رِسَالِةْ بُولِسْ لْتِيطُسْ
تيطس ما كانش يهودي آما ولّى مسيحي وولّى يخدم مع بولس ويعاون فيه في خدمتو في التّبشير. تيطس موجود في كريت، وقعد الغادي باش يمشّي الخدمة في الكنيسة. بولس بعثلو الرّسالة هاذي في عام 64 بعد الميلاد باش يحكي على ثلاثة حاجات مهمّين.
أوّل حاجة، بولس يذكّر تيطس كيفاش القادة متاع الكنيسة يلزمهم يتصرّفوا. مباعد، ينصح تيطس كيفاش يعلّم النّاس الّي في الكنيسة، الرجال الكبار في السّن، الشباب، العبيد والنساء الكبار الّي هوما زادا باش يعلّموا البنات الصغار. في الإخر، بولس يعطي نصايح كيفاش المسيحي يلزمو يتصرّف، بالأخص يلزمو يكون هادي وطيّب، ويبعد على الحقد والعناد والفرقة في الكنيسة.
1
تَحِيَّة
مِنْ بُولُسْ عَبْدْ اللهْ وْرَسُولْ يَسُوعْ المَسِيحْ بَاشْ يِهْدِي الِّي خْتَارْهُمْ اللهْ لِلإِيمَانْ وِلْمَعْرِفْةْ الحَقْ الِّي تْوَافِقْ التَّقْوَى وْهُومَا عِنْدْهُمْ رَجَاءْ فِي الحَيَاةْ الأَبَدِيَّة الِّي وْعِدْ بِيهَا اللهْ الصَّادِقْ مِنْ أَوِّلْ الدِّنْيَا، وْظَهِّرْ كِلْمْتُو فِي وَقْتْهَا بِالبْشَارَة الِّي آنَا تِمِّنْتْ عْلِيهَا كِيفْ مَا أْمَرْ اللهْ مُخَلِّصْنَا، لْتِيطُسْ وِلْدِي الحَقَّانِي فِي الإِيمَانْ الِّي أَحْنَا مِتْشَارْكِينْ فِيهْ. النِّعْمَة وِالسَّلاَمْ عْلِيكْ مِنْ اللهْ الآبْ وِالمَسِيحْ يَسُوعْ مُخَلِّصْنَا.
تِيطُسْ فِي كْرِيتْ
خَلِّيتِكْ فِي كْرِيتْ بَاشْ تْكَمِّلْ تْنَظِّمْ الحَاجَاتْ النَّاقْصَة وِتْحُطْ شْيُوخْ فِي كُلْ مْدِينَة كِيفْ مَا وَصِّيتِكْ، تْحُطْ الِّي مَا عْلِيهِشْ لُومْ، ورَاجِلْ مْرَا وَحْدَة، وِوْلاَدُو مُؤْمْنِينْ وْمَا هُمْشْ مَتْهُومِينْ بِالخْلاَعَة وِالعِصْيَانْ. الأُسْقُفْ يِلْزْمُو يْكُونْ وْكِيلْ عْلَى خِدْمِةْ اللهْ وْيِلْزْمُو يْكُونْ مَا عْلِيهِشْ لُومْ، كِيفْ إِنْسَانْ مْكَلّْفُو اللهْ وْمَا يِلْزْمُوشْ يْكُونْ مِتْكَبِّرْ وْلاَ مُغْشَاشْ وْلاَ سُكَّارْجِي وِلاَّ يِتْصَرِّفْ بْقُوَّة وِلاَّ طَامِعْ فِي الرِّبْحْ الحْرَامْ، آمَا يِلْزْمُو يْكُونْ يْضَيِّفْ البْرَايْنِيَّة وِيْحِبْ الخِيرْ وِرْزِينْ وْعَادِلْ وْتَقِي وْيِتْحَكِّمْ فِي رُوحُو وِيْشِدْ صْحِيحْ فِي الكْلاَمْ الصَّادِقْ الِّي يْوَافِقْ الوْصَايَا مْتَاعْنَا، بَاشْ يْكُونْ قَادِرْ بَاشْ يُوعِظْ عْلَى التَّعْلِيمْ الصْحِيحْ وِيْرُدْ عْلَى المْعَارْضِينْ. 10 رَاهُو ثَمَّة بَرْشَة نَاسْ مَا يِسْمْعُوشْ الكْلاَمْ، وْهُومَا يِخْدْعُوا فِي النَّاسْ بِالكْلاَمْ الفَارِغْ، وْبِالأَخَصْ مِنْ بِينْ اليْهُودْ، 11 يِلْزْمِكْ تْسَكّْرِلْهُمْ افَّامْهُمْ، رَاهُمْ يْدَمّْرُوا فِي بْيُوتْ بْكُلْهَا وَقْتِلِّي يْعَلّْمُوا حَاجَاتْ مَا عِنْدْهُمْشْ الحَقْ بَاشْ يْعَلّْمُوهَا عْلَى خَاطِرْ الرِّبْحْ الحْرَامْ. 12 وْوَاحِدْ مِنْهُمْ وْهُوَ نَبِي مْتَاعْهُمْ قَالْ عْلِيهُمْ: «الكَرِيتِيِّينْ كَذَّابِينْ وْهُومَا وُحُوشْ خَايْبَة يَاكْلُوا بَرْشَة وْيُرْقْدُوا بَرْشَة.» 13 وِالشّْهَادَة هَاذِي صَادْقَة، إِمَّالاَ يِلْزْمِكْ تْوَبِّخْهُمْ بْقُوَّة بَاشْ إِيمَانْهُمْ يِتْصَلِّحْ، 14 وْمَا يِتْلْهَاوْشْ بِخْرَافَاتْ مْتَاعْ اليْهُودْ ووْصَايَا مْتَاعْ نَاسْ بِعْدُوا عْلَى الحَقْ. 15 كُلْ شَيْء طَاهِرْ لِلنَّاسْ الطَّاهْرِينْ، وْحَتَّى شَيْء مَا هُو طَاهِرْ لِلمَنْزُوسِينْ وِلِّي مَا هُمْشْ مُؤْمْنِينْ، حَتَّى مِنْ عْقُولْهُمْ وْضَمَايِرْهُمْ مَنْزُوسَة. 16 يَدَّعِيوْ الِّي هُومَا يَعْرْفُوا اللهْ، آمَا يُنْكْرُوهْ فِي أَعْمَالْهُمْ. هُومَا مَنْزُوسِينْ عَاصِينْ مَا هُمْشْ قَادْرِينْ بَاشْ يَعْمْلُوا أَيْ حَاجَة صَالْحَة.