1 Gubuꞌ gada nam sib da Yosef ini da gan garaman mpada tayangꞌ arangan ungaran ibiani, “Wafarangꞌ nam gadan i garam ani bekan nasangꞌ fungꞌan da watip wafarangꞌ ribarangan silva gan ragun gin. 2 Da wafarangꞌ dzi kapangꞌ tipa i silva naruꞌ ribarangan rainggan isiꞌ bekan nampruꞌ da arangan silva gan suba wit gin ugu.” Da arangan inang isangꞌ Yosef nidan. 3 Da pisa maratait da Yosef garam guman itangin arangan rain rusan da dongki gan ifan. 4 Rain ruas itangin gamp igi rai da wafa guntiꞌ u da Yosef ini da garam guman ibiani, “Warunt sung angu watsungꞌ garam tuas aru naga. Da gubuꞌ u waꞌa da ribarangan da wani wabiani rutin, ‘Ibianungꞌ da dzi garam tsiraꞌ gangꞌ inang bini i agam da agam inang maisan rutin? 5 Wain idzuwai da agam iwap dzi garam tsiraꞌ gangꞌ kapan silva? Nigi kap dzi garam tsiraꞌ gangꞌ numa wain gin da rima nam fain gin i kupisa nam maradzigin wasi. Agam inang asub tsiraꞌ bingan.’ ”

6 Ibinigi da Yosef garam guman irunt yatsungꞌ da ifawaꞌ da ribarangan da ini Yosef nifunggan rutin. 7 Da bitsintaꞌ ribarangan ini i nifunggan mungaꞌ, “O garam tsiraꞌ, ibianungꞌ da u ni nan bida nigi iyab i agai? U garam gumam agai wasangꞌ nanga nam bida nigi u. 8 U sruꞌgin sib wa, gubuꞌ aga tanginda intap Kanan rai i tipa badan, da aga yu silva aga tsanganda mingꞌa aga bekangꞌ wit nifun itip iba da agu. Da wain idzuwai da aga wapa silva ma gol mingꞌa u garam tsiraꞌ gam ungaran? 9 Garam tsiraꞌ! Bida u tsanganda aga gangꞌ bits udan, da wais arangan funub. Da aga santan aruani nasu u garam gumam utaꞌ angu.”

10 Da arangan ini, “Isangꞌ. Dzi bungꞌ atsungꞌ nan nabi agam nidan, da bitsintaꞌ bida dzi waꞌa rutin i agamam bits udan da arangan angu bungꞌ asu dzi garam gumangꞌ utaꞌ angu. Da nan bungꞌ amaꞌ i agam santan.” 11 Ibinigi da sung angu ribarangan santan itangin bek witan iruꞌ intap da ikiraꞌ bek nifun santan. 12 Da Yosef garam guman isau nam igi i bek santan, imingꞌ rain tsiraꞌ gin ibafan isangꞌ waꞌa rain isiꞌ igi gin. Da itsangan kap silva igi mingꞌa Benyamin bek witan. 13 Gubuꞌ ribarangan tsangandan da wangun ibarabin nidzun angu da igari gan ngarukui gan, da itip itsara bek witan iyab dongki gan ruga rugan da itip iba gamp tsiraꞌ igi.

14 Gubuꞌ Yuda ruta rain rusan tipa bada Yosef ungaran da arangan rumpai. Da ribarangan ifa tatapuangꞌ iruꞌ Yosef maran. 15 Da Yosef ini da ribarangan ini binaꞌ, “Agam inang uwayant idzuwai gan ani? Agam madasruꞌgin i garam tsiraꞌ bida dzi ani isangꞌ i nanga nam i tsanganda nam mingꞌa maradzigin.”

16 Da Yuda ini, “Garam tsiraꞌ. Aga bunida nan bida anungꞌ i nida u nan gam mungaꞌ? Aga wasangꞌ tsarifa ruangꞌ bida aga wanang asub mangan u, imaꞌ. Anutu ikupis wasi gam garam gumam agai ani asubangꞌ. Aga santan bungꞌ asu u garam gumam utaꞌ angu nampruꞌ da aru garam gum tsanganda kap mingꞌa i gan bek witan ugu.”

17 Da bitsintaꞌ Yosef ini binaꞌ, “Imaꞌ. Dzi wasangꞌ i nanga sanab bida nigi u. Garam aru uda kap silva angu bungꞌ asu dzi garam gumangꞌ utaꞌ. Da nan imaꞌ i agam. Agam santan bungꞌ afan da ramanggam ruta nan nufan.”

18 Yuda ifa uts da Yosef da ini binaꞌ, “O garam tsiraꞌ! Dzi gaib runggangꞌ da agu i u ringanta i garam gumam dzi nan gangꞌ. U garam tsiraꞌ bingan isangꞌ King Farau, da u nugum anungꞌ ruaꞌa i garam gumam dzi u. 19 Garam tsiraꞌ, mungꞌ aga badan ugu da u gut i garam gumam agai ibiani, ‘Agam ramanggam ma rainggam rumpai ma imaꞌ?’ 20 Da aga ni da agu sib ugu ini binaꞌ, ‘Hai, aga ramanggangꞌ fufi rurut aga rainggangꞌ isiꞌ aga ramanggangꞌ fufida sib da riman ugu rumpai. Arangan rainggan imamp sib, da arangan runtaꞌ angu, i rinanggan irim rib iruꞌ igi. Ibinigi da raman maran yari nidzun angu gin.’ 21 Da u ni da agai u garam gumam ibiani, ‘Wau arangan waruꞌ ba da dzi da dzi runggangꞌ natsangan.’ 22 Da aga ni sib da agu, aga garam tsiraꞌ gangꞌ, ibiani, ‘Mamaꞌ isiꞌ arigi wasangꞌ i tanginda ramanggan rai u. Bida arangan tanginda ramanggan rai da raman bungꞌ amamp.’ 23 Da bitsintaꞌ u ni da garam gumam agai ibiani, ‘Agam mamida ruta rainggam isiꞌ igi badan da dzi anungꞌ tipa tsanganda agam u.’

24 “Da gubuꞌ aga tipa fadan da aga fis i nan sib angu aga garam tsiraꞌ gangꞌ agu nidan da agai da aga ramanggangꞌ, u garam gumam. 25 Raiyi da aga ramanggangꞌ ini binaꞌ, ‘Agam watip wafan da wayu nam gadan isiꞌ pas i agi.’ 26 Da aga ni da ramanggangꞌ ibiani, ‘Aga wasangꞌ mangan i ruꞌan u. Bida aga ruta rainggangꞌ isiꞌ igi fadan, da isangꞌ. Garam tsiraꞌ igi wasangꞌ i tipa tsanganda agai bida aga rainggangꞌ isiꞌ igi mamida i ruta aga fadan.’ 27 Da u garam gumam dzi ramanggangꞌ ini da agai ibiani, ‘Agam isruꞌgin sib wa. Dzi fininggangꞌ Retsel irim dzi narungꞌ rusangꞌ marub iruꞌrun. 28 Dzi narunggangꞌ mangan itangin dzi rai. Dzi ni binaꞌ, “Mani apu buman mangan igara arangan fafarab sib.” Da dzi watsangan arangan maran ibasangꞌ aruani u. 29 Da bida agam tipa uda manga aruani sinungꞌ dzi fadan da barabin waꞌa rutin, da barabin igi bungꞌ ais dzi funub, i dzi fufi sib.’

30-31 “Aruani da bida aga tipa fadan, da u garam gumam dzi ramanggangꞌ mamida i tsanganda aga rainggangꞌ isiꞌ igi, da nugu barabin bungꞌ ais arangan funub, i wain ibi arangan ifufi sib da aga rainggangꞌ isiꞌ igi ibi arangan nugunggan marafain. Da u garam gumam agai bungꞌ asu wain i aga ramanggangꞌ nanggan mampan igi. 32 Dzi tsaf ruangꞌ sib da ramanggangꞌ i mpada tayangꞌ rainggangꞌ isiꞌ igi bini. Da dzi ni binaꞌ, ‘Bida dzi mamida tipa uda rainggangꞌ isiꞌ igi badan da agu, da dzi angu bungꞌ asu wain i barabin igi santan namingꞌ u maranggam nanting.’ 33 Ibinigi da garam tsiraꞌ, dzi gaib runggangꞌ da agu i u garam gumam dzi uda rainggangꞌ isiꞌ igi mumai gan da suda u garam gumam utaꞌ angu, da watangin arangan da narut rain rusan natip nafan. 34 Dzi butipa fadan da ramanggangꞌ bida anungꞌ bida mamaꞌ igi mamida ruta dzi fadan? Imaꞌ! Dzi bugin i tsanganda ramanggangꞌ buaringꞌa barabin igi.”