1 Artwe atyeperre anthurre aneke nhenge alartetye Jew areyeke Nicodemus arritnye, nhenge Pharisee-anteye-arle aneke. 2 Re ingwele anteme Jesus-werne alheke ikwere anteme angkeke, “Akaltyele-anthenhe-anthenhe-aye, anwerne kwenhe itelareme Ngkartele-arle ngenhe yerneke akaltyele-anthetyeke artwele-arle arne ilyernpenye anthurre nhenhe areye uyarne mpwarerlenge unte-ante mpwaremeke Ngkarte-kwenye. Ngkartele-ante ware kwenhe ikwere imerneme nhenge rarle itnenhe mpwaretyenhenge.”

3 Jesus akenhe ikwere alakenhe-arle angkirtnerlenge, “Nhenhe awaye: The kwenhe ngkwenge arratye nhenhe ileme, nhenge tyerrtye apeke awethe-arle akweke interlenge-ante, Ngkartele kwenhe renhe ikwere artweye-anteye-ileme, Alartetye ikwerenhe anetyeke.”

4 Nicodemus anteme angkeke, “Nthakenhe-arle-ame artwe akngerre awethe-anteye akweke intetyenhe? Re uyarne irrpirtneme atnerte mikweke-kenhe-werne atherre-ngare anteme intetyenhenge.”

5 Jesus anteme angkirtnerlenge, “Arrangkwe-arle, itirrentye ngkwinhe-arteke anetyakenhe. The kwenhe ngenhe arratye ileme, arrekwele kwenhe unte inteke mikwele renhe akweke atnyeneme. Kenhe nhenge unte awethe akweke intemele kele Ngkarte ngkwenge Alartetye anetyenhe unte-arle kwatyeke irrpekenge iperre-ante Rarle Utnenge Akngerre ngkwenge-arleke akwerneke. 6 Nhenge arrpenhe akweke intemele nhenge iwenhe-arle tyerrtye atherrele mpwarekenge, re anteme-arle nhenge tyerrtye-irreme. Kenhe nhenge arrpenhe-arle awethe-anteye akweke intetyenhe nhenge iwenhe-arle Utnenge Ngkarte-kenhele mpwarekenge, re anteme-arle nhenge utnenge alkarle-arle ineme. 7 Apatetyalaye nhenge nhenhe-arle the ngkwenge ilemeke arrantherre-arle awethe akweke intemeke utnenge alkarle atnyenemeke Ngkarte-ngentyele. 8 Arrantherre itelareme nhenge nthakenhe-arle rlkele wernemeke nhenge wernetyeke-arle ahentye anemele. Unte aywerre ikwerenhe aweme, kele unte akutne-arle nhenge nthenhe-ngentyele rlkele wernemeke nhenge nthenhe apekele alhemeke. Alakenhe-anteye-arle anwerne akutne aneme nhenge nthakenhele tyerrtye areye awethe akweke intemeke nhenge Utnenge Ngkarte-kenhele-arle mpwareme-ngentyele.”

9 Nicodemus-ele awethe-anteye apayuthneke, “Nthakenhe-arle-ame nhenhe anetyenhe? The uyarne anthurrele itelareme.”

10 Kenhe Jesus anteme angkirtneke, “Unte kwenhe akaltyele-anthenhe-anthenhe nhenge akaperte altywere anthurre tyerrtye Israel-arenye areyenge ularre, kele ayenge anteme apateme unte-arle arne nhenhe areyeke akutne! 11 Mwantyele awerrirraye: The arrenhantherrenhe ileme arne areye-akerte tharle areke, arne nhenge areye-akerte arratye kwenhe anerlenge. Kenhe arrantherre akenhe akangkwe-irretyakenhe aneme iwenhe-arle ayenge angkemeke. 12 The kwenhe arrekantherre ileke arne areye-akerte apmere ahelhe nhenhele irrekenge, arrantherre akenhe ayenge uyarne itelareme. Kele nhenge the apeke arrenhantherrenhe arne areye-akerte ilemele nthakenhe-arle apmere alkere akertnenge irremenge, arrantherre ayenge uyarne anthurre-arle itelaretyenhe! 13 Ayenge-ante ware kwenhe alkere akertne-werne alheke-arle. Arrpenhe kwenhe alhetyakenhe apmere akertne nhakwe-werne. Ayenge-ante ware kwenhe nhenge apetyeke-arle alkere-akertne-ngentyele, arrantherre kwenhe itelaretyeke nhenge iwenhele tharle arrekantherre ilemeke. 14 Arrantherre itelareme nhenge Israel-arenye areye-arle arrule anthurre utepe-utepe untheke apmere ahurratye ikwerele nhenge Moses-elarle arne apmwe-arteke mpwareke nhenge arne akantye akertneke-arleke arrernetyeke. Alakenhe renhe re-artekele itne ayenge arrernetyenhe, Alere alkere-arenye apmere ahelhe nhenhele-arle akweke inteke, nhenge arne akertneke irlpare arrernetyeke imerte ayenge irrerlknge atwemele. *Nhenge tyerrtye Israel-arenye areye-arle utepe-utepe-akelheke unthetyame apmere ahurratye ikwerele arrule anthurre itne akurne anthurre irreke. Kele Ngkartele anteme apmwe areye yerneke itnenhene uthnetyeke. Re anteme Moses-eke ileke arne apmwe-arteke mpwaretyeke nhenge metal-ngentyele arne akertneke-arleke arrernetyeke. Nhenge tyerrtye nhenge apmwele uthneke-arle-iperrele renhe akertne-atheke areme nhenge apmwe metal-ngentyele-arle mpwareke-werne kele re mwerre-arle irrirtneme ilwetyakenhe anteme aneme. 15 Yanhe ikwerenge-ntyele anteme, tyerrtye ingkirrekele ayenge arratye itelareme imerte itethe akwete anemele alethe re, atyengenge anyente-irremele anteme.”

16 Ngkarte kwenhe tyerrtye ingkirrekeke apmere ahelhe nhenhe-arenye ahentye anthurre aneme Rarle Alere ikwerenhe anyente ware apmere ahelhe nhenhe-werne anwerneke yerneke, kele yanhe-ngentyele tyerrtye ingkirrekele-arle nhenge renhe arratye itelareme areye kwenhe ilwetyakenhe aneme Ngkarte-ngentyele akngakelheme akwete-ante. Kele-anteyele itne Ngkartenge itethe alethe akwete anetyeke. 17 Nhenge Ngkartele Alere ikwerenhe apmere ahelhe nhenhe-werne yerneke, Re kwenhe renhe tyerrtye areyeke arriletyeke yernetyakenhe nhenge arne akurne areyele itne-arle mpwarekenge. Kele anteyele re renhe yerneke-tetye nhenge re itnenhene itetheke mpwaretyeke.

18 Nhenge tyerrtye ingkirrekele Alere ikwerenhe arratye itelarerlenge, Ngkarte-arle angkeme nhenge itneke arriletyakenhele. Akngeye kwenhe kele angkeke rarle tyerrtye ingkirreke arrileke nhenge Alere ikwerenhe arratye itelaretyakenhenge, itne-arle kwenhe itelaretyakenhe anerlenge nhenge iwenhele Alere ikwerenhe anyentele itneke mpwareke. 19 Nhenge alkngenthe apmere ahelhe nhenhe-werne apetyeke anwerneke imernetyeke Ngkarte-arle arratye anemeke, kenhe tyerrtye areye akenhe ahentye-aneme anthurre arne akurne akwete mpwarerlte-anetyekele, itne itelaretyeke ahentye-anetyakenhele nhenge Ngkartele-arle arrileme tyerrtye areyele-arle arne akurne mpwaremeke, itne kwenhe ahentye aneme arne akurne-akwete mpwarerlte-anetyeke. 20 Tyerrtye areye nhengele arne akurne areye mpwarerlte-aneme kwenhe ahentye anthurre anetyakenhe yanheke nhenge alkngenthe-arteke-arle anemeke, nhenge Christ-arle anemeke, Itne arlengele aneme ikwere-ketye itne-arle atere-irremenge rarle imerneme-ketye arne akurne areye-arle itne mpwaremeke itnenhe ilperneme anteme. 21 Kenhe tyerrtye areye akenhe mpwaremele nhenge iwenhe-arle Akngeye angkeme arratye anerlenge, nhenge irrpelthe-irremele alkngenthe-werne apetyeme, nhenge tyerrtye areyele akethe aretyenhenge arne areyele itne-arle mpwarekeke. Nhenge arne yanhe areye itne-arle mpwareke imernemele itne-arle Akngeye aywerrkele aweke.

22 Ikwere-iperrele anteme Jesus uthene apententye akngerre ikwerenhe uthene Jerusalem impemele alheke apurte nhenge apmere arrpe-anenhele untherlte-apeke nhenge apmere itwe areyele ahelhe Judea ikwerenge. Itne tyerrtye atningke kwatyeke akwernetyame baptise-eme-ilemele apmere yanhe-arenye areye. 23 Lyete anteme John-elarlke tyerrtye areye kwatyeke akwernetyame apmere arrpenhenge-arlke Aenon arritnyenge itwele yanhe ahelhe Salim arritnyenge, nhenge yanhe ikwerele-arle kwenhe kwatye pirnte atningke anerlenge. Tyerrtye atningke John ikwere-werne apetyetyame, re itnenhe kwatyeke akwernetyame. 24 Arne nhenhe areye-arle irreke nhenge urreke itne John jail-ke akwernetyenhenge.

25 Kele apententye akngerre John-kenhe arrpenheme nhenge ahele-anteme angkerreke artwe Jew anyenteke nhenge iwerre arratyele anetyeke-akerte, atywerrenge itnekenhenge ularre, nhenge itne kwatyele alhewelhetyarte. †Nhenge Jew areyele akertne utyernetyeke-irremele itne kwatyeke-amparre-arle alhewelhetyarte, arne itnekenhe areye-arlke 26 Apententye akngerre nhenge areye John ikwere-werne alheke angkemele, “Akaltyele-anthenhe-anthenhe-aye, unte itelareme artwe nhenge ngkwenge-arle aneke nhenge unte-arle tyerrtye areye kwatyeke akwernetyameke arrengakwe lhere Jordan-enge. Re kwenhe aneme nhenge unte-arle angkeke atyeperre-ulkere-arle akwele aneke ngkwengenge. Kele, lyete kwenhe re tyerrtye areye kwatyeke akwernetyame itnenhe baptise-eme-ilemele, kenhe tyerrtye atningke ikwere-werne alheme anwerneke apetyetyakenhe!”

27 John anteme itneke alakenhe angkirtneke, “Arrpenheme kwenhe atyenge-werne apetyeke. Kenhe arrpenheme akenhe Jesus-werne-arle alheme. Itne kwenhe apelkele ware alhetyakenhe. Tyerrtyele kwenhe atnyeneme nhenge iwenhele Ngkartele-ante ware renhe antheme, arrantherre kwenhe ingkerte-irretyale anetyeke tyerrtye areye-arle kwenhe Jesus-werne alherlenge. 28 Arrantherre kwenhe ayenge alakenhe angkerlenge aweke, ‘Ayenge kwenhe Messiah anetyakenhe, nhenge Ngkartele-arle alhilemele yerneke-arle. Kele Ngkartele akenhe ayenge ikwerenge alhetyeke arrekwele-arle nhenge the iwerre arratye nhenge mpwaretyeke ikwere.’

29 “Awerrirraye, re kwenhe artwe anewe-arle akerretyenhe anemele, ayenge atyewe ikwerenhe-arteke aneme. Atyewe nhenge artwe-kenhe anewe-arle akerreme, kenhe akethele tneme ikwere akarelhemele apetyetyeke. Re kwenhe atnerte akangkeme anthurre nhenge artwe nhenge arraterlenge. Alakenhe anteye anteme aneme, ayenge atnerte akangkemele anthurre aneme nhenge iwenhe-arle arrantherre atyenge ilerlte-iwerneke. 30 Arrantherre kwenhe renhe akertne utyernetyeke, re kwenhe atyengenge tyeperre anthurre-ulkere, apententye akngerre ikwerenhe areye kwenhe atningke anthurre irretyenhe. Kenhe ayenge akenhe tyeperre anetyakenhele apententye akngerre atyinhe areye urrpetye-irretyenhe.” Alakenhe renhe John apententye akngerre ikwerenhe areyeke angkeke.

31 Re alakenhe-arlke angkeke Jesus kwenhe alkerenge apetyeke. Re kwenhe arrpenhe ingkirrekenge tyeperre anthurre-ulkere. Kenhe artwe ahelhe nhenhe-arenye-arle akwetethe angkeme arne ahelhe nhenhe-arenye areye-akerte. Kenhe Jesus alkere akertnenye-nge apetyeke-arle, kele angkentye ikwerenhe areye arrpenhenge atyeperre anthurre ulkere. 32 Re tyerrtye areyeke ileme iwenhe-arle re areke awekele alkere akertnenge, kenhe tyerrtye urrpetyele ware-arle awerlenge nhenge iwenhele re angkemeke. 33 Kenhe tyerrtye areyele angkentye ikwerenhe aweke-iperrele renhe arratye itelaremele kwenhe akaltye anetyenhe iwenhe-arle Ngkarte-arle angkeme kwenhe arratye anthurre aneme. 34 Anwerne kwenhe itelareme nhenge renhe arratye-arle anemenge Jesus-arle, Ngkartele-arle yernekenge, nhenge angkerlenge angkentye Ngkarte-kenhe. Angkentye kwenhe arratye anthurre aneme, Utnenge Ngkarte-kenhe-arle Jesus-eke irrpenheke, Utnengele anteme Jesus ileme angkentye ikwere angketyeke. 35 Awerrirraye! Akngeye kwenhe Alere ikwerenhe atnerte ahentye anthurre aneme Re-anteme renhe arrerneke arne ingkirreke anthurreke alartetye anetyeke. 36 Nhenge tyerrtyele apeke Alere ikwerenhe arratye itelaremele kele re itethe alethe akwete-arle aneme anyente-irremele Ngkartenge. Kenhe tyerrtye apeke ikwere akangkwe-irretyakenhe aneme renhe ipmentye-iwemele kele re ikwerenge apurte-irretyakenhele aneme rarle ikwerenge akalkeke-akalke anthurre-arle aneme, Ngkarte anteme ikwerenge ahele-anteme-irrerle-aneme akwetethe.