1 Timothy, unte-arle alere atyinhe anthurre-arteke. Ayenge ngkwenge angkeme nhenhe alakenhe: Lterrke anaye Jesus ikwere urrkaperle-anetyeke atyepe-atyepe. Jesus Christ-ele ngenhe lterrke-iletyenhe. 2 Nhenge tharle ngenhe arrwekele akaltyele-anthetyarte ayeye Jesus Christ-kenhe tyerrtye arrpenhe areyele-inpe ayenge awerrirretyarte. Yanhe areye akaltye ayeye nhengeke tharle arrpenhe areyeke ileke, arratye anemenge. Kele ayenge ngkwenge ahentye-aneme Ngkarte-kenhe arrpenhe mwerre areye ayeye anyente renhe akaltyele-anthetyeke, itne-arle arrpenhe areye ayeye anyente renhe akaltyele-anthetyenhenge anteye.

3 Timothy, unte apeke nhenge ayeye ikwerenhele tyerrtye areye akaltyele-antheme, arrpenhele apeke ngenhe akenhe atweme nhenge itne-arle ayenge arrwekele atweke-arteke. Kele mwerre rarle. Unte Jesus Christ akwete apentaye, thultye mwerrele alartetye ikwerenhe apenteme-arteke anteye, arrpenhele renhe atwekenge iperrele. 4 Ayenge anteme ngkwenge angketyeke ahentye-aneme ayeye urrpetye nhenhe-akerte nhenge unte akaperte ngkwinhele akwete atnyenetyeke. Ayeye arrwekelenye thultye anyente-akerte. Apmere ahelhe nhenhele, angwenhe apeke-arle nhenge thultye mwerre anthurre anemere, rarle imperle-alhetyakenhe-arle warrke arrpenhe mpwaretyeke, arrangkwe-arle. Re urrkapeme nhenge alartetye ikwerenheke renhe-arle akangkentye mpwaretyeke. Unte alakenhe renhe anetyenhenge, arnterre anthurre urrkapetyenhe Jesus Christ-eke ware, thultye yanhe-arteke. 5 Ayeye nhenhe arrpenhe-arle. Ayeye arrpenhe nhenhe re tyerrtye areye unterrirreme-arteke arne mwerre akngerre nhenge inetyeke. Itne arratyentye unterlte-iwetyeke arrpenhe areye nteweketye. Itne apeke iwerre mwerrentye-nge ularre unterlte-iwetyakenhe itne impetyakenhele arne mwerre akngerre akaperteke nhenge inetyakenhele aneme. Alakenhe ikwerenge anteme Jesus Christ arratye apentetyeke. 6 Ayeye arrpenhe nhenhe akenhe artwe karteneke-artweye-akerte, nhenge merne lyapelhe-ilentye akngerre-arle. Angwenhe apeke nhenge arnterre urrkapeme merne inetyeke, nhenge merne atherrke mpenge-irrerlenge, nhenge tyerrtye lyapelhe-ileke-arle reke-amparrele akenhe inerlenge, arrpenhe areye akenhe urreke-arle akarelherlenge ikwere iperrele inetyenhenge. Unte alakenhe renhe urrkapetyenhe Jesus Christ-eke, re ngenhe arntarnte-aretyenhenge. 7 Jesus-ele ngenhe akwetethe akaltyele-anthetyenhe kele nhenhe ikwere iperre unte ayeye ingkirreke atyinheke akaltye anetyenhe. Alakenhe ikwerenge anteme, akwetethe itelaraye ayeye urrpetye nhenhe tharle ngkwenge ilekeke, alkngwirretyale anteme unte itnenhe itelaretyenhenge anthurre.

8 Timothy, akwete itelarerle-anaye Jesus-akerte, ikwere alkngwirretyale anaye. Re King David-eke-artweye aneme, artwe nhenge arrule-arle anekeke. Nhenge Jesus ilweke, Ngkartele renhe itethe-ilirtneke. Nhenhe Ayeye Mwerre tharle akwetethe ileme tyerrtye areyeke. 9 Alakenhe ikwerenge anteme ayenge kwene ikwere jail-le aneme, tyerrtye irrerlknge atweke-arle-arteke apeke, tyerrtye anyelkngalthe-arteke apeke. Itne ayenge chain-ele ingke atherre ayerneke, kele alakenhe ikwerenge ayenge uyarne untheme Ayeye Mwerre tyerrtye areyeke iletyeke anteme. Kele mwerre-arle! Kenhe Ayeye Mwerre nhenhe akenhe, arrpenhele apeke chain-ele ayernetyeke arrangkwe-arle. Ayeye nhenhe anteke-irreme apmere arrpe-anenhe ikwerele ahelhe nhenhele, tyerrtye areyele renhe akwete akngerneme tyerrtye ingkirrekeke ilerle-apetyeke. 10 Alakenhe ikwerenge anteme ayenge-arle atnerte akurne awelhetyakenhe-arle nhenge ayenge jail nhenhele anemele. Nhenge the tyerrtye areyeke Ayeye Mwerre ilemele, itne akenhe ayenge awerlenge-arle, yanhe areye Ngkartele-arle arrwekele akngakeke. The itneke akwetethe ayeye nhenhe renhe ileme, itne Ayeye Mwerre renhe Jesus-akerte arratye itelaretyeke rarle itnenhene mwerrentye arntarnte-aretyenhenge akayake-ileme ilweketye. Re itnenhe akngeme ikwerenge akwetethe anerrirretyenhenge apmere mwerre akngerre ikwerele.

11 The arrekantherre ayeye mwerre anthurre iletyeke ahentye aneme. Ayeye nhenhe kwenhe arratye anthurre! Nhenge itne-arle Jesus irrerlknge atweke, alakenhe renhe apeke itne anwernenhe anteme irrerlknge atwetyenhe. Kele mwerre! Itne apeke anwernenhe irrerlknge atweme anwerne-arle Christ renhe apenterlenge, anwerne ikwerele-arlenge akwete-ante anerrirretyenhe anwerne-arle renhe apentekenge. 12 Anwerne apeke Jesus apenteme tyerrtye areyele anteme anwernenhe atwetyenhenge apeke. Kele mwerre! Anwerne-arle apeke Jesus akwetethe apentewarreme, kele anwerne Jesus-enge akwete-ante aneme, anwerne alartetye aneme re-arteke, anwerne nhenge ikwerenge alkerele anerlenge. Nhenge anwerne apeke ilelherlenge anwerne renhe itelaretyakenhe, re akenhe ilelherlenge anwernenhe re itelaretyakenhele. 13 Jesus akwete untheme tyerrtye areyeke ikwere-arrpe atnyenetyenhenge. Alakenhe ikwerenge anteme nhenge anwerne ikwere-ketyenge impelhetyeke, re akenhe anwerneke akwete-arle untherlenge. Nhenge re apeke anwerne-ketye impelhemele anwerneke unthetyakenhe apeke, Re akenhe anerlenge Jesus arratye anetyakenhe-arle.

14 Timothy, akwete akaltyele-antherle-anaye ayeye nhenhe areye nhenge Ngkarte-kenhe areyeke apmere Ephesus ikwerele. Ngkartele anwerne akwetethe arerle-aneme. Ngkarte-kenhe areye ilaye ahele akerretyale ayeye arrpenhe areyeke. Itne apeke akwete ahele akerreme, arrpenhe yanhe areyele aweme-ketye. Itne apeke aweme arrpenhe areye ahele-ahele akerrerlenge, itne lterrke-irretyakenhe Ngkarteke apentetyeke, arrangkwe-arle. Ahele-ahele akerremele ayeye-akerte tyerrtye itnenhe apatelhe-ileme, itne ayeye Ngkarte-kenhe impelheme-ketye. 15 Timothy, arnterre akwete urrkaperle-anaye Ngkarteke. Angkentye Ngkarte-kenhe akaltyele-anthaye mwerrentye anthurre. Ngkarte anteme akangkentye anthurre aneme urrkapentye ngkwinheke. Unte apeke ayeye arrpenhe apeke akaltyele-antheme re akenhe mwantye anthurrele-arle urrkapentye ngkwinhe arerlenge nhenge akurnentye apeke aneketye. Unte anteme apure anthurre awelheme nhenge unte-arle akurnentye akaltyele-anthekenge ikwere. 16 Nhenge tyerrtye arrpenhe areyele akurnentye akaltyele-antheme itne-arle angkentye Ngkarte-kenhe akwele atnyeneme, ikwere iperre anteme itne Ngkarte-ngentyele arlenge anthurre alheme. Alakenhe ikwerenge anteme itnenhe irlpe artepele awetyeke itne ayeye yanhe-arteke ilerlenge. 17 Ayeye yanhe kwenhe akurnentye. Ayeye yanhe utyene akngerre-arteke, tyelke tyerrtye areye-kenhe nhenge arlkwentye akngerre. Tyerrtye nhenhe atherrele, Hymenaeus uthene Philetus uthenele arrpenhe areye ayeye akurne akaltyele-antheme anteye. 18 Artwe yanhe atherrele Ngkarte mwerrentye apenterle-anerretyarte. Kenhe lyete ulkere re-atherre ayeye arratye akaltyele-anthetyakenhe-arle anteme. Re-atherre Jesus-kenhe areyeke alakenhe angkerle-anerreme, “Ngkartele kwenhe kele utnenge anwerne-kenhe itethe-ileke.” Yanhe arratye-arle. Kele re-atherre akenhe Jesus-kenhe areyeke alakenhe-arle angkerlenge anteye, “Anwerne apeke ilwerlenge, tyerrtye anwerne-kenhe ahelhele akwete-arle aneme. Ngkartele awethe anwerne itethe-iletyakenhele, arrangkwe-arle!” Artwe nhenhe atherre-ngentyele angkentye kwenhe akurne, re-atherre kwenhe urrtyirreme. Kenhe Jesus-kenhe arrpenheme areye akenhe iwerre akurnentye alhemele Ngkarte-ngentyele artepe untyeme-irrerirreke itne-arle renhe-atherrenhe arratye itelarekenge. 19 Kenhe Ngkarte-kenhe areye itne ayeye arratye renhe arratye anthurre itelarerrirreme, itne ikwerenge impelhetyakenhe. Itne apwerte akngerre areye-arteke, ikwere-arleke-arle arrpenhe areyele apmere artetyenhenge. Apwerte akngerre nhenhe areye akngernelhetyakenhe, lterrke akwetethe aneme. Ngkartele ayeye atherre arrerneke apwerte yanhe atherreke-arleke. Nhenhe ayeye arrwekele renhe: “Ngkartele itelareme tyerrtye ingkirreke Ikwerenhe-arle anemeke.” Kenhe ayeye nhenhe arrpenhe akenhe aneme: “Angwenhe apeke angkeme rarle Ngkarte-kenhe, re impetyeke arne akurne rarle mpwaremeke, re anteme itnekenge untyeme-irretyeke.” Numbers 16:5.

20 Ayenge angkentye urrpetye ware angketyeke ahentye-aneme tyerrtye angwenhe apeke re apwerte mane akngerre anthurre-akerte apmere ilthe akngerrele-arle anerlte-anemeke. Apmere akngerre nhenhe kwene ikwerele tyerrtye nhenhele plate atningke-arlke tyampite atningke-arlke atnyeneme, arrpenheme apwerte silver-ngentyele apeke, arrpenheme apwerte gold-engentyele apeke, arrpenheme arne-ngentyele apeke, arrpenheme ahelhe-ngentyele apeke mpwareke-arle. Arne nhenge areye gold-enge silver-enge-arle atyeperreke-arle. Kenhe arne nhenge areye arne-ngentyele, ahelhe-ngentyele-arle ware-arle. Arne yanhe areye-arteke apmere akngerre ikwerele, anwerne Ngkarte-kenhe areye arrpenhe anteme aneme. Anwerne arrpenhe-arteke anetyakenhe. 21 Arne areye-arteke gold-enge silver-enge mpwareke-arle arlte atyeperre-kenhe-ante-arle, Ngkartele Ikwerenhe mwerre areye akngakeme warrke mwerre Ikwere urrkapetyeke. Anwerne anteme irlpe artepele awerrirreye nhenge tyerrtye areye ayeye akurne akaltyele-antherlenge. Anwerne Ngkartenge ularre mwerre anerrirreye Ikwere urrkapentye mwerre mpwaretyeke.

22 Lyete ulkere, artwe uthene arelhe awenke uthene apurte interretyeke ahentye-aneme nhenge apwerte mane akngerre inemele. Timothy, alakenhe-arteke anetyale! Unte-ame ayenge aweme? Kenhe tyerrtye arrpenhemele Ngkarte ileme Alartetye-arle, itne Ikwere-ante ware arratye anthurre anetyeke ahentye aneme. Itne-arle renhe arratye itelarerrirremele, Ikwere ahentye anthurre aneme, arrpenhe areyeke ahentye-aneme anteme, nterte akwete anetyeke. Timothy, Ngkarteke alakenhe re arratye anaye. 23 Timothy, tyerrtye arrpenheme arerte-arerte aneme, itne awetyakenhe. Itne akwetethe anthurre ilterremele ware angkeme, itne akutne anemele. Timothy itne-ketye arlenge anaye itwe-irretyale! 24 Nhenge unte Ngkarteke urrkapemele, arrpenhe areyeke mwerre anetyeke itnekenge ahele angkerretyale, atwerretyale anteye. Itnenhe arratyentyele akaltyele-anthetyeke. 25-26 Kenhe tyerrtye arrpenhe areye ngkwenge ahele angkeme apeke, itne-arle itelaretyakenhele arrentye Satan-ele-arle kele itnenhene iwerre akurnentyele akngeke. Itne itelaretyakenhe itne-arle urrkapewarreme arrentye Satan-eke. Itnenhe mwantyele arratye-ilaye, tnakelhetyakenhele, Ngkarte itneke angketyenhenge. Ngkarte apeke itneke angkerlenge, nhenge itne apeke utepe-irrerirremele nhenge ampetyele Ngkarte-werne alpetyalpetyenhenge. Itne apeke itelarerrirretyenhenge ayeye arratye renhe Jesus-akerte.