25
Abraham Nanggan Mampan
1 Abraham itip iyu sagat mangan, binganggan Kitura. 2 Sagat igi irim narun rusan ibiani, Tsimran, Dzoksan, Medan, Midian, Isbak da Sua. 3 Dzoksan isu Siba da Didan ramanggan. Da Didan isu garam Asur da Letus da Leum tafanggan. 4 Da Midian narun rusan marub binganggan ibiani, Efa, Efer, Hanok, Abida da Elda. Utup tuas arigi isu Kitura tafan rusan. 5 Abraham itangin nam santan arangan suda wain gin ugu sib angu da narunggan Isak. 6 Da aru arangan rumpada marataꞌ da ifab nam bunump pas pas angu isangꞌ narun rusan riman da sagat iruꞌ ugu, Hagar da Kitura. Da Abraham itangin ribarangan santan ifa intap mingꞌa gubuꞌ yaban i mpada guntiꞌ i Isak. 7 Mpruꞌa Abraham udzufan mpada rutin isangꞌ 175. 8 Arangan inang nam santan maran furan intsup sib da ifufi nidzun angu da imamp da ifa da utupan mampa sib ugu. 9 Da arangan narunggan Isak da Ismail irim arangan i tauf bampun Makpela mingꞌa uts da gamp Mamri, mingꞌa Tsohar narunggan Efron, garam Hit, intapan. 10 Abraham runggan irim nam ntsuman i intap arigi da garam Hit. Da arangan narun rusan irim arangan i nigi impruꞌ da fininggan Sara. 11 Gubuꞌ Abraham mampa sib, da Yawe ifinti arangan narunggan Isak. Da Isak impa uts da mpui maran Bir-Lahai-Roi.
Ismail Tafan Rusan Nan Gan
12 Abraham narunggan Ismail rima da Hagar, sagat Idzip aru Sara sagat guman ugu, yangin rusan nan gan ani. 13 Ismail narun rusan bingangan atsungꞌa i ruan ibiani: Nebaiot, Ismail narun marub miamun, da Kedar, Adbil, Mipsam, 14 Misma, Duma, Masa, 15 Hadat, Tema, Dzetur, Nafis da Kedema. 16 Nigi Ismail narun rusan. Garam 12 igi tafan rusan binganggan imunti imingꞌ gamp ruga rugan da intap ribarangan mpada gin. 17 Ismail impa udzufan isangꞌ 137, da arangan imamp da ifa da tafan rusan mampan ugu. 18 Ismail yangin rusan impai imingꞌ intap Hawila ifa isangꞌ gamp Sur, intap Idzip marafain gan gubuꞌ yaban, sanab fada Asiria gin. Da anungꞌ irut rain rusan impa bini u.
Rebeka Irim Narun Bampungꞌ Isau da Yakop
19 Nani Abraham narunggan Isak nan gan ragidan ani. 20 Gubuꞌ Isak udzufan sangꞌa 40 da iyu Rebeka, Betuel narunggan finam da Laban nafunggan, ribarangan garam Aram mpada Mesopotemia ugu. 21 Isak fininggan isu sagat yami, ibinigi da Isak yugin da Yawe i rima arangan fininggan sib. Yawe iringant i arangan nan gan udagin da Rebeka iwangun. 22 Mamaꞌ narun iruꞌ mingꞌa Rebeka wangun igi yis ruan imingꞌ rinan wangun wasaꞌ. Ibinigi da arangan ifan da Yawe i nan udagin da ini binaꞌ, “Wain idzuwai da nam bida ani iwaꞌ da dzi?”
23 Da Yawe ini da arangan ibiani,
“Garam utup iruꞌrun imingꞌ u wangum.
Garam utup iruꞌrun u nida riman igi bungꞌ antap ruan namunti ruga rugan.
Da utup mangan bungꞌ asu riniurun da nayab ragun i mangan.
Da mamaꞌ narun waꞌa miamun bungꞌ asu mamaꞌ waꞌa bampan garam guman.”
24 Iwaꞌ arangan gubuꞌ gan rima narun da irim narun bampungꞌ. 25 Mamaꞌ miamun waꞌan igi rinin isu biꞌ funub da rinifufun iyus, da rib igi inuꞌ arangan binganggan Isau. 26 Da rainggan waꞌa atsungꞌa arangan da bangin ruturiꞌ i faga mutun. Ibinigi da rib igi inuꞌ arangan binganggan Yakop (wainggan gifa faga mutun*25:26 Nan ‘gifa faga mutun’ iram iyab i nam iyuꞌan.). Isak udzufan isangꞌ 60 da gubuꞌ aru Rebeka rima mamaꞌ bampungꞌ iruꞌ igi.
Yakop Iyu Mamaꞌ Miamun Nanggan Suda Wain Gin Sinungꞌ Isau
27 Mamaꞌ narun iruꞌ igi ibasu garam sib da Isau isu garam mararuru da bangi-tatiꞌ i yunga wap da waꞌan da apu. Da Yakop arangan garam mpada ntras angu, da arangan inang da impa gamp angu. 28 Isak maran yari nidzun angu i Isau, wain ibiani, arangan nugun itsiaꞌ i gada apu Isau yunga gin. Da Rebeka ibinigi maran yari nidzun i Yakop.
29 Gubuꞌ mangan da Yakop itip mpuaꞌ i upis nidzun, da Isau imingꞌ wap iba da mangits irut arangan nidzun angu, 30 da ini da Yakop, “Mangits yis dzi funub angu! Warim nam biꞌ igi fain da dzi nagan!” (I wain igi da ifaringꞌ arangan binganggan Idom, i wainggan ibi biꞌ.)
31 Da bitsintaꞌ Yakop ini da arangan ibiani, “Hai, da bitsintaꞌ warim mamaꞌ miamun nanggan suda wain gin da dzi raiyi, ida dzi bungꞌ arim mpuaꞌ ani da agu.”
32 Da Isau ini, “Oiyo! U tsangan dzi nang i mampan! Da dzi nanggangꞌ miamun dzi suda wain gin igi burima dzi sib bida anungꞌ? Isangꞌ i!”
33 Da Yakop itip ini, “Wataga ruam da wani nan nidzun mungꞌ da dzi i u rima nam mamaꞌ miamun gan suda wain gin da dzi.” Ibinigi da Isau itaga ruan da irim nam mamaꞌ miamun gan ifan da Yakop. 34 Intsup sib da Yakop irab mpuaꞌ upis nidzun da nam gadan arangan tipan da Isau. Da arangan iga nam da inum mpuaꞌ isangꞌ arangan sufan, da yuriꞌ da ifan. Uwayant Isau santingꞌan igi arangan itsanga nam mamaꞌ miamun gan suda wain gin igi ibi nam utaꞌ angu.