1 Sara impai udzufan isangꞌ 127. 2 Da arangan imamp imingꞌ gamp Kiriat-Arba (nida Hibron), imingꞌ intap Kanan. Abraham irang igampun ruan i fininggan imingꞌ ungar wasaꞌ.

3 Arangan irang sib da itangin fininggan rai da ifa ni da garam Hit ibiani, 4 “Dzi maragab garam marawampua ani impa wasaꞌ i agam. Agam warim intap mangan da dzi da dzi narim fininggangꞌ gin.”

5 Da garam Hit ini binaꞌ, 6 “Garam tsiraꞌ, aga marangꞌ ifur ibiani: U garam nifutsarif impa wasaꞌ i agai. Bida u wangunggam uda tauf bampun rima badzabin mangan mingꞌa aga gin, da warim fininggam in. Aga manga wasangꞌ i nida nan intiꞌ i tauf bampun u rima fininggam in u.”

7 Da Abraham iraꞌ i ruan da irim antungꞌ da irasu ruan iruꞌ garam Hit igi maranggan. 8 Da ini da ribigi ibiani, “Bida agam mpruꞌa wangum i dzi rima fininggangꞌ i nani, da dzi marangꞌ ifur ibiani: isangꞌ agam uda dzi nifunggangꞌ da guta i Tsohar narunggan Efron, 9 i rima tauf bampun mingꞌa Makpila mingꞌa arangan intapan idzintsuts ringampa angu da dzi. Da nani nam bunump gudzunggan rururungan i dzi rima nam ntsuman gin mingꞌa agam maranggam. Da nigi nasu dzi intapangꞌ rima badzabangꞌ gin.”

10 Efron impa wasaꞌ i gan garaman Hit igi imingꞌ gamp tsiraꞌ muantsi nifunggan da ini Abraham nan gan mungaꞌ imingꞌ santan igi maranggan ibiani, 11 “Garam tsiraꞌ, dzi marangꞌ ifur ibiani: dzi bungꞌ arim intap mungaꞌ arigi santan nampruꞌ da tauf bampun mingꞌa gin ani namingꞌ dzi ampan gangꞌ maran da agu.*dzi bungꞌ arim intap mungaꞌ arigi santan...namingꞌ dzi ampan gangꞌ maran da agu — Efron anungꞌ ini rima utaꞌ angu. Imaꞌ. Arangan yatsungꞌ sanab nida nan bini da ruan, da maran ifur i Abraham wasangꞌ i uda nan igi yaban u. Da warim fininggam gin.”

12 Da Abraham itip irim antungꞌ da irasu ruan iruꞌ garam gamp igi maran 13 da ini da Efron imingꞌ ribigi maranggan ibiani, “Dzi gaib runggangꞌ da agu i u ringanta i dzi wangunggangꞌ. Dzi bungꞌ arim nam bunump gudzunggan rururungan i intap igi. Wau nam bunump igi da dzi bungꞌ arim fininggangꞌ gin.”

14 Efron ini Abraham nan gan mungaꞌ ibiani, 15 “Dzi garam tsiraꞌ gangꞌ, ariꞌ waringantin: intap igi nam bunumpan gudzunggan isangꞌ 400 silva,†nam bunumpan gudzunggan isangꞌ 400 silva — Nan Hibru ini 400 sekel silva, da barabin gan isangꞌ 4.5 kilogram. Nam bunump igi nam tsiraꞌ bingan da gubuꞌ arigi. da bitsintaꞌ nam bunump igi nam utaꞌ bingan i garam tsiraꞌ bida agu da dzi. Warim fininggam gin.”

16 Abraham iyu Efron nam bunumpan runggan nidan igi iyab da irants 400 silva da irim da Efron imingꞌ garam nidzun santan Hit maran.

17-18 Ibinigi da Efron intapan mingꞌa Makpila mingꞌa uts da Mamri igi impruꞌ da gum da tauf bampun da gai santan mingꞌa gin isu Abraham nanggan imingꞌ garam Hit santan mpruꞌa ruan gin igi maranggan. 19 Nan tipan ntsupan da Abraham irim fininggan Sara i tauf bampun mingꞌa Makpila imingꞌ uts da Mamri (Hibron gampan isiꞌ mangan) mingꞌa intap Kanan. 20 Ibinigi da garam Hit intapan marafain arigi mpruꞌan da tauf bampun isu Abraham gampan rima badzaban gin.