wɛl kʼigŋʼn nuŋ a, ɛtŋ li dad wɛl ów eke li bɛbm lʼɛw es wɛl ecʼa. 5 Ɛl -lʼel ɛl lagŋɛl ekpekp a eci alaw. †ɛl lagŋɛl ekpekp a:el Abraham, Isak, Jakↄb lele in ecʼey ab ab. Ɛl ecʼaraŋn anake wɛl ew Krist ɛsɛ ɛgŋ owr af, in eke lʼel Nyam ekʼanŋ ob fɛŋ e nuŋ af a! Kↄklm él in eci sɛgŋ fɛŋ! Amɛn!
Nyam ecʼey tasi eke sↄsum ot
6 Ow elm ke wɛl dad ɛsɛ Nyam e low a eke ɛwar ɛw es a ɛlu ok es. Tasi ɛm a, agŋ a eke wɛl ew ɛy lagŋ Israɛl ɛm a, ɛl fɛŋ -lʼelm Israɛl eyŋ tasi. 7 Ɛtŋ agŋ a bↄbↄ eke wɛl ew ɛy lagŋ Abraham ecʼeb ab ɛm a yɛji, ow elm ɛl fɛŋ -lʼelm ow ecʼey tasi, aŋke Nyam dad Abraham ninɛ: Isak ɛm anake bʼow ɛŋn alaw eke bʼow ɛlu ŋ e nin a ↄkm a.†Nuŋ Ɔb 21.12. 8 Kin sodad na ecʼiri tasi a: ow elm ey a eke wɛl ew igŋ nyam lele yↄw nyam ab ecʼerur ɛm a elm Nyam ecʼey. Kↄ ey tasi a, ɛl -lʼel Nyam ecʼɛwar ecʼey a. 9 Kin ɛwar a e sodad a: mʼow mʼɛwl mɛny mʼow ŋ ogŋ a lakpo yecʼa, lɛgŋ nɛnɛ af, ɛtŋ ayŋ Sara bʼow ew iy igŋ nyam.†Nuŋ Ɔb 18.10.
10 Ɛtŋ ow elm na sↄny cɛ: kↄ Rebeka ecʼa yɛji. Lʼew ey yony ɛy lagŋ Isak ab. 11-13 Ey yony a, wɛl kʼewm kokm ɛl wus, -li ki kokm low ŋuŋ oglog low nimamn. Gbɛkↄ Nyam dad Isak ɛw es eke: likpekp a bʼow anŋ jam ɛs a eci es ɛw ɛm.†Nuŋ Ɔb 25.23. Ɛtŋ usu ɛjecʼɛm a, Nyam Lɛl dad ninɛ: mʼerur Jakↄb mʼoc ɛtŋ mi wal Esayu mʼɛlu es.†Malaki 1.2-3. Low na ɛcr nɛnɛ, yecʼɛtŋ ke Nyam e low a eke bɛbm ɛw es a ɛ́li any. Nyam bi sↄsum agŋ ot ɛsɛ elel eke li bʼerur ab af, ɛtŋ sↄsum oc a elm agŋ a ecʼów e bi kok a sosiɛm, kↄ Nyam cɛ eke bʼɛsŋ ɛgŋ ab ɛm ow bʼanŋ ow.
14 Sica ayaf si ki dadr ab ee? Kↄ Nyam ɛnyɛmbri yony yony ɛs lʼel ee? Njaŋ, ow elm ɛbɛn! 15 Tasi ɛm a, li dad Mois ninɛ: Mi bʼow mʼikŋ ɛgŋ e mʼerur eke mi kʼikŋ sↄrŋ a sↄrŋ, ɛtŋ mi bʼow mʼↄnyn ɛgŋ eke mʼerur eke mi kʼↄnyn ɛrm mamn a ɛrm mamn.†Ɔkm Ok 33.19. 16 Ow sosiɛm a, Nyam e sↄrŋ ikŋ a ánm agŋ e low e bʼerur ab ɛm, oglog sos eke bʼatr es ab ɛm, kↄ Nyam cɛ eke ↄny sↄrŋ ikŋ ab ɛm ow bʼanŋ ow. 17 Nyam Lɛl ɛm, Nyam dad Ejipt ecʼɛb ebu a ninɛ: Mʼɛwʼŋ ɛb ebu, yecʼɛtŋ ke ŋ ɛm mʼɛ́lu ɛm ecʼabusu a ↄkm, ke mi kók ɛm e nin a eb es wus na nimum af.†Ɔkm Ok 9.16, Sɛptant ɛm ecʼodad eke wɛl oc. 18 Wɛl bʼɛkn eke Nyam bʼikŋ ɛgŋ eke lʼerur eke li kʼikŋ sↄrŋ a sↄrŋ, ɛtŋ li bʼↄtur ɛgŋ eke lʼerur eke li kʼↄtur ɛrm a ɛrm.
Nyam bi sↄsum agŋ ot ɛsɛ elel eke li bʼerur ab af
19 Gbɛkↄ, kʼaw ke ɛgŋ íbrm im ɛsɛ: sica, eke ow el nɛnɛ, bla sosiɛm ɛmɛny Nyam kʼɛnym ɛy abr ee? Bwo ecʼɛgŋ ↄtu eke ki dogŋn low eke li bʼerur ab ee? 20 Kↄ ŋ gbɛ, bwo elʼŋ eke kʼatar Nyam ab ee? Kↄ mijel bʼibrm ɛgŋ a eke kokʼr a ɛsɛ: bla sosiɛm ɛtŋ kokʼm mijel ee?†Bɛ̀bmn Esayi 29.16; 45.9. 21 Kↄ mijel kok ɛs ↄtum eke ki kok low e lʼerur kpeŋ ab ab ee? Kↄ lʼↄtum eke kpeŋ nyam a cɛ, li kʼitl li kok lɛ́w sↄbↄ nyam oglog lɛ́w kprakasa nyam ee?
22 Nyam erur eke kʼɛlu in ecʼɛrm bebl ↄkm ke yɛ́gm in ecʼabusu a. Gbɛkↄ agŋ a eke nʼↄny ɛrm bebl wɛl ab, ke it eke kʼirm ↄgbu es a, lʼɛgŋ wɛl e low lʼeb low eku ligbɛl ɛm. 23 Lʼɛgŋ low nɛnɛ lʼeb, yecʼɛtŋ ke lʼɛ́lu in eci anygbɛl a e sagb a ↄkm agŋ eke lʼerur eke li ki yɛgm in e sↄrŋ ikŋ a e lís. Ow el agŋ a eke lʼikŋ anym li bɛbm lʼɛw es eke kʼɛŋn anygbɛl na a. 24 Ɛtŋ ɛy sʼel agŋ amua eke lʼɛsŋ a. Ow elm Jwifɛl ecʼaraŋn cɛ lʼɛsŋm ɛy, kↄ agŋ eke elm Jwifɛl ecʼaraŋn ecʼagŋ a yɛji. 25 Nyam dad low na kokoba ↄb ɛs Ose e lɛl ab ɛm:
Agŋ a eke elm ɛm ecʼagŋ a,
mi bʼow mʼɛsŋ ɛl “ɛm ecʼagŋ”.
Ɛtŋ agŋ a eke mʼérurm a,
mi bʼow mʼɛsŋ ɛl “agŋ e mʼerur”.
26 Ɛtŋ yogŋ a eke wɛl dad agŋ eke:
«Ɔny elmn ɛm ecʼagŋ a,»
wɛl bʼow ɛsŋ ɛl Nyam ekʼanŋ owr ecʼey. †Bɛ̀bmn Ose 2.1-3; 2.25.
27 Esayi, in am ɛlu lebl Israɛl ecʼagŋ e lís ɛsɛ:
Eke batŋ Israɛl eyŋ ɛny nↄnↄ ɛsɛ okij any e mirici af yɛji,
agŋ tɛl a eke wal es a cɛ bʼow ɛŋn sel.
28 Tasi ɛm a, Nyam Admaga bʼow kok low a eke li dad a wus af aŋa,
li bʼow li kok fafa toŋ lʼigŋ nuŋ.†Ɛ̀kn Esayi 10.22-23. Akr 27 toŋ akr 33 ab ɛm a e sodad a, Pↄl ot kokoba ↄb ɛs Esayi e sodad a eke dad a ɛsɛ elel eke wɛl bʼɛŋn Sɛptant ɛm ab af.
29 Ɛtŋ low na anake Esayi yɛji ikŋ anym dad a:
blel Nyam Abusu Ɛs okm ɛy alaw bɛb es,
ke blel sʼánŋ ɛsɛ Sodↄm eyŋ af,
ke sʼótarir es Gomↄr eyŋ ab. †Ɛ̀kn Esayi 1.9, ke ɛ̀kn Nuŋ Ɔb 19.23-28 yɛji.
Agŋ a fɛŋ eke bʼↄny ↄmn Krist ɛm a Nyam bʼoc ɛl agŋ nyim nyim
30 Ke ayaf si ki dadr ab ee? Nawrɛ, agŋ eke elm Jwifɛl a, ↄ́lm eke kʼel nyim nyim Nyam ecʼany af. Gbɛkↄ -lʼɛkn eke Nyam ɛgŋ eb ɛl, ɛl ecʼↄmn a sosiɛm. 31 Ke Israɛl ecʼagŋ a am ↄl eke kʼel nyim nyim eke -li bʼɛlum Nyam ecʼol a sosiɛm. Kↄ ɛl -lʼↄwl -lʼok es. 32 Bla sosiɛm ee? -lʼↄwl -lʼok es, aŋke -lʼↄlm nyim nyim el na es ↄmn ɛm, -li tutr eke ɛl ecʼów kok ɛm -li bʼow -nʼɛŋn. Ɛbɛn a, -lʼuyum lebn a eke bʼɛlu ɛgŋ wus ab ab. 33 Tasi ɛm a, Nyam Lɛl dad ninɛ:
Siↄn ɛb ɛm, mʼam ɛw lebn nyam eke bʼeb agŋ akr,
lob eke bʼɛlu ɛgŋ wus es.
Ɛgŋ yecʼeke bʼoc ↄmn ɛluʼl ɛm a,
sos kʼow ↄwm es lɛgŋ kaka. †Bɛ̀bmn Esayi 8.14; 28.16.
†9:5 ɛl lagŋɛl ekpekp a:el Abraham, Isak, Jakↄb lele in ecʼey ab ab.
†9:7 Nuŋ Ɔb 21.12.
†9:9 Nuŋ Ɔb 18.10.
†9:11-13 Nuŋ Ɔb 25.23.
†9:11-13 Malaki 1.2-3.
†9:15 Ɔkm Ok 33.19.
†9:17 Ɔkm Ok 9.16, Sɛptant ɛm ecʼodad eke wɛl oc.
†9:20 Bɛ̀bmn Esayi 29.16; 45.9.
†9:26 Bɛ̀bmn Ose 2.1-3; 2.25.
†9:28 Ɛ̀kn Esayi 10.22-23. Akr 27 toŋ akr 33 ab ɛm a e sodad a, Pↄl ot kokoba ↄb ɛs Esayi e sodad a eke dad a ɛsɛ elel eke wɛl bʼɛŋn Sɛptant ɛm ab af.
†9:29 Ɛ̀kn Esayi 1.9, ke ɛ̀kn Nuŋ Ɔb 19.23-28 yɛji.
†9:33 Bɛ̀bmn Esayi 8.14; 28.16.