1 James arritnye atyinhe. Ayenge Ngkarteke warrke-irreme Jesus Christ Alartetye atyinheke-arlke. The ayeye nhenhe Ngkarte-kenhe ingkirreke-werne yerneme, apmere arrpe-anenhele-arle aneme, the arrekantherre iletyeke ahentye aneme ayenge-arle arrekantherre itirrerle-anemenge.

2-3 Atyewe Jesus-kenhe atyinhe areye, arrantherre nhenhe itelareme: Nhenge arrekantherre akurne-irrerlenge, arrantherre kwenhe akangkemele akwete anetyeke arrantherre-arle Ngkarte arratye akwete itelaremenge. Kenhe arrpenhe areyele arrenhantherrenhe akurne-iletyeke ahentye anemele, uternetyeke arrkernemele, itnenhe awerrirretyale anaye, nterte akangketyeke ware anaye. Nhenge alakenhe-arteke apeke irrerlenge, kele arrantherre Jesus anyente-ante arnterre apenterlte-anetyeke akaltye-irremele. Arne akurne nhenhe areyele arrenhantherrenhe ware arrkernemele, arrantherre apeke lterrke akwete aneme Ngkarteke arrantherre akangkemele anetyenhe. 4 Ye, Ngkarte akwete arratye itelarerrirraye, Renhe akwete apenterlte-anaye apurrke-irretye-kwenye-arle kele arrantherre mwerre anthurre-arle irreme. Yanhe iperre arrantherre lterrke Jesus-arteke-arle anetyenhe.

5 Arrantherre apeke Ngkarteke akutne aneme, nthakenhe-arle apeke Ngkarte anwerneke anetyeke ahentye aneme, kele Renhe apayuthnaye arrenhantherrenhe akaltyele-anthetyeke. Ngkartele-arle mwerre anthurre anthentye akngerre-arle. Re kwenhe arrenhantherrenhe anthetyenhe iwenhe apeke renhe apayuthnemenge. Re arrekantherre ahele-ahele angketyakenhe arrantherre Renhe apayuthnerlenge. 6 Arrantherre apeke Ngkarte apayuthneme, alakenhe itirrewarraye: Ngkartele aweke-arle ayenge arratye akaltyele-anthetyenhe. Kenhe arrpenhe areye akenhe, nhenge itne apayuthnemele alakenhe itirremele: Ngkartele apeke awemele ayenge akaltyele-anthetyenhenge, ithwenge apeke. Itne nhenhe-arteke, nhenge arlkerle arlenye-irremele rlkele-arle werneme, itne akngarte-iwelhenhepenhe. Alakenhe, tyerrtye yanhe areye apale-apale-irreme. 7-8 Angwenhele alakenhe Ngkarte arratye itelaretyakenhe, itirretyale anetyeke Akngeyele-arle renhe angkentye Ikwerenhe akaltyele-anthetyenhe. Angwenhe apeke itirrentye atherrame-akerte rarle itnyelpitnyeye anteme aneme arne ingkirreke rarle mpwareme ikwere. Ngkartele yanhe areye uyarne arntarnte-areme iwerre atherramele-arle itirrerlte-aneme. Ngkartele-arle tyerrtye yanhe-arteke akweke apeke akaltyele-anthetyeke arrangkwe-arle, anthetyakenhe-arlke renhe.

9 Kele arrantherre Jesus-kenhe areye apwerteke arrangkwe-arle aneme akangkemele akwete anaye. Alakenhe itirrerlte-anemele, “Ngkartele-arle ayenge arntarnte-arerle-anerlenge, ayenge impene anthurre.” 10-11 Angwenhele apeke-arle arne atningke nhenge atnyeneme, unte apeke awethe inerle-apemele tnakelherle-apeme. Kele, unte antethe mwerre-arteke-arle nhenge akweke ware-arle lyapeke. Kele uterne arraterlenge, antethe mwerre renhe ampeme antyerrke-ante irretyeke re ilwemele anteme. Ngkartele apeke tyerrtye apwerte ngkweltye akngerreke-artweye renhe uyerrelhe-ileme re tyerrtye apwerte ngkweltye akweke-akerte anteme anetyenhenge. Re kwenhe alakenhe akwete itirretyeke, “Ayenge artwe akngerre anetyakenhe, ayenge akenhe artwe akweke ware aneme.” Re Ngkarteke uyarne atyewe-irreme, apwerte akngerre-arle atnyenemenge ware. Kenhe tyerrtye apwerte akngerre-akerte anetyarte rarle ilweme antethe mwerre-arteke-arle.

12 Nhenge arrpenhe areyele arrenhantherrenhe uterneme arrkernemele arrantherre akwenpe anaye Ngkarte-ante apenterlte-anemele. Nhenge Ngkartele nhenhe areme kele Re arnterre akangkeme, kele Re angkeme arrantherre itethe akwete-ante anetyeke. Alakenhe kwenhe Re arrule anthurrele alhileke Ikwere-arle ahentye aneme areye. 13 Kenhe arrentye Satan apeke anwerneke urrtyirremele arrkernetyeke Ngkarte-ketyenge untyeme-irretyeke, anwerne apeke alakenhe angkeme, “Ngkarte kwenhe atyenge urrtyirreme apale akngemele!” Nhenhe kwenhe arratye kwenye, alakenhe angkeketyenge! Arrangkwe-arle, Ngkarte kwenhe anwerneke urrtyirretyakenhe akurnentye akngetyeke arrangkwe-arle. Kele tyerrtye akurnele Ngkarte uyarne uterneme akurne mpwaretyeke. 14 Nhenge tyerrtye nhenge re-arrpe akurne mpwaretyeke ahentye aneme, ikwere-arrpe itirremele re imerte akurne mpwaremele. Arne akurne yanhe areyele anwernenhe Ngkartenge rakeme. 15 Akurne mpwaretyeke ahentye aneke-arle iperre, re imerte renhe mpwaremele, re akwetethenhe-akwetethe akurne mpwaremele, kele re ilwemele. Alakenhe ikwerenge anteme renhe Ngkartele alkngetherre iletyenhe renhenhe Ikwere-ketye apmere arrpenhe-werne yernemele.

16 Atyewe Jesus-kenhe atyinhe areye, apale itirrewarretyale, angkentye Ngkarte-kenhe nhenhe arratye awemele. 17 Arne arrpe-anenhe anwerne apmere nhenhele areme, Ngkartele kwenhe re-arrpe mpwareke arrernemele anwerneke. Lyetenyenge, Re uterne, atnyentye, kwerralye areye anthurre mwerre, itne ingkirreke Ikwerenhe aneme. Akwetethe itne akngarte-iwelheme alkerele untherlte-anemele. Kenhe Ngkarte Re akenhe akwetethe Re-ante anerle-aneme, akngarte-iwelhetyakenhe. 18 Arrule anthurre Ngkarte ahentye aneke anwerneke Ikwerenhe areye anetyeke, anwerne renhe apentetyeke. Re-arrpe angkentye arratye Ikwerenhe yernetyeke anwernenhe awethe itetheke mpwaretyeke. Kele anwerne nhenge Ikwerenhe impene anthurre areye Rarle mpwareke-arle.

19 Atyewe Jesus-kenhe atyinhe areye awerrirraye, arrantherre apeke iparrpe arrpenhe areyeke angkeme nhenge itnenhe akwele arratye-iletyeke. Alakenhe mpwaretyale! Urreke arrantherre angketyenhenge, Ngkarteke-amparre aweme angkerlenge. Ikwerenge-ntyele, arrantherre itneke angkemele, itneke mwerrantye angkaye itneke ahele-irretyale. 20 Arrantherre apeke itneke ahele-irreme, kele arrantherre warrke Ngkarteke uyarne arratye mpwaremele. 21 Arne akurne areyeke itirreketye, arratye anaye akurne mpwaretyale. Tnakelhetyale! Alakenhe irreketye, angkentye Ngkarte-kenhe akwetethe apentewarretyeke itirremele. Ngkartele angkentye Ikwerenhe arrekantherre-arleke arrerneke. Kele angkentye Ikwerenhe awerrirraye Re anteme arrenhantherrenhe itetheke mpwaretyenhenge.

22 Angkentye Ngkarte-kenhe awetyale ware. Kele arrantherre mpwaretyeke iwenhe re angkemenge. Unte urrtyalthe ware-ketye. 23-24 Kenhe angwenhele apeke angkentye Ngkarte-kenhe aweke-arle, mpwaretyakenhe anteme aneme, re imerte ikwere alkngwirretyenhenge. Kele re artwe-arteke-arle inngerre kelathenge arelhenge, ikwerenge-ntyele re alkngwirreme rarle inngerre arelheke ipenhe. Kenhe arrantherre apeke alakenhe-arteke, arrantherre apeke angkentye Ngkarte-kenhe aweme ware, kele imerte mpwaretyakenhe re angkerlenge. 25 Angkentye nhenhe Ngkarte-kenhe mwerre anthurre-arle, kelathe-arteke-arle mwerre! Unte apeke mwantyele arerle-aneme renhe apentemele alkngwirretyakenhele, unte akurnenge impelhetyenhenge. Ngkartele anteme ngenhe lterrke-ileme arntarnte-arerle-anemele. Alakenhe ikwerenge anteme anwerne angkentye Ngkarte-kenhe akwetethenhe awetyeke apenterlte-anemele.

26 Angwenhe apeke-arle Jesus-kenhe akwele ilelheme tyatye-arenye-arlke akwele, nhenge re ayeyele ilerle-apeme tyerrtye arrpenheke tyele angkemele, ahele-ahele akemele, kele re urrtyalthe ware-ketye, apale-arle alheme Ngkarte-ketye. Tyerrtye yanhe Jesus-kenhe anetyakenhe. 27 Kenhe tyerrtye angwenhe Jesus-kenhe anthurre, kele re atnampe areye uthene arelhe warlekwerte areye uthene arntarnte-aremele alhwarrpe-akerte areye-arle anemenge. Tyerrtye nhenhe re akenhe ayakelhemele apale alheketye, akurne areye-ketyenge apurte-ilelhemele. Kele tyerrtye nhenhe-arle Jesus-kenhe anthurre rarle.