27
Yakop Iyu Isau Nan Gan Fintidan Sinungꞌ
1 Isak ifufi sib da maran isap da anungꞌ isangꞌ i rungꞌ raraba nam, ibinigi da irim nan i narun miamun Isau iba da ini rutin, “O Isau, dzi narungꞌ.”
Da Isau ini, “Ramangꞌ, dzi aruani. U ni wai?”
2 Da Isak ini, “Aruani da dzi fufi sib da dzi wasruꞌ i gubuꞌ gangꞌ mampan u. 3 Wau dampa da biriang gam da wayung apu wap i tipa dzi nifungꞌ gin. 4 Da wabanga apu nasu ntsits ngarubini tusa dzi wangꞌ da wau waba da dzi nagan da dzi narim nan gangꞌ fintidan da agu nasu miamun, ida dzi namus mampan.”
5 Gubuꞌ arigi da Rebeka impai da iringant i Isak nan gan nidan da narun Isau. Gubuꞌ Isau tanginda raman da fada sib i yunga apu wap i uda badan, 6 da Rebeka ini da narunggan Yakop ini binaꞌ, “U ringantin, aruani da dzi mpai da dzi ringant i u ramanggam nan gan nidan da Isau bida ani, 7 ‘Wafan da wau apu mangan waba da wabanga da nasu ntsits bini angu da watip dzi nifungꞌ gin i dzi gadan. Da mingꞌa Yawe maran da dzi bungꞌ arim nan gangꞌ fintidan da agu nasu miamun ida dzi namus mampan.’ 8 Ibinigi da narungꞌ, waringant i dzi bini angu da wanang nam nasangꞌ dzi nidan da agu da aruani: 9 Wafa ntsingꞌ aga ugu da wau nuning naru faꞌ dudubadan iruꞌrun naba da dzi. Da dzi natip nam gadan ntsits bini u ramanggam maran aridagin yusan. 10 Ida wau wafan da ramanggam nagan, da arangan bungꞌ arim nan gan fintidan da agu sib, ida namus mampan.”
11 Yakop ini rinanggan nan gan mungaꞌ ibiani, “Rinangꞌ. U sruꞌ i dzi rainggangꞌ Isau sib wa. Arangan garam rinifufun yusan, da dzi imaꞌ. 12 Da bida anungꞌ i ramangꞌ yafusa dzi da rabuba gin? Bungꞌ ani dzi intsaꞌa i iyuꞌa arangan da bungꞌ arim nan pupuarapan maisan da dzi, da dzi wasangꞌ i uda nam fintidan mangan u.”
13 Da bitsintaꞌ rinanggan ini, “Dzi narungꞌ. U maram anungꞌ fura nan yusan u. Dzi bungꞌ au nam pupuarapan maisan arigi. Da wanang nam nabi dzi nidan da agu igi. Wafan da wau apu iruꞌ igi naba da dzi.” 14 Ibinigi da Yakop ifan da iyu apu iruꞌ igi iba da rinanggan, da rinanggan itip nam gadan isangꞌ ramanggan Isak maran aridagin ugu. 15 Ntsupa sib da Rebeka iyu narun tsiraꞌ Isau ngarukui gan bini mangan mingꞌa ungar wasaꞌ da yatsuf ifan da Yakop, narun isiꞌ igi. 16 Arangan yudzu nuning rinifufun ifa Yakop bangin da wan da ibuafir sib. 17 Da Rebeka iyu nam ntsits bini da bret fain arangan tipan ugu da irim da narun Yakop. 18 Yakop iyu nam gadan igi ifan da raman da ini binaꞌ, “Ramangꞌ.”
Da raman ini binaꞌ, “Hai. U wai igi?”
19 Da Yakop ini, “Dzi Isau, u narunggam miamun. Dzi tip nam santan ibi u nidan da dzi ugu. Wauriꞌ da waga apu dzi tipa sib ani da warim nan fintidan da dzi.”
20 Da Isak igutin, “Dzi narungꞌ, u waꞌ da apu igi sung angu ibi anungꞌ?”
Da Yakop ini, “U Anutu gam Yawe irim dzi sib, da dzi yu iba sung angu.”
21 Da Isak ini da Yakop, “Waba uts angu da dzi, da dzi nagif agu. Da dzi narabubin nabi dzi narunggangꞌ rururungan Isau agu, ma imaꞌ.”
22 Yakop ifa uts angu raman maran da Isak igif arangan da ini binaꞌ, “U wanggam nida nan iwaꞌ ibi Yakop. Da bangim ani ibi Isau gan.” 23 Isak anungꞌ isruꞌgin ibi Yakop u, i arangan bangin isu rinifufun ibi rainggan Isau banginggan; ibinigi da Isak ifinti arangan. 24 Da itip igutin ini binaꞌ, “Agu dzi narunggangꞌ Isau rururungan, ma?”
Da Yakop ini, “Hai, dzi arangan arani.”
25 Da Isak ini, “Ariꞌ, dzi narungꞌ. Wayu apu gam igi waba da dzi nagan, ida dzi narim nan gangꞌ fintidan da agu.” Ibinigi da Yakop iyu nam gadan gan iba rim da raman Isak igan, da ifa yu wain gurun iba da arangan inum. 26 Ida Isak ini da Yakop ibiani, “Dzi narungꞌ, waba uts aruani da watsutsuf dzi.” 27 Ibinigi da Yakop ifa rutin da itsutsuf arangan. Gubuꞌ Isak tungisa Yakop ngarukui gan atsufan da ifinti arangan da ini binaꞌ,
“Dzi narunggangꞌ nam gauntan impung gin
isangꞌ gum mangan gauntan Yawe nangan waꞌa ngarubini bingan.
28 Anutu bungꞌ atangin tifituf naruꞌ
da nanang u intapam nasisungꞌ i nam gadan, wit nidzun da wain faꞌ ampi bingan.
29 Garam utup utup bungꞌ asu u garam gumam
da bungꞌ arim antungꞌ da narasu runggan da agu.
Da u bungꞌ asu nifutsarif i raim rusam fain,
da u rinanggam narun rusan bungꞌ arasu runggan da agu.
Garam pupuarapa ruta agu bungꞌ awaꞌ da nam pupuarapan igi mungaꞌ gan.
Garam tsarifa agu da nanga bini angu i agu da bungꞌ au nam fintidan nabinigi.”
30 Isak ifinti Yakop sib da Yakop bungꞌ tanginda raman rai da rainggan Isau imingꞌ wap ibawaꞌ. 31 Arangan ibinigi itip apu ntsits bini da iyu iba da ramanggan da ini, “Ramangꞌ, wampa wayab da waga apu dzi uda badan da agu ani, da wafinti dzi.”
32 Da Isak igut i arangan, “Agu wai?”
Da Isau ini, “Dzi Isau, u narunggam miamun.”
33 Isak irunt fafun nidzun angu da iratarat iyus da igutin ini binaꞌ, “Manga arigi iyung apu da iyu imungꞌ ba da dzi? Dzi ga nam igi da dzi finti arangan sib, da pas angu da u bawaꞌ. Da nam fintidan bungꞌ arut arangan nanting.”
34 Da gubuꞌ Isau ringanta i raman nan gan igi da iyaiꞌ da irang tsiraꞌ bingan ruta wangun barabindan da ini binaꞌ, “Ramangꞌ, wafinti dzi nabinigi!”
35 Da bitsintaꞌ Isak ini da arangan ini binaꞌ, “U rainggam isu umpur tsiraꞌ bingan angu da dzi da iyu agu nan gam fintidan sib.”
36 Da Isau ini ibiani, “Ramangꞌ! Bingan Yakop isangꞌ arangan rururungan. Mungꞌ da arangan isu umpur da dzi, da iyu dzi nanggangꞌ suda mamaꞌ miamun gan. Da aruani da itip isu umpur da agu, da iyu dzi nan gangꞌ fintidan. Da ramangꞌ, nan fintidan pas u mamida riman da rumingꞌan, da warim da dzi.”
37 Da Isak ini arangan nan gan mungaꞌ ibiani, “Dzi nang arangan isu garam nifutsarif tsiraꞌ i suda wain i agu, da dzi nang i rain rusan da utupan isu i garam guman. Wit da wain bungꞌ awaꞌ nasisungꞌ arangan i dzi rim nam santan igi rutin sib. Da narungꞌ, dzi bunanga bida anungꞌ i agu?”
38 Da Isau ini da raman, “Ramangꞌ, nan fintidan igi mani bitsintaꞌ angu, ma? Wafinti dzi wampruꞌ!” Ibinigi da arangan irang tsiraꞌ bingan angu.
39 Da Isak ini arangan nan gan mungaꞌ ibiani,
“U gampam mpada gin bungꞌ amingꞌ guntiꞌ i intap nagaran
da tifituf maranguntun mamida ruaꞌa gin.
40 U bungꞌ ais bungaꞌ maiꞌ maiꞌ i waꞌa da nam bunumpam
da u bungꞌ asu rainggam garam guman angu.
Da bitsintaꞌ raiyi da u bungꞌ araraiꞌ i rainggam
da u bungꞌ antap runggam rai sinungꞌ arangan nanggan mpada tayangꞌ agu.”
Isak Itangin Yakop Ifan da Laban
41 Isau maran ifur nan fintidan Isak riman da Yakop igi, da isu wangun nidzun angu da Yakop. Da ini angu imingꞌ wangunggan ibiani, “Ramangꞌ gubuꞌ gan mampan iba su uts, da bida aga ranga gin sib, da dzi bungꞌ ais rainggangꞌ Yakop funub.”
42 Da bitsintaꞌ gubuꞌ Rebeka uda sisingꞌ i Isau sanaban tipan da inuꞌ Yakop ba da ini rutin ibiani, “Waringantin, u rainggam Isau irasu wangun barabindan i nan gan tipa i isa agu funub. 43-45 Ibinigi da dzi narungꞌ, wanang wabi dzi nidan, da wafan da dzi nafunggangꞌ Laban da warut wampai namingꞌ gamp Haran, nasangꞌ u rainggam nugunggan nufan da maran samuda nam u nangan da arangan. Raiyi da dzi bungꞌ atangin rib fain nabiaꞌ i tipa uda agu badan. Dzi bugin i tanginda narungꞌ rusangꞌ agam iruꞌ igi rai da gubuꞌ bitsintaꞌ angu.”
46 Rebeka ini da Isak ini binaꞌ, “Dzi raraiꞌ nidzun angu i Isau finin rusan, sagat Hit iruꞌ ani. Bida Yakop uda sagat Hit ani gan mangan sangꞌa sagat tuas iruꞌ aruani, da dzi nanggangꞌ mpadan bungꞌ amais wasi.”