1 Gubuꞌ ibasu uts da Yawe ini da Noa ini binaꞌ, “Dzi tsanga agu runtaꞌ angu garam rururungan imingꞌ wasaꞌ i garam gar sib angu mpadan da gubuꞌ aruani. Ibinigi da u bungꞌ au utupam da warut watangꞌ madzung. 2 Wau apu Dzi marangꞌ aridagin i tsaradan suda dangki maran ruga rugan arapuꞌ 7 da rinan 7 da apu bubumpuadan i Dzi maranggangꞌ iruꞌrun, rinan da arapuꞌ.*apu Dzi marangꞌ aridagin...da apu bubumpuadan i Dzi maranggan: Watsanga Wok Pris 11:1-23; Lo 14:3-20. 3 Da nabinigi angu i apu dzuf maran ruga rugan; wapiriangꞌ arapuꞌ 7 da rinan 7. Wanang wabinigi i apu igi rungꞌ mpada marataꞌ da utusa i ruan mingꞌa intap. 4 Mingꞌa aruani da fawaꞌa gubuꞌ 7 da dzi bungꞌ atangin gamiꞌ namui nasangꞌ gubuꞌ 40 da idziang 40, da dzi bungꞌ asiat nam marantaꞌan santan dzi tangindan mingꞌa intap ani rai.”

5 Ibinigi da Noa inang nam sib angu isangꞌ Yawe nidan.

6 Noa udzufan isangꞌ 600 da gubuꞌ aru mpui furan tsiraꞌ waꞌa samada intap sib. 7 Noa irut fininggan da narun rusan impruꞌ da finin rusan yatangꞌ madzung i rima runggan sib i mpui tsiraꞌ. 8-9 Da apu Anutu maran aridagin i tsaradan suda dangki da apu bubumpuadan mingꞌa apu mara maran dzufan da yunga intap rinan da arapuꞌ ifuari i ruan iruꞌ iruꞌ yatangꞌ da Noa i madzung wasaꞌ ibi Anutu nidan da arangan. 10 Da gubuꞌ 7 fada sib raiyi da mpui furan iwaꞌ intap santan.

11-12 Noa udzufan waꞌa 600 igi, da mingꞌa ukam 2†ukam 2: Ukam idzuwai anungꞌ idzidziwan i agi u. Bida atsungꞌa Babilon kalenda gan da ini Mei, da bida atsungꞌa Hibru gan da ini Novemba. gubuꞌ gan 17 arigi, da mpui santan mingꞌa intap warangꞌ ipururuts iyab, da gunungun idagang da gamiꞌ tsiraꞌ bingan iruꞌ isangꞌ gubuꞌ 40 da idziang 40. 13 Da gubuꞌ arigi da Noa da fininggan da narunggan Sem da Ham da Yafet irut finin rusan impruꞌ ruan atangꞌa madzung. 14 Da apu mara maran santan— marapagraꞌ da buman, tsiraꞌ da isiꞌ, yunga intap da dzufan— yatangꞌ madzung impruꞌ da Noa da utupan. 15-16 Da apu marantaꞌan mara maran sib angu, arapuꞌ da rinan, ifuari ruan iruꞌ iruꞌ yatangꞌ madzung da Noa ibi Anutu nidan. Yatangꞌ sib da Yawe runggan itsungin muantsi sib in.

17 Da mpui tsiraꞌ igi yusu iyab isangꞌ gubuꞌ 40 da ibuafir intap sib da imagangꞌ madzung iyab. 18 Da rungꞌ yusu iyab iyus nam sib angu isangꞌ madzung mapa wagungꞌ angu gin. 19-20 Da mpui igi rungꞌ yusu iyab iyus mamai guntiꞌ santan isangꞌ 7 mitas. 21 Da nam marantaꞌan santan mingꞌa intap sib angu imamp sib— apu mpada intap, marapagraꞌ da buman, yungan da afafan da dzufan, impruꞌ da garam gar. 22 Nam santan mpada intap tsaraꞌ uda asap i yun sib angu imamp sib. 23 Yawe isiat nam marantaꞌan mingꞌa intap rai: garam gar da apu mpada intap da dzufa maranguntung wasaꞌ. Noa runtaꞌ angu da utupan da apu ruta mpada madzung igi angu rungꞌ impa marataꞌ.

24 Da mpui tsiraꞌ igi rungꞌ imunti ibuafir intap santan isangꞌ gubuꞌ 150.