1 Gubuꞌ garam Ismail uda Yosef ruꞌa Idzip ugu da Potifar irim nam ntsuman da ribarangan da iyu Yosef isu gan mamaꞌ guman utaꞌ angu. Potifar igi isu gudzun i king Idzip garaman singaari muntida sib i arangan. 2 Yawe irut Yosef, da gum santan Yosef nangan mingꞌa garam gudzunggan ungaran iwaꞌ ngarubini bingan angu. 3 Potifar itsangan da isruꞌgin ibi Yawe irut Yosef da inang nam santan Yosef nangan iwaꞌ ngarubini angu, 4 ibinigi da nugun inuf nidzun angu i Yosef da itaga arangan isu i gan garam guman mpada tayangꞌ arangan ungaran mpruꞌan da arangan nanggan santan. 5 Mingꞌa gubuꞌ aru Potifar tanginda arangan mpada tayangꞌ i nam santan igi da fadan, da Yawe ifinti Potifar nanggan santan, mingꞌa ungaran da gan guman wasaꞌ, i wain iruꞌ Yosef. 6 Ibinigi da Potifar itangin Yosef impa tayangꞌ arangan nanggan santan. Da maran wafur nan mangan i nida yaba i nanggan santan igi mangan u, imaꞌ, da bitsintaꞌ nam gadan arangan gadan angu.

Yosef igi iyingꞌ garam mara urun da maran bini angu. 7 Gubuꞌ fain fada sib da Potifar fininggan iyafi un nidzun angu i Yosef da ini binaꞌ, “Dzi ni u badan da agi gingꞌan.”

8 Da bitsintaꞌ Yosef ibugin da ini, “U tsangan sib wa! Dzi garam gudzunggangꞌ itangin dzi i mpada tayangꞌ arangan ungaran da gan nanggan santan, da maran wafur i nam mangan u. 9 Manga wasu gudzun tsiraꞌ ibi dzi imingꞌ ungar aruani u, imaꞌ. Dzi garam gudzunggangꞌ wapaꞌ dzi i nam mangan u, da bitsintaꞌ agu angu, i wain arangan fininggan agu. Da dzi nabu nang sanab asub maisan igi nabianungꞌ? Nigi bungꞌ abi nam maisan tsiraꞌ bingan dzi nangan da Anutu.” 10 Da sagat igi rurim udzung da Yosef maiꞌ maiꞌ i ruta arangan gingꞌan, da bitsintaꞌ Yosef ibugin da wasu uts da arangan.

11 Gubuꞌ mangan da Yosef yatangꞌ ungar wasaꞌ i nanga guman da garam gum mangan wampai nigi u. 12 Potifar fininggan impung arangan ngarukui gan ufiak da ini rutin, “Waba da agi gingꞌ!” Da bitsintaꞌ Yosef isagruꞌ ngarukui gan rai imingꞌ arangan banginggan da irunt iwaꞌ sinungꞌ ungar. 13 Gubuꞌ arangan tsanganda ngarukui rungꞌ mingꞌa arangan banginggan da Yosef runta waꞌan, 14 da arangan inuꞌ garam guman da ini, “Agam watsangan garam Hibru araga. Dzi gabunggangꞌ iyu garam araga iba agi ungarangꞌ i rima rini miaꞌ tsiraꞌ da agi. Arangan yatangꞌ ba i arimpa dzi, da dzi rim ungaꞌ. 15 Da gubuꞌ arangan ringanta i dzi rima ungaꞌ, da itiri ngarukui gan rai iruꞌ da dzi, da irunt iwaꞌ biaꞌ manaꞌ.”

16 Potifar fininggan rugif ngarukui igi ragun isangꞌ gabunggan bawaꞌan. 17 Da arangan ifis i nan ibiani da gabunggan, “Mamaꞌ gum utaꞌ Hibru aru agu uda bada agi ungarangꞌ ugu yatangꞌ ungar da dzi i nanga asub i dzi. 18 Da dzi rim ungaꞌ da arangan itiri ngarukui gan rai iruꞌ da dzi da irunt iwaꞌ manaꞌ.” 19 Gubuꞌ Yosef garam tsiraꞌ gan Potifar ringanta i fininggan nan gan fisa i Yosef nanggan nanga rutin da nugun itsakia tsiraꞌ bingan angu. 20 Da irim Yosef i karabus imingꞌ ungar karabus king rima garam nanga asub in ugu.

Da bitsintaꞌ Yosef mpada karabus, 21 da Yawe irut arangan da inang bini gin da inang garam mpada tayangꞌ ungar karabus igi maran yari nidzun angu i Yosef. 22 Ibinigi da garam arigi itangin Yosef i mpada tayangꞌ gum da garam karabus santan. 23 Garam mpada tayangꞌ ungar karabus igi maran wafur i tsuwara gum Yosef nangan u, wain ibi Yawe irut arangan da irim arangan sib i nanga nam santan waꞌa bini.