رِسَالِةْ يُوحَنَّا الثَّانْيَة
الرّسالة هاذي كتبها يوحنّا عام 90 بعد الميلاد. هي رسالة قصيرة تدعي لمحبّة المؤمنين وتنبّه مالمعلّمين الكذّابين والتّعليم متاعهم.
1
نِكْتْبِلْكُمْ آنَا الشِّيخْ لِلسَّيّْدَة كِيرِيَّة الِّي خْتَارْهَا اللهْ وْلِوْلاَدْهَا الِّي نْحِبّْهُمْ بِالحَقْ وْمُوشْ آنَا وَحْدِي نْحِبّْهُمْ آمَا كُلْ وَاحِدْ عْرَفْ الحَقْ. بِسْبَبْ الحَقْ الِّي ثَابِتْ فِينَا وِلِّي بَاشْ يَبْقَى مْعَانَا دِيمَا. وْإِنْ شَاء الله تْكُونْ عِنْدْنَا نِعْمَة وْرَحْمَة وْسَلاَمْ مِنْ عِنْدْ اللهْ الآبْ وِالرَّبْ يَسُوعْ المَسِيحْ إِبْنْ الآبْ فِي الحَقْ وِالمْحَبَّة.
عِيشُوا فِي المْحَبَّة
فْرَحْتْ بَرْشَة كِلْقِيتْ شْكُونْ مِنْ وْلاَدِكْ يْتَبَّعْ فِي الحَقْ كِيمَا وَصَّانَا الآبْ. وْتَوَّا يَا سَيّْدَة كِيرِيَّة نُطْلُبْ مِنِّكْ طَلَبْ مُوشْ وْصِيَّة جْدِيدَة آمَا هِيَ نَفْسْ الوْصِيَّة الِّي عِنْدْكُمْ مِاللُّوِّلْ وْهِيَ إِنَّا لْكُلْنَا لاَزِمْنَا نْحِبُّوا بْعَضْنَا. وْهَاذِي هِيَ المْحَبَّة هِيَ إِنَّا نْعِيشُوا كِيمَا وَصَّانَا وْهَاذِي هِيَ الوْصِيَّة كِيمَا سْمَعْتُوهَا مِاللُّوِّلْ هِيَ إِنَّا نْعِيشُوا فِي المْحَبَّة.
رُدُّوا بَالْكُمْ مِالنَّاسْ لَيْغَلّْطُوكُمْ
بَرْشَة نَاسْ غَشَّاشِينْ فِي العَالَمْ يُنْكْرُوا إِنُّو يَسُوعْ المَسِيحْ جَا لِلأَرْضْ فِي جَسَدْ إِنْسَانْ وْكُلْ وَاحِدْ مِنْ هَاذُومَا هُوَ الغَشَّاشْ الِّي يْبَعِّدْ النَّاسْ عْلَى الحَقْ وْهُوَ بِيدُو المَسِيحْ الدَّجَّالْ. رُدُّوا بَالْكُمْ عْلَى رْوَاحْكُمْ بَاشْ مَا تْضَيّْعُوشْ الِّي تْعِبْنَا فِيهْ عْلَى خَاطِرْكُمْ آمَا تَاخْذُوا أَجْرْكُمْ كَامِلْ. الِّي يْزِيدْ عْلَى التَّعْلِيمْ مْتَاعْ المَسِيحْ وْمَا يِثْبِتْشْ فِيهْ رَاهُو بْعِيدْ عْلَى اللهْ آمَا الِّي يِثْبِتْ فِي التَّعْلِيمْ مْتَاعُو رَاهُو يِثْبِتْ فِي الآبْ وِالإِبْنْ مْعَ بْعَضْهُمْ. 10 إِذَا جَاكُمْ وَاحِدْ بْتَعْلِيمْ غِيرْ التَّعْلِيمْ هَاذَا مَا تِقْبْلُوهِشْ فِي دْيَارْكُمْ وْمَا تِتْعَامْلُوشْ مْعَاهْ. 11 رَاهُو الِّي يْسَلِّمْ عْلِيهْ يِتْشَارِكْ مْعَاهْ فِي عْمَايْلُو الخَايْبَة.
خَاتْمَة
12 عِنْدِي بَرْشَة حَاجَاتْ حَبِّيتْ نِكْتِبْهَالْكُمْ آمَا مَا حَبِّيتِشْ نِكْتِبْهَا بِالحْبَارْ عْلَى الأَوْرَاقْ، عْلَى خَاطِرْنِي نِتْمَنَّى بَاشْ نْزُورْكُمْ وْوَقْتْهَا نَحْكِيوْ فِيهَا الوِجْهْ فِي الوِجْهْ بَاشْ تِكْمِلْ فَرْحِتْنَا. 13 يْسَلْمُوا عْلِيكْ وْلاَدْ أُخْتِكْ الِّي خْتَارْهَا اللهْ.